MAZMUR 24 - Tanou Moonsoi Timugon

Raja' ondo' urumaton

¹ Mazmur ri Daut. Tana' ti am ngaangai' suang no longgom ru Tuhan; pagun ti am ngaangai' minayan no Io ra longgom.

² Mambaal Io ra pagun ti ralimbou ru timug, am patampakon no alu nano ra raat ondo' malandom am malangka'.

³ Osoi kia makakau' magaloi ra bulur ru Tuhan am sumubol ra Baloi Nano ra matulai?

⁴ Ulun ondo' mabanis pampaguangan am moonsoi pangkaraan, ondo' kalo sumamba ra sinungkalalaing, kapoam mambaal ra bantu' ra magabau.

⁵ Ilo noyo barakaton am bayagon ru Tuhan, am i Aki Kapuuno' nangaru' ra ilo kolondo' sala.

⁶ Ulun koson raginio noyo matong muma' ri Aki Kapuuno', ilo noyo matong sumamba ra Aki Kapuuno' ri Jakub no.

⁷ Ukabo' noyo kapilaa' kulobon ru garabang lair, Raja' ra matulai no sumubol!

⁸ Osoi kia Raja' ra matulai no? Io noyo Tuhan ondo' mapanggol kaga', Tuhan ondo' natikop ra kuasa', ondo' namanang ra pangayawan.

⁹ Ukabo' noyo kapilaa' kulobon ru garabang lair, Raja' ra matulai no sumubol!

¹⁰ Osoi kia Raja' ra matulai no? Tuhan Ondo' Maayo Kaga' Kuasa', Io noyo Raja' ondo' matulai!