MAZMUR 44 - Tanou Moonsoi Timugon

Pakiasian ra makisindung

¹ Mazmur bansa' ri Kora. Sisindiron. Ra tingganai maririmbai.

² Iou Aki Kapuuno', akai galama' nokorongog ra tutunungon ru kinamatuaan maili, intor ra binaal Muli ra mangaayo intor ra galing i ayuk poyo.

³ Okou galama' nanginggalar ra ngaangai' bansa' maa' raginio ulun Muno mayan ra pagun nilo galama', inurana' Mu ngaangai' bansa' ra bokon, kaa' napasauk ra ulun Muno ra langkaya'.

⁴ Kalo maalap nilo kakuasa' pagun ti ra ilang; kalo mamanang ilo ra kuasa' nilo galama', kaa' ra kuasa' am kaikangan am niayuk ratangan Muno, sabap ra Okou mangiou ra ulun Muno.

⁵ Okou noyo Raja' kuno am i Aki Kapuuno' kuno; inanian Mu ulun Muno ra kamanangan.

⁶ Ralalom ru kuasa' Muno kinala mai pantula' maino, am kinuasa' mai ulun ondo' minongoi bulunsar ramon.

⁷ Kalo lansanin ku tanggayan ru panah kapoam ilang koson lumabus ra kapatayan,

⁸ sabap ra Okou noyo namayag ramon, am kinala Mu ilo ondo' masisang ramon.

⁹ Kalo langgain mai mongompor Rirun am maringkuanang Rirun ra sabuoi-buoi no.

¹⁰ Kaa' raino, iou Aki Kapuuno', tinatang Mu akai am polosoon Mu akai kalaan; kalo boo jumalai Kou mababaya' ra saujor mai.

¹¹ Sinauk Mu akai nagiru' intor ra pantula', am ginaau nilo ngaangai' kuliamos maili.

¹² Polosoon Mu akai simbaluyon koson ra domba, pinantutuliar Mu akai ra pagun suai.

¹³ Tinalan Mu ulun Muno ra atang kalo mologo, ra kalo mangalap ra sanganu pana kaulian.

¹⁴ Sinauk Mu akai ra asasabin ru sambalayan mai; manauyu' ilo am makakurit ramon.

¹⁵ Sinauk Mu akai ra asasabin ru ngaangai' bansa'; sapisik-pisik ilo ayuk am mangalimut ramon.

¹⁶ Monsongorou aku asabin, am mauyu' boo pangkaraan,

¹⁷ sabap ra mangining ra pangiisan am pagasaban ondo' paingkualon ru pantula' am ilo ondo' masisang.

¹⁸ Ngaangai' no lumumpa' ramon kabalu' pana akai kalo makalilian Rirun, kapoam lumungkang ra nabantuan Muli ramon.

¹⁹ Kalo igondo' akai gabu' Rirun; kalo igondo' mai anggalo' panusuban Muli.

²⁰ Kaa' nanatang Kou ramon ondo' kolondo' lulu' ra bibiag masigo; nanatang Kou ramon ralalom molondom mapiot.

²¹ Amon langgain mai sumamba ri Aki Kapuuno' mai, am sumamba ra tuhan ra bokon,

²² magu' mapandayan Mu, sabap ra Okou makapandai ra suang ru guang ru ulun.

²³ Sabap no Okou, moonong orou akai ilalaanon, pamakuan nilo ramon koson ra domba ra simbaluyon.

²⁴ Tirong no, iou Tuhan! Kua kia pombolong Kou? Luat no! Pai' akai impayi' ra sabuoi-buoi no!

²⁵ Kua kia pansibuni Kou? Pai' liliani' kaimbalaan am kapaganan maiti;

²⁶ Naratu' akai natutuk ra tana', am nakalangan ra kaau sabap ra naala.

²⁷ Luat no am indangano' akai! Sabap ra togom Muno, bayago' akai!