MAZMUR 139 - Tanou Moonsoi Timugon

I Aki Kapuuno' makapandai toojo am magalung ra ngaangai' no

¹ Ra tingganai ru santimungan maririmbai. Mazmur ri Daut. Iou Tuhan, napandayan Mu guang kuno, am mauligan Mu aku.

² Napandayan Mu ngaangai' binaal kuno; intor ra maalur makarati' Kou ra kinara' kuno.

³ Magilong Kou raki', bulintok ra aku mangandoi kapoam tumangus; napandayan Mu ngaangai' binaal kuno.

⁴ Kabalu' pana kalo poyo maragu ku, napandayan Mu noyo atan raguon kuno.

⁵ Liniputan Mu aku intor ra nansalinut linsuk; sinindungan Mu aku ra kuasa' Muno.

⁶ Malandom toojo napandayan Muno ra inan kuno; kalo makangkou ru pangkaraan kuno.

⁷ Ati kia ongoyon kuno ru minggalur Rirun? Ati kia pagiruan kuno ra saang Muno?

⁸ Amon ru mongoi aku ra suruga', Okou giu' no; amon ru mombolong aku ra intok ru kapatayan, Okou giu' niayuk.

⁹ Amon ru mansiab aku ra pompor ru sirangon, kapoam mayan ra pompor ru kalasaan ondo' maalur kaga' no,

¹⁰ giu' no niayuk Okou mangitang raki', am ra giu' no pana Okou mangindangan raki'.

¹¹ Amon ru kitaakon kuno kalandaman makaliput raki', kapoam sinda ru libung kuno masauk molondom,

¹² kaa' molondom pana pangkaraan Muno matawang, rondom raginio makasinda koson matawang. Pangkaraan Muno molondom kapoam matawang nogondo' ayuk.

¹³ Binangun Muno nansalinut tayar ru inan kuno; am tinalur Mu aku ra ralalom ru binunakan ru ina' kuno.

¹⁴ Mongompor aku Rirun sabap ra moonsoi am makaimuag toojo namangunan Muno raki'. Nansalinut binaal Muno makaimuag kaga'. Natutunan ku noyo toojo.

¹⁵ Bulintok ra bungul-bungul kuno sinauk, am matuyu' nangatangan Muno ra ralalom ru binunakan ru ina' kuno, liliwa' ra aku tumuu' ra giu' no ondo' kabalu' pana masibuni, mapandayan Mu ra aku soroi ra giu' no.

¹⁶ Magilong Kou raki' bulintok ra aku tininai' ru ina' kuno. Gawar ru painawo kuno inaru' noyo am pinabatik ralalom ru kitab Muno, inaru' Mu noyo kabalu' pana kalo poyo songorou nakatalimpuun.

¹⁷ Iou Aki Kapuuno', mapara' piboo pagon ru pangkaraan Muno ra aku mangkara', am mapara' piboo kinasuang no.

¹⁸ Amon ru inuntob, masuang poyo ka agis. Bulintok ra aku sumukal, lakat aku po mabaya' Rirun.

¹⁹ Iou Aki Kapuuno', potoyo' noyo ulun malaat, am painggaluro' noyo ulun-ulun mangalaat intor raki'!

²⁰ Manimbaal ilo Rirun; ilaaton nilo inggalan Muno.

²¹ Iou Tuhan, masisang aku ra ulun ondo' masisang Rirun! Maruol guang kuno mangkara' ra ulun ondo' manggal Rirun!

²² Masisang aku kaga' risilo; pangkaraan kuno risilo no pantula' kuno.

²³ Urioo' aku no, iou Aki Kapuuno', am kangkamo' noyo guang kuno; pangkinaman no raki' am kapandayi' pangkaraan kuno.

²⁴ Pangundasa' no ra guang kuno ru mokoondo' kia kalaatan ru inan kuno, am kitango' aku ra ralan mantilayun.