MAZMUR 3 - Tanou Moonsoi Timugon

Pakiasian ra orou susuab ti koson makiindangan

¹ Mazmur ru Raja' Daut paat ra io nagiru' intor ri Absalom, buayoi nano.

² Iou Tuhan, mapara' suang ru pantula' kutu, masuang kaga' ulun manggal raki'!

³ Mangalimut ilo am mindagu, “Kalo mangindangan i Aki Kapuuno' riso!”

⁴ Kaa' Okou, iou Tuhan, ampin noyo ondo' manindung raki'. Manaak Kou raki' ra kamanangan am mapasaguli' ra ambiluo kuno.

⁵ Mampiau aku ra Tuhan koson makiindangan, am intor ra bulur Nano ondo' matulai, taamon No aku.

⁶ Miluluya' aku, am pakalunus, am sorondom Tuhan manindung raki'.

⁷ Kalo malaa' aku ra riribu pantula' ondo' liminiput manguyung raki' ra moonong angayan.

⁸ Bayago' aku no, iou Tuhan, i Aki Kapuuno' kuno, ukumi' noyo am ngaangai' ru pantula' kuno sauko' ra lamumu'.

⁹ Tuhan noyo manaak ra kamanangan, gama' ru barakaton No ulun ra mangintopot Riso no.