MAZMUR 29 - Tanou Moonsoi Timugon

Bolos ru Tuhan ralalom ru bagiu' mapuor

¹ Mazmur ri Daut. Pongompor kano ra Tuhan, akau namagun ra suruga'; omporo' katulayan am kuasa' Nano.

² Pongompor kano ra inggalan ru Tuhan ondo' matulai, igulatur no ra saang ru Io Ondo' Matulai Kaga' amon ru papulusat Io.

³ I Aki Kapuuno' ondo' matulai maningkalur ra rasawat ru raat; bolos ru Tuhan mamintanou ra titikop ru raat malandom.

⁴ Bolos ru Tuhan maining ondo' natikop ra kuasa' am katulayan.

⁵ Bolos ru Tuhan namandak ra puun-puun ru sidar, am niayuk puun-puun ru sidar giu' ra Libanon.

⁶ Io nangkinibit ra ngaangai' gunung ru Libanon satutulindak koson ra anak ru sapi' malaa', am Gunung Girmon sumimpuau koson ra sapi' gawayan mamulok monontol.

⁷ Bolos ru Tuhan mambaal ra bilak ru ganit.

⁸ Bolos Nano nambaal ra tana' kaagisan mauyog; uyoyogon No tana' kaagisan ru Kadis.

⁹ Bolos ru Tuhan manguyog ra ngaangai' puun berangan, am niayuk mampatutu' ra ngaangai' raun ra kataunan; liliwa' giu' ra Baloi ru Tuhan ulun magigindii, “Ompor ri Aki Kapuuno'!”

¹⁰ Mamarinta Tuhan ra raat ondo' malandom; mamarinta Io koson ra raja' ra sabuoi-buoi no.

¹¹ Kaikangon ru Tuhan ulun Nano, am barakaton No ilo ra ralalom ru kaansayan.