MAZMUR 38 - Tanou Moonsoi Timugon

Pakiasian ru ulun naimbolo'

¹ Mazmur ri Daut, paat mapataak ra taak simbalui pangkaraan.

² Iou Tuhan, pai' aku ukumi' kabalu' pana ra sumangit Kou.

³ Panah Muno namilat ra inan kuno; kalindu' Muno namalamba' raki'.

⁴ Sabap ra sangit Muno narualan malanjag aku; sabap ra tula kuno ngaangai' ru inan kuno mangaruol.

⁵ Nolosor aku ra liur ru tula kuno; tula kuno maagat kaga' raki'.

⁶ Sabap ra binaal kuno ra kolondo' onong, pipilat kuno nampunana' am mootong.

⁷ Nakakuung am nakatungaap aku; monsongorou aku mangiluk guang.

⁸ Salom monolob ra inan kuno, am marualan malanjag aku.

⁹ Natutuk aku am kolondo' lulu'; mampalaa aku sabap ra guang mangiluk.

¹⁰ Iou Tuhan, mapandayan Mu gogot ru guang kuno; iningon Mu ngaangai' laa kuno.

¹¹ Pusu' kuno mimbuor, am kolondo' lulu' kuno, am mato kuno majapul.

¹² Rangan am sambalayan kuno kalo boo minggaar sabap ra ruruko kuno; pongkotob kuno pana minggalur intor raki'.

¹³ Ulun ondo' mamatoi raki' mapataan ra jajaling no raki', am ilo ondo' maninduol raki' mindagu koson mamatoi raki'; monsongorou ilo maguguum koson tumula' raki'.

¹⁴ Koson aku ra ulun barat ondo' kalo makaining, Koson ra bungangang ondo' kalo makaindagu.

¹⁵ Koson aku ra ulun ondo' kalo tumaam, sabap ra kalo makaining.

¹⁶ Kaa' malansan aku Rirun, iou Tuhan; am Okou, iou Tuhan, i Aki Kapuuno' kuno, mangiou ra pakiasian kuno.

¹⁷ Pai' polosoo' pantula' kuno makakurit ra kaimbalaan kuno; pai' ilo polosoo' maansukan ra aku naratu'!

¹⁸ Mamaar aku po karatu', am magail ayuk marualan.

¹⁹ Iowon ku tula kuno; magalabo guang kuno ra nasalaan kuno.

²⁰ Ngaangai' pantula' mangaligag am mangaikang; masuang ulun masisang raki' ra kolondo' sasaban.

²¹ Baal ra moonsoi no balasin nilo ra kalaatan, tumula' raki' ra aku gumogot mambaal ra motopot.

²² Pai' aku tatango', iou Tuhan, pai' aku inggaluri', iou Aki Kapuuno' kuno!

²³ Indangano' aku no raino, iou Tuhan mamamayag kuno!