MAZMUR 49 - Tanou Moonsoi Timugon

Papalo ayuk lumansan ra kalangkayaan

¹ Mazmur ru bansa' ri Kora. Ra tingganai santimungan maririmbai.

² Rongogo' noyo gitio, akau ngaangai' ulun. Rongogo' noyo, akau ngaangai' namagun ra tana' ti,

³ ulun ra nasuangan kapoam ulun ra nauligan kaga', ulun musikin kapoam langkaya'.

⁴ Mapasaboi aku ra ragu-ragu kapintaran, pangkaraan kuno nototop ra pangaratian.

⁵ Guangon kuno panginuuyan, am pabalaan kuno arati' nano liliwa' mangkayus ra jitor.

⁶ Kalo malaa' aku makauma' ra kapaganan, paat ra aku liniputan ru pantula',

⁷ ulun lumansan ra kinalangkayaan nilono, am marikamo ra rapu' nilono ra masuang.

⁸ Kolondo' sangulun pana makaigilabus ra io galama', kapoam mambayar ri Aki Kapuuno' ra logo ru papalabusan nano,

⁹ sabap ra logo papalabusan ra ulun no mologo kaga'; atan ondo' pabayaron nano kalo noyo makaukop

¹⁰ koson minggalur ra kapatayan, maa' raginio makaalap io ra kaayagan ra sabuoi-buoi no.

¹¹ Osoi pana nakapandai ra ulun mapintar no matoi; ulun sasambungon am ulun gigiison no pana matoi. Tatangon nilo ngaangai' rapu' nilono ra ulun bokon.

¹² Kalabangan masauk ra intok nilo mantilayun; giu' no ayanan nilo ra sabuoi-buoi no, kabalu' pana ragili makatana' ilo.

¹³ Kabalu' pana ulun no langkaya', koson niayuk ra bibiag, ilo pana mapandai matoi niayuk.

¹⁴ Ginio noyo nasip ru ulun ondo' mangintopot ra inan nilo galama', am nasip ru ulun ondo' maringkuanang ra linangkayaan nilo.

¹⁵ Koson ra domba, ilo inaru' ra potoyon, kapatayan no magagalung risilo. Ulun mabanis guang mampaala risilo, baangkai nilo mataki' mapasa'; pagun ru ulun minatoi masauk ra intok nilo.

¹⁶ Kaa' i Aki Kapuuno' mamayag raki'; mapalabus Io raki' intor ra kuasa' ru kapatayan.

¹⁷ Pai' pangusolon amon mokoondo' sanganuan ulun lumangkaya', amon ru rapu' nilono rumuang-ruang;

¹⁸ paat ra ilo matoi kolondo' atan-atan maibit nilo; rapu' nilono kalo makatibaya' ra ilo lobongon.

¹⁹ Kabalu' pana ilo maansukan ra kaayagan nilono, am omporon sabap ra kandoi nilo ra makaampos,

²⁰ makasunu' ilo niayuk ra kinamatuaan nilai, ondo' minayan ra intok molondom ra sabuoi-buoi no.

²¹ Kabalu' pana ulun lumangkaya', koson niayuk ra bibiag, ilo pana mapandai matoi niayuk.