MAZMUR 45 - Tanou Moonsoi Timugon

Rimbai paguguatan ru raja'

¹ Mazmur ru bansa' ri Kora. Rimbai ru togom. Ra tingganai santimungan maririmbai. Sumugut ra rimbai: Bunga' Bakung.

² Guang kutu napanu' ra ragu-ragu maamis bulintok ra aku nambaal ra rimbai pasukuon ra raja'; rila' kutu koson ayuk ra santaun pamamatik ru sangulun mamamatik ra sisindiron.

³ Okou noyo ulun maindon kaga' ra gino ngai' ru ulun, ragu-ragu muno napanu' ra kaansayan, ginio sabap ra okou binarakat ri Aki Kapuuno' ra sabuoi-buoi no.

⁴ Pooboto' ilang ra awak muno, okou raja' mapanggol, okou no raja' ra totopot uramaton am maatang kaga'!

⁵ Jalai no ralalom ru ikang tumingkuang ra kamanangan, koson sumaung ra atan ondo' motopot am katimpakan, ralalom kaikangan muno, gaawo' noyo kamanangan ra maayo.

⁶ Panah muno ondo' malarom marampus ra pusu' ru pantula'; ngaangai' bansa' maaba' ra kalayam muno.

⁷ Kuasa' pinataak rirun ri Aki Kapuuno' mantilayun ra sabuoi-buoi no. Namarintaan muno ra mamagun muno matimpok toojo.

⁸ Okou monogom ra baal-baal motopot am masisang ra baal-baal malaat. Ginio ra, i Aki Kapuuno', i Aki Kapuuno' muno nampili' rirun, am mapabansuk poyo rirun intor ra raja'-raja' ra bokon.

⁹ Bayang muno mokoowou ra mur, gaharu am cendana; pamiujik ru istana gading mapabansuk rirun.

¹⁰ Gino ngai' ru ralaa ru istana mokoondo' niayuk anak-anak ralaa ru raja', am tampilon ra pamiris ru panturungan muno paribigor andu' raja' ondo' nalimpor ra mas kopoyo.

¹¹ Rongogo' noyo ragu-ragu kutu, okou andu' raja', liliani' noyo bansa' am niayuk pabukat muno.

¹² Kinapasau muno nakabunduk ra guang ru raja', okou longgom ru raja', gagaya' no riso.

¹³ Ulun ru Tirus magibit ra tangguang pataakon rirun, ulun langkaya' kuminam pamunduk ra guang muno.

¹⁴ Mumpos anak ralaa ru raja' ra mantalur kaga', bayang nano binaal intor ra gantian mas.

¹⁵ Anak ralaa ru raja' pinambayang ra manguliat inibit paumaan ra raja', binaya' ru ralaa-ralaa ayuk poyo kaga', am niayuk inibit paumaan ra raja'.

¹⁶ Tinapapan ilo ra longon bulintok minumpos ra istana ru raja'.

¹⁷ Okou raja' kuno, makaanak kou ra masuang buayoi, koson mamparayus ra pamarintaan ru kinamatuaan mu, am saukon mu ilo mamarinta ra titikop ru tana' ti.

¹⁸ Rimbai kutu magibit ra inggalan muno sasabiton suku' ra angkupuan am kolondo' pupus, am ngaangai' bansa' mongompor rirun ra sabuoi-buoi no.