MAZMUR 67 - Tanou Moonsoi Timugon

Rimbai Paringkuanangan

¹ Ra tingganai ru santimungan maririmbai. Ondo' sinumbaya' ru jitor. Mazmur. Rimbai.

² Iou Aki Kapuuno', pakaasi' no am barakati' akai; pakaansuk no magilong ramon,

³ maa' raginio titikop ru tana' ti makapandai ra kasagaan Muno, am ngaangai' bansa' makapandai ra pamayagan Muno.

⁴ Gama' ru bansa'-bansa' mongompor Rirun, iou Aki Kapuuno'; gama' ru ngaangai' bansa' mongompor Rirun!

⁵ Gama' ru ngaangai' bansa' maansukan am marimbai maansukan, sabap ra natimpok Okou nangakim ra ulun am mangila' ra moonong bansa' ra tana' ti.

⁶ Gama' ru bansa'-bansa' mongompor Rirun, iou Aki Kapuuno'; gama' ru ngaangai' bansa' mongompor Rirun!

⁷ Tana' napaingkual ra ampos no; i Aki Kapuuno', i Aki Kapuuno' takau, nambarakat noyo ritakau.

⁸ Nambarakat noyo i Aki Kapuuno' ritakau; gama' ru ngaangai' ulun ra titikop ru tana' ti mangurumat Riso.