MAZMUR 26 - Tanou Moonsoi Timugon

Pakiasian ru ulun ondo' kolondo' sala

¹ Mazmur ri Daut. Anii' aku ra katimpakan, iou Tuhan, sabap ra nambaal aku ra motopot, am mangintopot aku toojo Rirun ralalom ru guang kuno.

² Pangimumui no raki', iou Tuhan, am kinami' aku no, imonolo' toojo guangon kuno am pangkaraan kuno.

³ Masalok aku mangkara' ra togom Muno; am totopot gumagaya' Rirun.

⁴ Kalo lumatok aku ra ulun kolondo' onong; kalo makimangkubayau aku ra ulun ondo' kalo topot-topot.

⁵ Masisang aku lumatok ra ulun malaat, am minggalur aku intor ra ulun mangalaat.

⁶ Iou Tuhan, mambagu' aku ra kalindu' tatandu' ra aku kolondo' sala, am lumiput aku ra altar Muno koson sumamba Rirun.

⁷ Marimbai aku ra rondo' mazmur am potonowon ku nansalinut binaal Muli ondo' makaimuag no.

⁸ Iou Tuhan, tagamin ku baloi ayanan Muno, intok ondo' natikop ra katulayan Muno.

⁹ Pai' aku pusoo' mababaya' ra ulun ondo' makatula; sindungi' aku intor ra ulun mamamatoi,

¹⁰ ioginio ulun ondo' masalok mambaal ra kalaatan am masalok mangapu ra ruit pangambi'.

¹¹ Kaa' maayag aku ra mabanis guang; pakaasi' no am bayago' aku no.

¹² Naayag aku intor ra nansalinut makalalaa'; mongompor aku ra Tuhan ralalom pantimungan ru ulun Nano.