MAZMUR 68 - Tanou Moonsoi TimugonRimbai namanangan 1 Ra tingganai santimungan maririmbai. Mazmur ri Daut. Rimbai. 2 Bigor i Aki Kapuuno' am pantutuliaro' pantula' Nano. Ulun ondo' masisang Riso nagiru' intor Riso. 3 Inggalarin ilo ri Aki Kapuuno' koson ra lisun siniob ru angin; ulun malaat maimbolo' ra saang ri Aki Kapuuno' koson ra dian lumuu' ra apui. 4 Kaa' ulun ri Aki Kapuuno' marikamo am maansukan ra saang Nano; magigindii ilo ra maansukan. 5 Rimbayi' noyo i Aki Kapuuno', omporo' noyo inggalan Nano; pabatango' noyo ralan ru Io ondo' sumiab maya' ra gaun. Inggalan Nano Tuhan – parikamo kano ra saang Nano! 6 I Aki Kapuuno' ondo' minayan ra intok Nano ra matulai, magalung ra anak nailusan ra matuo am manindung ra ulun napuor. 7 Ulun ondo' kolondo' pabukat aniin No ra intok, am mapalabus Io ra ulun narakop suku' ilo maansukan; kaa' ulun mangalaat makaayan ra tana' mapua'. 8 Iou Aki Kapuuno', bulintok ra Okou naningganai ra ulun Muno, bulintok ra Okou minugar ra tana' kaagisan, 9 tana' ti mapuyu' am limbowon maparatu' ra rasam, sabap ra saang Muno, minindagu i Aki Kapuuno' giu' ra Sinai, saang ri Aki Kapuuno' ru ulun ru Israil. 10 Paratuon Mu rasam maawas, am niayuk mapatapuli' ra tana' mapua', 11 am ulun Muno mayan ra giu'; ralalom kinoonsoi Muno, alungin Mu ulun musikin. 12 Manaak Tuhan ra panusuban Nano, am masuang ruandu' magibit ra tanou: 13 “Ngaangai raja' am saujor nagigiru' noyo!” Ruandu' ra baloi mantayar ra kuliamos ondo' ginaau, am ondo' natatang magagalung ra domba bulintok ra mangayou 14 nakaalap ra susuit asang ra binaal ondo' inan nano natikop ra pirok, ondo' kawo nano inangkupan ra mas manguliat. 15 I Aki Kapuuno' Ondo' Maayo Kaga' Kuasa' manguliagai ra ngaangai' raja' ra giu' koson ra ais batu rumatu' ra Gunung Jalmon. 16 Mapara' piboo gayo ru gunung Basan, gunung ra masuang tampak! 17 Kua intor ra tampak muno ra masuang no tontong muno sumolon ra Bulur Sion ondo' pinili' ri Aki Kapuuno' koson ayanan Nano? Sabuoi-buoi no Tuhan mayan ra giu'. 18 Ralalom kaaparan ribu ru kurita' kuda Nano ra maayo, matong Tuhan intor ra Sinai mongoi ra intok ondo' matulai no. 19 Magaloi Io ra intok masawat, magibit ra ulun masuang ondo' rinakop mababaya' Riso, am mangapu ra taak intor ra ulun mangalaat. Tuhan i Aki Kapuuno' mayan ra giu'. 20 Omporo' i Aki Kapuuno', sabap ra Io noyo namayag ritakau; moonong orou Io mansaan ra kapaganan takau. 21 I Aki Kapuuno' takano Tuhan ondo' mamayag; Io noyo mapalabus ritakau intor ra kapatayan. 22 Ulu ru pantula' no popolon ri Aki Kapuuno', ilo ondo' marayus maayag ralalom ru tula. 23 Mindagu Tuhan, “Ibiton Ku pantula' mino saguli' intor ra Basan, ibiton Ku ilo saguli' intor ra raat ondo' malandom, 24 maa' raginio maalap min kabagui' kalayam mino ra raraa' nilono, am uku' mino mantila' ra raraa' nilo saboi ilo majala'.” 25 Ngaangai' ulun magilong ra ugar guguluyur ra Okou namanang, iou Aki Kapuuno', ugar guguluyur ri Aki Kapuuno' kuno, Raja' kuno mumpos ra Baloi Nano. 26 Ulun maririmbai mugar pagulu am ulun mangkuli ra miujik tumauli, am ralaa mangasas ra tamburing mangkilolot risilo. 27 “Omporo' noyo i Aki Kapuuno' ondo' minunor ra ulun Nano; akau ngaangai' papag ri Jakub, omporo' min Tuhan!” 28 Binjamin, bansa' boborok toojo minugar pagulu, am tingganai-tingganai ru Jiuda siminimpung ra pulalai nilono, miniku' noyo tingganai-tingganai ru Jibulon am Naptali. 29 Patalango' noyo kuasa' Muno, iou Aki Kapuuno', kuasa' ra pinakai Muno ra tayar mai. 30 Ngaangai' raja' mapataak Rirun ra tangguang giu' ra Baloi Muno ra Jirusalim. 31 Sawayo' noyo Misir, maayag ra masigo no minunor ra katabuan; sawayo' noyo ngaangai' bansa', sampulalai sapi' gawayan am niayuk ngaangai' anak nilono, saboi sumamba ilo ngaangai' am mapataak ra pirok no Rirun. Pantuliaro' noyo ulun ra masaga' mangayou! 32 Ngaangai' duta intor ra Misir minatong mapataak ra gangsa'; ulun intor ra Itiopia naringkaagou nagibit ra tangguang pataakon ri Aki Kapuuno'. 33 Rimbayi' min noyo i Aki Kapuuno', akau ngaangai' karajaan ru tana' ti, parimbai kano ra rimbai mongompor ra Tuhan, 34 Riso ondo' makasail ra limbowon ra galing i. Rongogo' pampiawan Nano ra mosongou. 35 Apuo' noyo kuasa' ri Aki Kapuuno'; titikop ru Israil Io namarinta, makito kuasa' Nano giu' ra limbowon. 36 Mapara' piboo kinatulai ri Aki Kapuuno' takau bulintok ra Io miningkual intor ra inayanan Nano, i Aki Kapuuno' ru ulun ru Israil manaak ra kuasa' am ikang ra ulun Nano. Omporo' noyo i Aki Kapuuno'! |
Hakcipta © Bible Society of Malaysia, 2013.
Bible Society of Malaysia