MAZMUR 61 - Tanou Moonsoi Timugon

Pakiasian ra makisindung

¹ Ra tingganai ru santimungan maririmbai. Ondo' sumbayaan ra jitor. Mazmur ri Daut.

² Rongogo' noyo pampiawan kuno, iou Aki Kapuuno', rongogo' noyo pakiasian kuno!

³ Intor ra pagun ra maalur piawon Tokou, sabap ra kolondo' boo kalansanan. Ibito' aku no ra intok ondo' sindungan ra kalo makalalaa',

⁴ sabap ra Okou noyo sindungan kuno, am ampin maikang koson mangampin intor ra pantula'.

⁵ Polosoo' aku mayan ra kim Muno buoi ra aku maayag; maa' raginio mabayag aku ra saau ru kawo Muno.

⁶ Iou Aki Kapuuno', rinongog Mu bantu' kuno, am pataakon Mu raki' atan ondo' linonggom ru ulun ondo' mangurumat Rirun.

⁷ Kaawaro' noyo umur ru raja', gama' ru pamarintaan nano mantilayun intor ra anak ka anak.

⁸ Gama' ru sabuoi-buoi raja' no mamarinta ra saang Muno; iou Aki Kapuuno', sindungi' noyo raja' ralalom ru gagaya' am togom Muno.

⁹ Aku pana masalok marimbai ra rimbai pangamparan Rirun, am moonong orou aku manugut ra bantu' kuno.