MAZMUR 60 - Tanou Moonsoi Timugon

Pakiasian ra makiindangan

¹ Ra tingganai ru santimungan maririmbai. Sumugut ra rimbai: Bunga' Bakung noyo sasi'. Mazmur ru Raja' Daut,

² bulintok ra io nangayou ra ulun ru Aram-Misopotamia am ulun ru Aram-Joba, am bulintok ri Joab minuli' am namatoi ra 12,000 ngaulun ulun ru Idom giu' ra Limayak Maasin.

³ Iou Aki Kapuuno', inimpayan Mu akai am kinala Mu akai; siminangit Kou kaga' ramon, kaa' raino saguli' no ramon!

⁴ Ginonggon Mu tana' ti suku' nalapak; punaa' noyo nangapilang no sabap ra tana' ti mauyog.

⁵ Okou nangkinibit ra ulun Muno naimbolo' toojo, suku' akai kakasumpil koson ra nagauk.

⁶ Napakara' Kou ra ulun ondo' mangurumat Rirun, maa' raginio makalabus intor ra imbolo'.

⁷ Bayago' akai no ra kuasa' Muno; iowo' noyo pakiasian mai, maa' raginio ulun ondo' tagamin Muno maayag.

⁸ Intor ra inayanan Nano ondo' matulai, i Aki Kapuuno' minindagu, “Magilakup Aku am tatayaron Ku tana' ru Sikgim, am tayaron Ku Limayak Sukot no ra ulun Kuno.

⁹ I Giliad am i Manasi Aku ra longgom, i Ipraim pinakatupi' basi' Kuno, am i Jiuda pinakajujuga' ru namarintaan Kuno.

¹⁰ Kaa' i Moab intok pambaguan Kuno ayuk; pobobolon Ku kasut Kuno ri Idom, koson tatandu' ra i Idom longgom Kuno. Makapangkara' kia ulun ru Palistin ra magilakup ilo sabap ra nangala Raki'?”

¹¹ Osoi kia magibit raki' mongoi ra ralalom ru bandar ra makakubu no? Osoi kia magibit raki' mongoi ri Idom?

¹² Iou Aki Kapuuno', inimpayan Mu noyo kia akai? Kalo kia jumalai Kou mababaya' ra saujor maino?

¹³ Indangano' akai no gumula' ra pantula', sabap ra pangindanganan ru ulun kolondo' onong.

¹⁴ Mababaya' ri Aki Kapuuno', makasugut takau; Iono mangala ra pantula' takau.