MAZMUR 35 - Tanou Moonsoi Timugon

Pakiasian ra makiindangan

¹ Mazmur ri Daut. Tuhan, anggalo' noyo ulun ondo' tumula' raki', am anggalo' noyo ulun ondo' mangayou raki'.

² Tanggal ra gagampin am bayango' bayang basi' Muno, luat no am indangano' aku.

³ Tanggalo' tutura' am tanggulan Muno koson mampagula' ra ulun-ulun ondo' mangilou raki'. Indagu ra Okou noyo mamamayag raki'.

⁴ Polosoon ilono ondo' mangkinam pamatoi raki' kinala am tinauyu'. Polosoon ilono ondo' naguguum koson tumula' raki' lumungkang am maubong.

⁵ Polosoon ilo masauk koson ra apol makuliagai masampui ru angin, paat ra malaikat ru Tuhan mangilou risilo.

⁶ Polosoon noyo ralan nilono molondom am malamog, paat ra malaikat ru Tuhan mangilou risilo.

⁷ Kolondo' naayatan ra mantaan ilo ra jajaling koson pamparakop raki' am mangkali ilo ra luang malandom koson pamparakop raki'.

⁸ Polosoon ilo malumpa' ru kapusaan ra kalo maiman-iman, am makasulung ra jajaling nilo galama' maratu' boo am mapuso.

⁹ Aku pana maansukan sabap ra Tuhan; maringkuanang aku sabap ra Tuhan namayag raki'.

¹⁰ Mabaya' ra sotopot-topot ru guang mindagu aku ra Tuhan, “Kolondo' gumondo' Rirun. Pinalabus Mu ulun lamumu' intor ra ulun maikang, ulun musikin am naimbolo' intor ra nangimbolo' risilo no.”

¹¹ Sasi'-sasi' ra mangalaat nanguu' raki', sabap ra baal ondo' kalo natutunan kuno.

¹² Baal-baal ra moonsoi balasin nilo ra kalaatan, am malawo guang kuno.

¹³ Paat ra ilo mangkarualan, mangiluk guang kuno am kalo mangakan aku; kumuku' aku am makiasi',

¹⁴ koson pakiasian ra sangulun rangan kapoam pabukat. Kumuku' aku sabap ra guang mangiluk, koson ra tangi' ru sangulun ondo' pinatayan ra ina' nano.

¹⁵ Kaa' paat ra aku makakapaganan, maansukan ilo ngaangai' am libungin aku liliwa' nilo magasab raki'; ulun ondo' kalo nauligan kuno rayusin no lamba' no raki'.

¹⁶ Koson ra ulun ondo' mangiis ra ulun kalo makalulu', masisang ilo magilong raki'.

¹⁷ Kula' poyo buoi no, iou Tuhan, Okou mopoloso ra babaal koson ragitio? Bayago' aku no intor ra bulunsar nilo raki'; palabuso' aku no intor ra singa'-singa' no!

¹⁸ Aku pana maringkuanang Rirun ralalom pantimungan ru ulun Muno, mongompor aku Rirun ralalom pantuuman nilono.

¹⁹ Pai' polosoo' pantula' ra maabau-abau no, ondo' magasab ra naalaan kuno! Pai' polosoo' ulun ondo' masisang raki' ra kolondo' sasaban, maansukan ra kangilukan kuno!

²⁰ Kalo manangguang ilo ra mindagu; kaa', manimbaal ilo ra ulun ondo' monogom ra pababansayan.

²¹ Sogogolok ilo ayuk manguu' raki', “Nakito mai binaal muno!”

²² Kaa' Okou, iou Tuhan, nakapandai ra baal ragitio. Sabap raginio, pai' nokon pongkoror, pai' no inggalur!

²³ Sukal no, iou Tuhan, saungo' aku no; luat no, iou Aki Kapuuno' kuno, am indangano' aku no.

²⁴ Saungo' aku no sabap ra Okou noyo matimpok, iou Tuhan, pai' polosoo' pantula' kuno makakurit raki'.

²⁵ Pai' polosoo' ilo magigindagu galama', “Ginio noyo kasaga' mai ra buoi ti!” Pai' ilo polosoo' mindagu, “Naala mai io!”

²⁶ Polosoon noyo ulun ondo' maansayan magilong ra aku naimbolo' masauk ilo ra maubong am mauyu'. Polosoon noyo ulun lumimbau no pansagulian guang am mauyu'.

²⁷ Gama' ru ulun gumogot magilong ra aku saukon ra motopot, magitapap maansukan am ruruli' mindagu, “Tuhan no matulai kaga'; maansukan Io magilong ra linangkayaan ru ulipon Nano!”

²⁸ Aku pana mampatanou ra katimpakan Muno, am monsongorou aku mongompor Rirun.