MAZMUR 33 - Tanou Moonsoi Timugon

Layuk ra mongompor

¹ Akau ulun ra motopot, pagilakup no ra maansukan sabap ra atan ondo' binaal ru Tuhan; omporo' noyo Io, akau ngaangai' ulun ondo' gumagaya' Riso!

² Paringkuanang kano ra Tuhan no sumbayaan ra jitor, paririmbai kano ondo' sumbayaan ru jitor.

³ Rimbayi' min Tuhan no ra rimbai nakabagu, tandaa' min kayus ra jitor, am parimbai no ra bolos mapuor!

⁴ Bala' ru Tuhan no motopot, am ngaangai' ru binaal Nano maintopot.

⁵ Tuhan monogom ra kabanisan ru guang am katimpakan; titikop ru tana' ti natikop ra togom Nano.

⁶ Intor ra kuasa' ru Tuhan no sinauk No limbowon, mato ru orou, bulan am butitin sinauk sumugut ra bala' Nano.

⁷ Tinimung No timug ru raat ra rondo' intok; inompong No tatanga' ru raat no ralalom rondo' bokok.

⁸ Kalaa' kano ra Tuhan, titikop libung ru tana' ti! Urumato' noyo Io, akau ngaangai' mamagun ra tana' ti!

⁹ Bulintok ra Io mindagu, tana' ti nasauk; intor ra ragu Nano, ngaangai' no sinauk.

¹⁰ Inatangan ru bansa'-bansa' ampangin ru Tuhan; pinuso no atan ondo' gogoton nilono.

¹¹ Kaa' inatangan ru Tuhan matanduusan ra sabuoi-buoi no, am sukuon Nano kolondo' pupus.

¹² Pakaansuk noyo bansa' ondo' mangiou ra Tuhan noyo i Aki Kapuuno' no; pakaansuk noyo bansa' ondo' pinili' koson ra longgom Nano!

¹³ Manginduku' Tuhan intor ra suruga', am magilong ra ngaangai' ulun.

¹⁴ Intor ra panturungan Nano urioon No ngaangai' ondo' minayan ra tana' ti.

¹⁵ Io noyo nambaal ra guang nilono, am makapandai ra nansalinut baalon nilono.

¹⁶ Namanang raja' sala' ka intor ra saujor nano masuang, namanang saujor sala' ka intor ru ikang.

¹⁷ Kuda kalo malansanan koson mamanang ra mongoi pangayou; kaikangan ru kuda kalo makabayag.

¹⁸ Ilo ondo' gumagaya' ilain ru Tuhan, malansan ilo ra katagaman Nano.

¹⁹ Pinalabus No ilo intor ra kapatayan; Io magalung ra painawo nilono bulintok ra ilo maitilan.

²⁰ Malansan takau ra Tuhan; Io noyo mangingindangan am manindung ritakau.

²¹ Io magibit ritakau ra maansukan; mangintopot takau ra inggalan Nano ondo' matulai.

²² Gama' ru togom Muno mabaya' ramon, iou Tuhan, sabap ra malansan akai Rirun.