MAZMUR 56 - Tanou Moonsoi Timugon

Pangintapatan ri Aki Kapuuno' bulintok ra makakapaganan

¹ Ra tingganai ru santimungan maririmbai. Sumugut ra rimbai: Susuit Asang ra kalo naguta' minatong intor ra libung maalur. Mazmur ri Daut, paat ra ulun ru Palistin namparakop riso giu' ra Gat.

² Pakaasi' no raki', iou Aki Kapuuno' sabap ra aku binulunsar; pantula'-pantula' kuno mangimbolo' raki' ra moonong bulintok.

³ Monsongorou pantula' kuno mamulunsar raki'; masuang ulun gumula' raki'.

⁴ Paat ra aku malaa', iou Aki Kapuuno' Ondo' Maayo Kaga' Kuasa', lumansan aku Rirun.

⁵ Mangintopot aku ri Aki Kapuuno' am kalo malaa' aku; omporon ku Io sabap ra bantu' Nali. Atan kia maalap kabaal ru ulun no raki'?

⁶ Monsongorou pantula' kuno mantipagon raki'; masalok ilo mampaguang koson mangurana' raki'.

⁷ Mantitimung ilo ra intok pansibunian, am magilong ilo ra moonong aku mimbuor, liliwa' nilo maguyum ra kaluagan koson mamatoi raki'.

⁸ Ukumi' ilo, iou Aki Kapuuno' sabap ra kalaatan nilono, ralalom ru sangit Muno, pusoo' ilo!

⁹ Okou nakapandai mapara' labo ru guang kuno; nakapandai Kou mapara' suang ru lomou kuno. Sala ka kia nakatulis ngaangai' no ra kitab Muno?

¹⁰ Paat ra orou ra pampiawan kuno Rirun, pantula'-pantula' kuno lumukiat. Nakapandai aku ra i Aki Kapuuno' sumaung raki'.

¹¹ Mongompor aku ri Aki Kapuuno' sabap ra bantu' Nali.

¹² Mangintopot aku Riso am kalo malaa' aku. Atan kia maalap kabaal ru ulun no raki'?

¹³ Iou Aki Kapuuno', suguton ku bantu' kuli Rirun, mapataak aku taak simbalui paringkuanangan Rirun.

¹⁴ Binayag Mu aku intor ra kapatayan, am painggaluron Mu aku ra kalaan. Ginio ra, maayag aku ralalom sindungan ri Aki Kapuuno', ralalom ru sinda ondo' makatampulau ra ngaangai' ondo' maayag.