MAZMUR 140 - Tanou Moonsoi Timugon

Pakiasian ra makisindung

¹ Ra tingganai santimungan maririmbai. Mazmur ri Daut.

² Iou Tuhan, bayago' aku no intor ra ulun malaat; painggaluro' aku no intor ra ulun mangalaat.

³ Masalok ilo mangatang ra kalaatan, am masalok mapatabual ra pansasangaran.

⁴ Rila' nilono koson ayuk ra kukuo mabisa', am ragu-ragu nilono koson bisa' ru mantakag.

⁵ Iou Tuhan, sindungi' aku no intor ra kuasa' ru ulun malaat; alungi' aku no intor ra ulun ondo' masalok mambaal ra kalaatan ondo' mangatang koson mamparatu' raki'.

⁶ Ulun malilimbau mapabatang ra jajaling koson mamparakop raki'; pabatangon nilo kalat koson mamparakop raki', am kinaawar ru ralan pabaugon nilo jajaling koson mamparakop raki'.

⁷ Mindagu aku ra Tuhan, “Okou noyo i Aki Kapuuno' kuno.” Rongogo' noyo pampiawan kuno makiindangan, iou Tuhan!

⁸ Tuhan Raja' kuno, mamamayag kuno ra maikang, inampin Mu aku ralalom mangayou.

⁹ Iou Tuhan, pai' iowo' gogoton ru ulun malaat; pai' polosoo' atan ondo' atangon nilono makaampos.

¹⁰ Pai' polosoo' pantula' kuno mamanang, kaa' polosoon noyo ragu malaat nilono lumumpa' risilo galama'.

¹¹ Polosoon noyo pulumpur ru apui rumatu' risilo; polosoon ilo no maratu' ra lagam am kalo boo makaingkual.

¹² Polosoon noyo ulun ondo' manimbaal ra ulun bokon kolondo' ampos, pai' polosoo' ulun ra manimbaal no mayan ra tana' ti.

¹³ Iou Tuhan, tutunon Mu kaapuan ru ulun inimbolo', am baal ru ulun musikin.

¹⁴ Ulun ondo' mabanis guang mongompor Rirun; mayan ilo mababaya' Rirun.