MAZMUR 143 - Tanou Moonsoi Timugon

Pakiasian ra makiindangan

¹ Mazmur ri Daut. Iou Tuhan, rongogo' noyo pakiasian kutu, apuo' noyo pakimasian kutu! Moonsoi Kou am mampagagaya', ginio ra taamo' aku!

² Aku ulipon Muno, pai' aku akimi'; kolondo' sangulun pana ondo' kalo makasala ra saang Muno.

³ Pantula' kuno nangilou raki', am mampaala raki'. Pasubolon no aku ra pangaputan ondo' molondom, am aku ti koson ra ulun ondo' nabuoi noyo minatoi.

⁴ Intor raginio guang kuno malawo, kolondo' lulu' kuno.

⁵ Makara' ku orou ra galing; mangkara' aku ra ngaangai' binaal Muli, mangundasa' aku saguli' ra ngaangai' binaal Muli.

⁶ Patunuyon ku longon kuno makiasi' Rirun; mikimasi' aku Rirun koson ra tana' mapua' makimasi' ra timug.

⁷ Taamo' aku mataki', iou Tuhan, malawo guang kuno. Pai' pansibuni intor raki', maa' raginio kalo masauk aku koson ra ulun nakatuun noyo ra intok kapatayan.

⁸ Pogonong susuab ti pakaraa' aku ra togom Muno, sabap ra malansan aku Rirun. Makiasi' aku Rirun; tului' aku ra ralan ondo' musiti' kuno bayaan.

⁹ Matong aku makisindung Rirun, iou Tuhan, bayago' aku intor ra pantula' kuno.

¹⁰ Okou no i Aki Kapuuno' kuno; ilaa' aku mambaal ra kasagaan Muno. Koonsoi no raki', am pangaak raki' mongoi ra ralan matanda'.

¹¹ Pamayag no raki', iou Tuhan sumugut ra bala' Muno; pamayag no raki' intor ra kapaganan sabap ra Okou no moonsoi.

¹² Potoyo' pantula' kuno sabap ra motogom Kou raki'; luuso' ngaangai' ondo' liminaat raki', sabap ra aku ti ulipon Muno.