MAZMUR 59 - Tanou Moonsoi Timugon

Pakiasian ra makisindung

¹ Ra tingganai ru santimungan maririmbai. Sumugut ra rimbai: Pai' pusoo'. Mazmur ri Daut, paat ra Raja' Saul nanusub ra ulun koson magilong ra baloi ri Daut koson mamatoi riso.

² Bayago' aku no intor ra pantula' kuno, iou Aki Kapuuno' kuno; sindungi' aku no intor ra ulun ondo' mongoi pangayou raki'!

³ Palabuso' aku no intor ra ulun malaat no; palabuso' aku no intor ra ulun-ulun mamamatoi no!

⁴ Ilai' ga magiginaa ilo mampatoi raki'; ulun mangalaat tumimung magawang raki'. Sabap no ra sala' ka aku makatula kapoam nambaal ra kasalaan,

⁵ sabap no ra sala' ka makasala aku, iou Tuhan, maringkaagou ilo tumampos mongoi pangayou.

⁶ Ingkakat no, iou Tuhan i Aki Kapuuno' Ondo' Maayo Kaga' Kuasa', am indangano' aku no; taligamai' ilai', iou Aki Kapuuno' ru Israil! Ingkakat am ukumi' ngaangai' bansa'; pai' pakaasi' ra ulun mangalaat ondo' manumbalik.

⁷ Bulintok ra palunggai' ra ilo minuli', maguang koson ra uku' paat lumiput ra bandar.

⁸ Rongogo' noyo pagasaban am lolob nilono. Ragu-ragu nilono malarom koson ra ilang; indoson nilo kolondo' ulun mangkirongog.

⁹ Kaa' Okou, iou Tuhan, masuatan risilo; mangiis Kou ra ngaangai' bansa'.

¹⁰ Malansan aku ra kaikangan Muno; iou Aki Kapuuno', Okou noyo sisindungan kuno.

¹¹ I Aki Kapuuno' kuno ondo' motogom raki' no matong raki'; pailongon No aku ra pantula' kuno maala.

¹² Pai' ilo potoyo', iou Aki Kapuuno', maa' raginio bansa' kuno kalo makalilian. Kuliagayo' pantula' no ra kuasa' Muno am kalaan ilo, iou Tuhan, manindung ramon.

¹³ Sabap ra natulaan ilo ru raguon nilono, polosoo' limbau nilono manguasa' risilo. Sabap ra magibot am magabau ilo,

¹⁴ imboloo' ilo bulintok ra Okou sumangit; imboloo' ilo ngaangai'. Ilo pana makapandai ra namarinta i Aki Kapuuno' ra Israil, am namarinta Io ra ngaangai' ulun ru tana' ti.

¹⁵ Bulintok ra palunggai' pantula'-pantula' kuno mamaguli', maguang koson ra uku' bulintok lumiput ra bandar.

¹⁶ Kumasisilot ilo maguyum ra akanon, am maguang ilo amon kalo maasug.

¹⁷ Kaa' marimbai aku pasal ra kinaikang Muno, moonong susuab ti marimbai aku ra bolos matangil pasal ra togom Muno. Okou noyo sisindungan kuno, sindungan paat ra aku makakapaganan.

¹⁸ Omporon Tokou, manunungka' kuno; i Aki Kapuuno' noyo sisindungan kuno, i Aki Kapuuno' noyo monogom raki'.