MAZMUR 69 - Tanou Moonsoi Timugon

Mampiau ra makiindangan

¹ Ra tingganai santimungan maririmbai. Sumugut ra rimbai: Bunga' Bakung. Ri Daut.

² Bayago' aku no, iou Aki Kapuuno'! Timinuu' noyo timug polos ra liog kuno;

³ matikolosor aku ra losok malandom, am kolondo' kinjangan; nalinjob aku ra timug malandom, am kinulun ru timug mamaar poyo mopolosor raki'.

⁴ Naagui aku nampiau ra makiindangan, am bambalangan kuno maruol. Mato kuno mapari' maginaa ra pangindanganan Muno.

⁵ Masuang ulun masisang raki' ra kolondo' sasaban, masailan poyo sampung ru abuk ru ulu kuno. Simbaalin aku ru pantula' kuno, maikang ilo am masaga' mampatoi raki'. Jajalin nilo aku manaak ra kuliamos ondo' kalo tinakou kuno.

⁶ Iou Aki Kapuuno', ngaangai' tula kuno kalo nakasibuni Rirun, napandayan Mu ra mapara' piboo sasambungon aku.

⁷ Pai' aku polosoo' mapakauyu' ra ulun ondo' lumansan Rirun, iou Tuhan Raja' Ondo' Maayo Kaga' Kuasa'! Pai' aku polosoo' mapakauyu' ra ulun ondo' sumamba Rirun, iou Aki Kapuuno' ru ulun ru Israil!

⁸ Sabap ra Okou noyo, nangkinibit raki' inasaban, am nauyu' aku toojo.

⁹ Koson aku ayuk ra ulun suai ra ngaangai' pabukat kuno, koson ayuk ra tambului ru pabukat kuno.

¹⁰ Togom kuno ra Baloi Muno mapaang koson ra apui; nagasaban nilo Rirun lumumpa' ra inan kuno.

¹¹ Paingganaan ku guang kuno ra mampali, kaa' magasab ulun raki'.

¹² Bulintok ra aku manulung ra bayang panguliran, kuritin nilo aku.

¹³ Bulintok ra ilo mantitimung mansunur ilo raki', am rimbayon ru ulun magauk pana mansunur raki'.

¹⁴ Kaa' aku, makiasi' aku Rirun, iou Tuhan; iowo' noyo pakiasian kuno, iou Aki Kapuuno', sumugut ra bulintok Muno. Iowo' noyo pakiasian kuno ralalom ru togom Muno ra maayo no, sabap ra sinugut Mu bantu' koson mamayag raki'.

¹⁵ Pai' aku polosoo' molosor ra losok; bayago' aku no intor ra ngaangai' pantula' kuno, am intor ra timug ondo' malandom.

¹⁶ Pai' polosoo' liur no mangabas raki'; pai' aku polosoo' molosor ra lonor ru raat, kapoam malinjob ra ralalom ru lobong.

¹⁷ Iowo' noyo pakiasian kuno, iou Tuhan, sabap ra Okou moonsoi am magulayun monogom; ra asi' Muno ondo' maayo, kailio' aku no!

¹⁸ Pai' noyo pansibuni intor ra ulipon Mutu; makakapaganan aku toojo – ribaki' noyo indangano' aku!

¹⁹ Ibok no am bayago' aku no; palabuso' aku intor ra pantula' kuno.

²⁰ Nakapandai Kou ati kulaan ra aku asabin am ati kulaan ra aku tauyuon am iison; nakito Mu ngai' pantula' kuno.

²¹ Nagasaban nagibit ra guang kuno malawo, am liminungkang aku. Maguyum aku ra ulun ondo' maluoi pakaasi', kaa' kolondo' najampa' ku; maguyum aku ra ulun ondo' mangikang ra guang kuno, kaa' kolondo' natuum kuno.

²² Bulintok ra aku maitilan, pasulungon nilo tuuwo paakanin raki'; bulintok ra aku paason pasulungon nilo suka' painumin raki'.

²³ Polosoon noyo bunsag nilono mangaput risilo; polosoon noyo pangiantakan nilono mampajaling risilo.

²⁴ Polosoon noyo mato nilono mobolou; polosoon noyo baluntur nilono malawui.

²⁵ Polosoon noyo sangit Muno lumumpa' risilo; polosoon noyo lasu' ru guang Muno makatingkuup risilo.

²⁶ Polosoon noyo pangkiman nilono masiluk, polosoon noyo ngaangai' minayan ra kim no mapuso.

²⁷ Imboloon nilo ulun ondo' inukum Muli; ruangin nilo poyo maruol ru ulun ondo' pinilatan Muli.

²⁸ Patuliso' noyo ngaangai' tula nilono; pai' ilo ampuno'.

²⁹ Polosoon noyo inggalan nilono malulu' intor ra buuk ru ulun maayag, am kalo matulisan ra pamatikan ra inggalan ru ulun Muno.

³⁰ Kaa' marualan aku am lumungkang; kayango' aku no am bayago' aku no, iou Aki Kapuuno'!

³¹ Omporon ku i Aki Kapuuno' ra rimbai; anggakon ku Io ra ragu paringkuanangan.

³² Baal raginio mapabansuk toojo ra Tuhan intor ra mapataak ra taak simbalui ru sapi', kapoam taak ru sapi' gawayan ra maayo.

³³ Amon ulun inimpayan magilong ra baal ragitio, maansukan ilo; ulun ondo' sumamba ri Aki Kapuuno' mintopot poyo.

³⁴ Mangkirongog Tuhan no ra ulun musikin, am kalo lilianin No ulun Nano ondo' pinasubol ra pangaputan.

³⁵ Omporo' noyo i Aki Kapuuno', akau limbowon am tana', raat am ngaangai' ilo ondo' maayag ra ralalom nano!

³⁶ Ampinin No Jirusalim, am baalon No saguli' bandar-bandar ru Jiuda; ulun Nano mayan ra giu' no; pagun raginio masauk ra longgom nilo.

³⁷ Papag ru ulipon-ulipon Nano manungkus ra pagun raginio, ngaangai' ru ulun monogom Riso no mayan ra giu' no.