MAZMUR 65 - Tanou Moonsoi Timugon

Ompor am paringkuanangan

¹ Ra tingganai santimungan maririmbai. Mazmur ri Daut. Layuk.

² Sotopot no giu' ra Sion, akai mongompor Rirun, iou Aki Kapuuno' am bayaan mai bantu' maili Rirun,

³ sabap ra iniou Mu pakiasian. Ngaangai' ulun rumatong Rirun

⁴ sabap ra makatula ilo. Kara' mai tula mai maagat kaga', kaa' inampun Mu tula mai.

⁵ Pakaansuk noyo ilo ondo' pinili' Muno, ilo ondo' inibit Muno minayan ra Baloi Muno. Giu' ra Baloi Muno, basugon Mu akai ra ngaangai' ondo' moonsoi, barakat Muno ramon giu' ra ayanan Muno ondo' matulai.

⁶ Bulintok ra akai mampiau tumaam Kou am manaak Kou ramon ra kamanangan; baal-baal makaimuag binaal Mu koson mamayag ramon. Okou kalansanan ru ulun ra titikop ru tana' ti, am ulun giu' ra sandaup ru raat ondo' maalur.

⁷ Ralalom ru kinaikang Muno pabigoron mu gunung ra intok no, koson mampakito ra kuasa' Muno ra maayo.

⁸ Pinotontor Mu nginoos ru raat am bolos mapuor ru kinulun; pinalinos Mu kaagawan ru ngaangai' bansa'.

⁹ Ngaangai' namagun ra tana' ti malaa' am mangurumat, bulintok ra ilo makakito ra binaal muno ra makaimuag. Ginuang Muno magibit ra ulun magitapap ra longon ra titikop ru tana' intor ra pompor suku' ra pompor.

¹⁰ Alungin Mu tana' am paratuon Mu rasam; pasaukon Mu tana' no malabung. Sungoi ra mongoborok timugin Mu; patuwon Mu tatanom ra tana'. Ginio noyo binaal Muno.

¹¹ Paratuon Mu rasam maawas am tana' ra rinadu' tinimugan; kinalami' mu tana' no ra rasam am makasauk ra tatanom tumuu' ra malabung.

¹² Sabap ra kinoonsoi Muno ampos ru tatanom mauli' kaga'! Ati ayuk pana ongoyon Muno, masalok malabaan ra akanon.

¹³ Limayak ra makasakot masuang kaga' bibiag tinambiag; ngaangai' bulur maansukan kaga'.

¹⁴ Umo-umo nososok ra kambing domba; kalampaman nososok ra gandum; ngaangai' no magitapap am marimbai maansukan.