MAZMUR 147 - Tanou Moonsoi Timugon

Pangamparan ri Aki Kapuuno' Ondo' Maayo Kaga' Kuasa'

¹ Omporo' noyo Tuhan! Moonsoi noyo ra rimbayin takau i Aki Kapuuno' takano ra rimbai pangamparan; moonsoi noyo am maaya' ra itakau mongompor Riso.

² Tuhan napatapuli' ra Jirusalim; Ibiton No ulun ru Israil sumaguli' intor ra namatiran.

³ Namali' Io ra guang ru ulun ondo' nagagai guang, am tinapisan No pilat nilono.

⁴ Inaru' No noyo kinasuang ru butitin no, am moonong butitin ininggalanan No.

⁵ Mapara' piboo kinatulai am kinaikang ru Tuhan takau, kinapintar Nano kolondo' polos.

⁶ Ulun ra inimbolo' no inanian No ra kuasa', kaa' ulun malaat no pinapatir No ra tana'.

⁷ Rimbayi' min Tuhan no ra rimbai pangamparan, am kayusi' min i Aki Kapuuno' takano ra jitor.

⁸ Pinabingkal No gaun ra limbowon; pinatuun No rasam ra tana' ti, am napatuu' ra sakot giu' ra bulur.

⁹ Pakanon no bibiag, am gogol ru susuit bangkaak ondo' pasapios.

¹⁰ Kalo masaga' Io ra kuda maikang, kapoam saujor ra baani;

¹¹ kaa' maansayan Io ra ulun ondo' mangurumat Riso, ulun ondo' malansan toojo ra togom mantilayun Nano.

¹² Omporo' noyo Tuhan, okou Jirusalim! Omporo' noyo i Aki Kapuuno' Muno, okou Sion!

¹³ Pioton No kulobon garabang Muno; mambarakat Io ra ulun Nano.

¹⁴ Magalung Io ra kaansayan ru pagun muno am basugon kou ra gandum ra moonsoi kaga'.

¹⁵ Manusub Io ra tana' ti, am ragu Nano suguton ra mataki'.

¹⁶ Paratuon No ais koson ra gapas, am patiason No bolobou ra kiminotog koson ra kaau.

¹⁷ Paratuon No rasam batu koson ra batu malumot; kolondo' sangulun pana mokoorot ra simu' no.

¹⁸ Sabap ra ragu Nano, timug kiminotog no timinunang; sampuyon No angin, am timug no tumilis.

¹⁹ Potonowon No ragu Nano ra ulun Nano, aturan am ukum Nano ra Israil.

²⁰ Kalo baalon No koson raginio ra bansa' ra bokon; kalo makaulig ilo ra ukum Nano. Omporo' noyo Tuhan!