MAZMUR 135 - Tanou Moonsoi Timugon

Rimbai Mongompor

¹ Omporo' noyo Tuhan! Omporo' noyo inggalan ru Tuhan, akau ulipon ru Tuhan

² ondo' sumambayang ra Baloi ru Tuhan, intok ayanan ri Aki Kapuuno' takau.

³ Omporo' noyo Tuhan sabap ra Io moonsoi; omporo' noyo inggalan Nano sabap ra Io mataau.

⁴ Pinili' No i Jakub koson ra inan Nano galama', am ulun ru Israil koson ra longgom Nano galama'.

⁵ Nakapandai aku ra Tuhan takano makakuasa'; makakuasa' Io toojo ka tuhan ra bokon.

⁶ Baalon No atan ondo' kasaga' Nano, giu' ra limbowon kapoam tana' ti; giu' ra raat kapoam tatanga' ru raat ondo' malandom.

⁷ Intor ra pompor ru tana' ti porotongon No gaun masait, pasaukon No timpalak mabaya' ra rasam, am niayuk susubon No angin mingkual intor ra namulian Nano.

⁸ Giu' ra Misir ngaangai' ru anak ra katuaan ru ulun pinatoi No am ngaangai' ru anak katuaan ru bibiag.

⁹ Ra giu' no mambaal Io ra baal ra makaimuag am pulanu koson mangukum ra raja' ru Misir am ngaangai' ru mangngandoi nano.

¹⁰ Masuang bansa' pinuso No, am namatoi ra raja'-raja' ondo' manguasa':

¹¹ I Sigon raja' ru Amori am i Og, raja' ru Basan, am ngaangai' raja' giu' ra Kanaan.

¹² Pinataak No pagun nilono ra ulun Nano; pinataak No ginio ra ulun ru Israil, ulun Nano.

¹³ Iou Tuhan, inaru' Kou noyo koson ra i Aki Kapuuno'; ngaangai' papag mangkara' Rirun.

¹⁴ Sabap ra Tuhan manaung ra ulun Nano; makaasi' Io ra ulipon-ulipon Nano.

¹⁵ Sinungkalalaing nilono binaal intor ra pirok am mas, binaal ru kalindu' ru ulun.

¹⁶ Sinungkalalaing no makakabang kaa' kalo makaindagu, makamato kaa' kalo makakito,

¹⁷ makatalingo kaa' kalo mokorongog, sinungkalalaing kalo makapaminawo.

¹⁸ Gama' ru ngaangai' ulun ondo' nambaal no nogondo' koson binaal nilono, am ondo' mangintopot riso no, masauk koson ra sinungkalalaing ondo' binaal nilo.

¹⁹ Omporo' noyo Tuhan, akau ulun ru Israil; omporo' Iono, akau imam ri Aki Kapuuno'!

²⁰ Omporo' noyo Tuhan, akau ulun ru Liwi; omporo' noyo Tuhan, akau ngai' ondo' siminamba Riso!

²¹ Omporo' noyo Tuhan giu' ra Sion, giu' ra baloi Nano ra Jirusalim. Omporo' noyo Tuhan!