MAZMUR 51 - Tanou Moonsoi Timugon

Pakiasian ra makiampun

¹ Ra tingganai ru santimungan maririmbai. Mazmur ri Daut

² paat ra io sinawai ru Nabi Natan sabap ra nansawa' io ri Batsyiba.

³ Pakaasi' no raki', iou Aki Kapuuno', sabap ra togom Muno; pusoo' noyo tula kuno, sabap ra asi' Muno ramon maayo kaga'.

⁴ Bagui' aku no intor ra ngaangai' kalaatan kuno, am liungi' aku no intor ra tula kuno.

⁵ Iowon ku nasalaan kuno; masalok ku matutunan tula kuno.

⁶ Natulaan aku Rirun – Okou ayuk, am nambaal aku ra baal-baal ondo' karaan Mu ra malaat. Motopot nangakiman Muno raki'; natimpok noyo ra Okou nangukum raki'.

⁷ Malaat aku no intor poyo ra aku inanak; makatula aku no intor poyo ra aku tininai'.

⁸ Kasaga' Muno kabanisan ru guang; totopo' guang kuno ra kapintaran Muno.

⁹ Isasi' aku no, am masauk aku ra mapasau; bagui' aku no, am mapulak aku poyo intor ra gapas.

¹⁰ Polosoo' aku mangkirongog ra bolos kasagaan am kaansukan, maa' raginio guang kuno ra tutukon am umokon Muno, maansukan saguli'.

¹¹ Palikaro' bulos Muno intor ra tula kuno, am pusoo' noyo ngaangai' kalaatan kuno.

¹² Iou Aki Kapuuno', baalo' noyo guang mapasau raki', talimbagui' noyo guang kuno am aku pana mingkotog.

¹³ Pai' aku inggalari' ra ratangan Muno; pai' alapo' Ambiluo Matulai Muno intor raki'.

¹⁴ Bansuko' aku poyo sabap ra pamayagan Muli, am anii' aku ra guang koson gumagaya' Rirun.

¹⁵ Aku pana mangila' ra panusuban Muli ra ulun makatula, maa' raginio sumaguli' ilo Rirun.

¹⁶ Iou Aki Kapuuno' palabuso' aku intor ra kapatayan, am bayago' aku no, am ralalom bansuk ru guang kuno potonowon ku katimpakan Muno.

¹⁷ Indangano' aku mindagu, iou Tuhan, am omporon Tokou.

¹⁸ Kalo masaga' Kou ra taak simbalui ra pinataak; amon mapataak aku ra taak simbalui koson mapabansuk ra guang Muno, Okou pana kalo maansukan.

¹⁹ Taak kuno iono guang ra natutuk, iou Aki Kapuuno'; guang ondo' naumok am pansagulian, apuon Mu.

²⁰ Patalango' noyo kinoonsoi Muno ra Sion, iou Aki Kapuuno', baalo' saguli' timbok-timbok ru Jirusalim.

²¹ Okou pana maansukan ra taak ondo' maaya', am niayuk taak-taak simbalui ondo' sinolob mai; ra tampak ru altar Muno, sapi' gawayan pataakon mai.