MAZMUR 5 - Tanou Moonsoi Timugon

Pakiasian ra makiampin

¹ Ra tingganai ru santimungan maririmbai. Ondo' sumbayaan ru tulali. Mazmur ri Daut.

² Iou Tuhan iningo' noyo raguon kuno, iningo' noyo pagalabaan kuno.

³ I Aki Kapuuno' kuno, Raja' kuno, rongogo' noyo laa kuno am indangano' aku no. Makiasi' aku Rirun, iou Tuhan;

⁴ paat ra iosusuab mangkirongog Kou ra bolos kuno; paat ra mato ru orou sumirang pataakon ku pakiasian kuno, am magiginaa ra taam Muno.

⁵ Iou Aki Kapuuno', kalo masaga' Kou ra kalaatan; kalo kasagain Mu ulun malaat soroi ra saang Muno.

⁶ Kalo moorot Mu guang magilong ra ulun malilimbau; kasisangin Mu ngaangai' ulun malaat.

⁷ Pusoon Mu ngaangai' ulun magabau, am magasab ra ulun mamamatoi am mamparuung.

⁸ Kaa' intor ra kinaayo ru togom Muno, nakasubol aku ra baloi Muno. Makasamba aku Rirun ra ralalom ru Baloi Muno ra matulai, am migulatur ra tuma' Muno.

⁹ Iou Tuhan, masuang kaga' pantula' kuno; ilaa' aku mambaal ra kasagaan Muno, am tului' aku ra ralan ondo' musiti' no mauma' kuno.

¹⁰ Ngaangai' ragu ru pantula' kuno kalo maintopot; guangon nilono malaat kaga'; ngaangai' ragu nilono mangaamis am makabunduk ra guang, kaa' napanu' ra gogot malaat.

¹¹ Ukumi' noyo ilo, iou Aki Kapuuno'; polosoo' ilo malumaagan sabap ra ilo galama' nampaguang. Pagiruo' ilo no sabap ra tula nilono masuang kaga' am niayuk giminuor ilo no Rirun.

¹² Gama' ru ngaangai' ulun ondo' siminindung Rirun no maansukan; am sabubuoi no marimbai ra maansukan. Sindungi' noyo ilo ondo' monogom Rirun, maa' raginio maansukan ilo kaga' sabap ra Okou.

¹³ Barakaton Mu ilo ondo' gumagaya' Rirun no, iou Tuhan; togom Muno manindung risilo koson ra ampin.