MAZMUR 32 - Tanou Moonsoi Timugon

Nangiawan am nangampunan

¹ Mazmur ri Daut. Sisindiron. Pakaansuk noyo ulun ondo' tula nilono inampun noyo, ondo' kasalaan nilono inampun noyo.

² Pakaansuk noyo ulun ondo' kalo inuwan ru Tuhan sabap ra kalaatan nilono, am ondo' kalo masaga' mamparuung.

³ Paat ra aku kalo mangiou ra tula kuno, naagui aku sabap ra nonsongorou ra tangi'.

⁴ Orou rondom inukum Mu aku, iou Tuhan; kolondo' boo lulu' kuno koson ra bolobou napua' ra lasu' ru mato ru orou.

⁵ Iowon ku boo tula kuno Rirun; kalo alion ku nasalaan ondo' binaal kuli. Nalantas noyo guang kuno koson mangiou ra tula kuli Rirun, am ampunon Mu ngaangai' nasalaan kuno.

⁶ Ginio ra ngaangai' ulun ondo' gumagaya' musiti' no makiasi' Rirun paat ra makakapaganan; amon ru rosob sumuku', kalo maabas ilo.

⁷ Okou intok kuno mansibuni, Okou namayag raki' intor ra kapaganan. Magilakup aku mongompor Rirun, sabap ra namayag am nanindung Kou raki'.

⁸ Tuhan minindagu, “Tuluin Tokou ra ralan ondo' musiti' kiralanon muno. Ilaan am pinsanin Tokou.

⁹ Pai' sasambungon koson ra kuda kapoam baghal, ondo' butatanin ra kalat am kakangin koson mangimaya' ra ralaaton.”

¹⁰ Ulun malaat makatuum ra kapaganan, kaa' ulun ondo' lumansan ra Tuhan sindungin ru togom Nano.

¹¹ Pakaansuk kano, akau ulun ra motopot, sabap ra ngaangai' ondo' binaal ru Tuhan. Pagilakup am pakaansuk no, akau ngaangai' ulun mabanis guang.