MAZMUR 21 - Tanou Moonsoi Timugon

Pangamparan ra namanangan

¹ Ra tingganai ru santimungan maririmbai. Mazmur ri Daut.

² Maansukan raja', iou Tuhan, ra Okou napaikang ra raja'; maansukan raja' ra namanangan ondo' pinataak Muno riso.

³ Sinugut Mu atan ondo' gogoton nano; iniou Mu atan ondo' kinitaak nali.

⁴ Minatong Kou riso am napataak Kou ra barakat ondo' mauli', am pinasampak Mu karaun mas ra ulu nano.

⁵ Makitaak raja' ra bayag, am inanian Mu io ra bayag, am niayuk umur ra maawar ra sabuoi-buoi no.

⁶ Pangurumatan riso no maayo sabap ra Okou nangindangan riso; raja' no sinauk Mu ra mauligan toojo ra titikop ru tana' ti am kolondo' mokogondo' ra kuasa' nano.

⁷ Barakat Muno riso kolondo' pupus, am rinatangan Muno mapabansuk toojo ra guang ru raja'.

⁸ Malansan raja' no ra Tuhan Ondo' Matulai Kaga'; raja' no masalok maayag sabap ra Tuhan magail motogom riso.

⁹ Ngaangai' pantula' nano rokopon ru raja' no; rokopon ru raja' no ngaangai' ulun ondo' masisang riso.

¹⁰ Rumatong raja' koson ra apui bibilak koson mamuso risilo. Imboloon ilo ru Tuhan paat ra Io sumangit, am apui no mangumpo risilo.

¹¹ Ngaangai' anak nilono potoyon ru raja' no, am pusoon no ngaangai' papag nilono.

¹² Mampaguang ilo koson mamparatu' ra raja' no, kaa' kalo makaanggal ilo.

¹³ Pabakison ru raja' no panah nano patingkuangon risilo, am mangkinibit ra ilo maruli' koson kalo makasansal.

¹⁴ Mongompor akai Rirun, iou Tuhan, sabap ra maayo kaga' kuasa' Muno! Marimbai akai koson mongompor ra katulayan Muno.