MAZMUR 39 - Tanou Moonsoi Timugon

Nangiawan ru ulun naimbolo'

¹ Ra tingganai santimungan maririmbai. Mazmur ri Daut. Pataakon ri Jidutun.

² Mindagu aku, “Ilalain ku ayuk atan ondo' baalon kuno, am kalo mambaal ra tula intor ra rila' kuno. Kolondo' atan-atan raguon kuno buoi ru ulun malaat sumoroi ra kiing kuno.”

³ Kalinuos kuno ayuk mangindangan, kolondo' sanganu pana ragu, kabalu' pana baal ra moonsoi. Kaa' imbolo' kuno rumuang bagat no,

⁴ am guang kuno magalabo kaga'. Gumaai ra aku mangkara', gumaai pagon ru guang kuno; am mangkuot aku,

⁵ “Iou Tuhan, balai' aku ra orou patayan kuno maa' raginio mapandayan ku mapara' riwa' ru bayag kuno.”

⁶ Mapara' piboo kinariwa' ru umur kuno inaru' Mu! Ra Okou, buoi ru bayag kuno kolondo' onong-onong. Sotopot no kaayagan ru moonong ulun koson ra kaabusan maminawo,

⁷ kaayagan nilo mansail koson ra babara'. Ngaangai' ru baalon nilono kolondo' onong; mangumung ilo ra rapu', kaa' kalo napandayan nilo osoi manungkus no.

⁸ Atan kia nua' malansanan kuno, iou Tuhan? Malansan aku Rirun.

⁹ Palabuso' aku intor ra nansalinut tula kuno, am pai' aku polosoo' iison ru ulun sasambungon.

¹⁰ Mongkoror aku am kalo gaalon ku kabang, sabap ra gini noyo binaal Muni.

¹¹ Pai' aku noyo boo ukumi', mamaar aku no matoi ra lamba' Muno.

¹² Inukum Mu tula ru ulun ra sawai Muno, am koson ra anai, namuso Kou ra kasagaan nilo. Sotopot no kaayagan ru moonong ulun koson ayuk ra mapaabus ra paminawaan ayuk.

¹³ Rongogo' noyo pakiasian kutu, iou Tuhan, am apuo' noyo pakimasian kuno, pai' noyo pongkoror paat ra aku mantangi'. Masauk aku ra tambului Muno kaa' sangkinolor ayuk, koson ra kinamatuaan kuli.

¹⁴ Polosoo' aku no maa' raginio makaalap aku ra kaansukan, ra aku kalo poyo matoi am kalio boo.