MAZMUR 30 - Tanou Moonsoi Timugon

Pakiasian ra maringkuanang

¹ Mazmur ri Daut. Rimbayon bulintok mokoondo' Baloi ru Tuhan patimpokon.

² Mongompor aku Rirun, iou Tuhan, sabap ra Okou namayag raki' am kalo mopoloso ra pantula' kuno mangiis raki'.

³ Mampiau aku Rirun ra makiindangan, iou Tuhan, i Aki Kapuuno' kuno, am Okou namabas raki'.

⁴ Mansawai Kou raki' mongoi ra kapatayan, am napalabus raki' intor ra intokon ru ngaangai' ulun ondo' namagatoi.

⁵ Rimbayo' pangamparan ra Tuhan, akau ulun Nano ondo' gumagaya'! Karaa' noyo atan ondo' binaal ru Io Ondo' Matulai Kaga' am maringkuanang Riso!

⁶ Sangit Nano sangkinolor ayuk, kaa' bonsoi Nano saboi ru painawo. Lomou magu' tumilis paat ra molondom, kaa' tumawang magibit ra kaansukan.

⁷ Bulintok ra naayag, mindagu aku, “Kalo maala aku risilo.”

⁸ Moonsoi Kou kaga' raki', iou Tuhan; koson ra gunung ondo' mapiot manindung raki'. Kaa' bulintok ra Okou mansibuni intor raki', malaa' malimanan kuno.

⁹ Mampiau aku Rirun, iou Tuhan; makiindangan aku,

¹⁰ “Atan kia ampos maalap Mu intor ra kapatayan kuno? Am najaya' Kou kia amon ru sumubol aku ra luang ru lobong? Mokoondo' kia ulun namagatoi mongompor Rirun? Makapapatanou kia ra gagaya' Muno?

¹¹ Rongogo' aku no, iou Tuhan, am pakaasi' no raki'. Tuhan indangano' aku!”

¹² Pantangian ru guang kuno kinulau Mu masauk ra ligo' kaansukan; inalap Mu ulir kuno am pinasuali Mu kaansukan.

¹³ Aku pana kalo mongkoror; marimbai aku ra rimbai pangamparan Rirun. Iou Tuhan, Okou noyo i Aki Kapuuno' kuno, maringkuanang aku Rirun ra sabuoi-buoi no.