MAZMUR 146 - Tanou Moonsoi Timugon

Pangamparan ri Aki Kapuuno' Mamamayag ritakau

¹ Omporo' noyo Tuhan! Omporo' noyo Tuhan, alii ra salibuor kuno!

² Mongompor aku Riso buoi ru painawo kuno; rimbayin ku i Aki Kapuuno' kuno buoi ru painawo kuno.

³ Pai' lansan ra kuasa' ru ulun, kolondo' sangulun pana makapamayag ramuyun.

⁴ Bulintok ra ilo matoi sumaguli' ilo ra tana'; paat orou raginio ngaangai' inatang nilono mapuso.

⁵ Pakaansuk noyo ulun ondo' inindangan ri Aki Kapuuno' ri Jakub no, am ondo' lumansan ra Tuhan, i Aki Kapuuno' nano;

⁶ Io noyo i Aki Kapuuno' ondo' namangun ra limbowon, tana' ti am raat, am niayuk ngaangai' suang nano. Masalok Io manugut ra bantu' Nano;

⁷ sungkaan No kaapuan ru ulun inimbolo', am paakanon No ulun naitilan. Tuhan napalabus ra ulun rinakop,

⁸ am ulun nobolou mato pinali' No. Pinaikang No ulun malawo guang; tagamin No ulun ra gumagaya' Riso.

⁹ Sindungin No ulun suai ondo' minayan ra pagun takau; ngaangai' napuor am ilo ondo' nailusan ra matuo no indanganon No, kaa' pusoon No atangon ru ulun malaat.

¹⁰ Tuhan noyo raja' ra sabuoi-buoi no. I Aki Kapuuno' muno, okou Sion, mamarinta ra sabuoi-buoi no. Omporo' noyo Tuhan!