MAZMUR 46 - Tanou Moonsoi Timugon

I Aki Kapuuno' mabaya' ritakau

¹ Mazmur ru bansa' ri Kora. Ra tingganai santimungan maririmbai. Ra rimbai ri Alamot.

² I Aki Kapuuno' sindungan am kaikangan takau; masalok Io masaga' mangindangan ritakau paat ra makakapaganan.

³ Ginio ra itakau kalo malaa', kabalu' pana tana' ti mogonggon am gunung-gunung maluyu' ra lonor ru raat;

⁴ kabalu' pana raat no mangulun am lumuab kinulun, am gunung mauyog toojo.

⁵ Mokoondo' santaun sungoi ondo' mapabansuk ra bandar ri Aki Kapuuno', intokon ri Aki Kapuuno' Ondo' Masawat Kaga'.

⁶ I Aki Kapuuno' minayan ra giu' no, bandar ra kalo pusoon; bulintok ra lakat poyo susuab, matong Io mangindangan riso.

⁷ Ngaangai' bansa' mangalaa', ngaangai' pamarintaan monontol; bulintok ri Aki Kapuuno' maningkalur, tana' ti pana magagai.

⁸ Tuhan Ondo' Maayo Kaga' Kuasa' mabaya' ritakau; i Aki Kapuuno' ri Jakub manindung ritakau.

⁹ Ibok, ilai' ga atan ondo' binaal ru Tuhan. Ilai' ga, binaal ri Aki Kapuuno' ra tana' ti makaimuag kaga'.

¹⁰ Pinolonggo' No pangayawan ra titikop ru tana' ti; pinandak No tanggayan ru panah, tanggulan am gagampin sinolob.

¹¹ Minindagu Io, “Langgai' noyo pangayawan, uligi' min noyo ra Aku ti i Aki Kapuuno', ondo' matulai intor ra ngaangai' bansa' am ra titikop ru tana' ti.”

¹² Tuhan Ondo' Maayo Kaga' Kuasa' mabaya' ritakau; i Aki Kapuuno' ri Jakub manindung ritakau.