MAZMUR 40 - Tanou Moonsoi Timugon

Pakiasian ra paringkuanangan

¹ Ra tingganai ru santimungan maririmbai. Mazmur ri Daut.

² Ralalom orot ru guang, maginaa aku ra Tuhan mangindangan, am magilong Io raki' am mangkirongog ra piau kuno.

³ Binunduk No aku intor ra luang ondo' makalalaa', intor ra luogon molosok. Pinatampak No aku ra batu saboi tumpang kuno maikang.

⁴ Ilaan No aku marimbai ra rimbai nakabagu, rimbai mongompor ri Aki Kapuuno' takau. Masuang ulun malaa' magilong ra baal ragitio am mangintopot ra Tuhan.

⁵ Pakaansuk kano ulun ondo' mangintopot ra Tuhan, ulun ondo' kalo sumamba ra sinungkalalaing kapoam maya' risilo ondo' sumamba ra dewa.

⁶ Nansalinut binaal Muno ramon, iou Tuhan, i Aki Kapuuno' kuno, kolondo' pogondo' Muno! Masuang inatangan ra moonsoi binaal Muno ramon, ngaangai' no kalo lair maalap ku katunung.

⁷ Kalo masaga' Kou ra taak simbalui am niayuk taak; kalo makitaak Kou ra taak simbalui koson mapabansuk ra guang Muno, am taak simbalui koson mamuso ra tula. Kaa' nanaak Kou raki' ra talingo ondo' mokorongog ra ragu Muno.

⁸ Ginio sabap ra aku tumaam, “Gitio aku ti; panusuban Muno raki' natulisan ralalom ru kitab ru Ukum.

⁹ Masaga' aku mambaal ra kasagaan Muno, iou Aki Kapuuno' kuno! Ngaangai' ru pangilaan Muno pinauli ku ra guang kuno.”

¹⁰ Ralalom pantimungan ru ulun Muno tunungon kuno tanou moonsoi ra Okou namayag ramon. Kalo langgain ku tunung kuno. Iou Tuhan, ngaangai' no napandayan Mu noyo.

¹¹ Kalo buliin ku tanou pamayagan raginio ralalom ru guang, masalok aku mantunung ra indangan am gagaya' Muno. Ralalom pantitimungan ru ulun Muno, kalo igondo' aku pongkoror intor ru gagaya' am togom Muno.

¹² Iou Tuhan, pai' langgai' makaasi' raki', alungi' aku no ralalom togom am gagaya' Muno.

Pakiasian ra makiindangan

¹³ Liniputan aku ru kapaganan, suang no kalo mauntob. Ngaangai' ru tula kuno mangilou raki', saboi kalo makakito aku. Kinasuang no nakasail poyo ra abuk ra ulu kuno, am liminawo aku boo.

¹⁴ Iou Tuhan, bayago' aku no! Iou Tuhan, kataki' noyo pangindanganan Muno raki'!

¹⁵ Polosoo' noyo ilo ondo' mangkinam pamatoi raki' kalaan am jojowon. Polosoo' ilo ondo' maansukan magilong ra kapaganan kuno, lumungkang am tauyuon.

¹⁶ Polosoo' noyo ilo ondo' magasab raki' maliangan am mauyu' sabap ra ilo naala.

¹⁷ Gama' ru ngaangai' ulun ondo' rumatong Rirun maansukan am maantak guang! Gama' ru maringkuanang ilo ra pamayagan Muno masalok mindagu, “Matulai kaga' Tuhan no!”

¹⁸ Malawo aku am kolondo' lulu'; kaa' Okou, iou Tuhan, makakara' raki'. Okou noyo mangingindangan am mamamayag raki'; katakio' noyo pangindanganan raki', iou Aki Kapuuno' kuno!