MAZMUR 138 - Tanou Moonsoi Timugon

Pakiasian ra maringkuanang

¹ Mazmur ri Daut. Iou Tuhan, maringkuanang aku Rirun ralalom intopot ru guang kuno; rimbayin Tokou ra rimbai pangamparan ra saang ru ngaangai' ilo ondo' maayag ra suruga'.

² Migulatur aku tumingkuang ra Baloi Muno ondo' matulai liliwa' mongompor ra inggalan Muno, sabap ra Okou ti magagaya' am togom Muno mantilayun, am nanulu' Kou noyo ra inggalan Muno am bala' Muno matulai.

³ Taamon Mu aku bulintok ra aku mampiau Rirun; kinaikang Mu aku saboi aku baani.

⁴ Ngaangai raja' ru tana' ti mongompor Rirun, iou Tuhan, sabap ra rinongog nilo bantu' Muno.

⁵ Marimbai ilo koson mangansuk ra atan ondo' binaal Muno, am niayuk pasal ru katulayan Muno ondo' maayo.

⁶ Kabalu' pana Okou no matulai kaga', ilain Mu niayuk ulun ondo' asasabin, am ulun malilimbau kalo mapandai mansibuni intor Rirun.

⁷ Bulintok ra aku natiu' ra kapaganan, alungin Mu aku; anggalon Mu pantula' kuno ondo' malaat, am bayagon Mu aku ra kuasa' Muno.

⁸ Sinugut Mu ngai' bantu' Muno raki'; iou Tuhan, togom Muno mantilayun. Pai' langgai' mangindangan ra ulun-ulun Muno.