MAZMUR 144 - Tanou Moonsoi Timugon

Maringkuanang Raja' ra Tuhan

¹ Mazmur ri Daut. Omporo' noyo Tuhan, manindung raki'! Mangubas Io raki' koson ra mantutura', am mampatampos raki' koson mangayou.

² Io noyo mangampin am manungka' raki', mamamayag raki' am intok kuno sumindung; sumingkayut aku Riso maa' raginio maayag aku. Ngaangai' bansa' pinakuku' No ra kuasa' kuno.

³ Iou Tuhan, atan kia ulun no saboi ilain Mu ilo? Io ulun ayuk toojo, kaa' lioon Mu ilo!

⁴ Ulun koson ayuk ra labus ru paminawaan, am kaayagan nano mansail koson ra babara'.

⁵ Iou Tuhan, ukabi' noyo limbowon am tuun no; kombongo' noyo ngaangai' gunung maa' raginio mingkual lisun.

⁶ Pasalulaa' noyo ganit, maa' raginio pantula' kuno mantutuliar; palabuso' noyo panah Muno maa' raginio magiru' pantula'.

⁷ Patutuyo' longon Muno intor ra suruga', am bayago' aku intor ra timug malandom; bayago' aku intor ra kuasa' ru ulun suai,

⁸ ondo' masalok magabau am mamparuung, am mampator ondo' kalo motopot.

⁹ Rimbayin Tokou ra rimbai nakabagu, iou Aki Kapuuno'; kayusin tokou ra jitor am rimbayin Tokou.

¹⁰ Pinamanang Mu raja'-raja' no, am namayag ra ulipon Muno, i Daut.

¹¹ Bayago' aku intor ra ilang ru ulun malaat kaga', am palabuso' aku intor ra kuasa' ru ulun suai, ondo' masalok magabau am mamparuung, am magibot ondo' kalo motopot.

¹² Gama' ru ngaangai' anak ungkuyon takau ra mangamulok masauk koson ra tutuu' ondo' malabung. Gama' ru ngaangai' anak ruandu' takau masauk koson ra lugu' mapasau ondo' makaantak ra linsuk-linsuk ru istana.

¹³ Gama' ru kalukub takano napanu' ra nansalinut ampos ru kandoi ra tana' ti. Gama' ru domba giu' ra umo takau mansasayat saboi kaaparan ribu suang nano.

¹⁴ Gama' ru sapi' takano pana mansayat, ra kolondo' pana matatak kapoam mairuan. Gama' ru kolondo' tinangian ra naimbolo' ondo' maining ra ralan-ralan ru bandar takau.

¹⁵ Pakaansuk noyo bansa' koson raginio, pakaansuk noyo ulun ondo' i Aki Kapuuno' nilono Tuhan!