MAZMUR 119 - Tanou Moonsoi Timugon

Ukum ru Tuhan

¹ Pakaansuk noyo ulun maayag ra kolondo' ruruko, am maayag sumugut ra ukum ru Tuhan.

² Pakaansuk noyo ilo ondo' sumugut ra panusuban Nano, am gumagaya' Riso ra sotopot-topot no.

³ Kalo mambaal ilo ra kalaatan, kaa kaayagan nilo maya' ra kasagaan ru Tuhan.

⁴ Pinataak Mu ukum Muno ramon, iou Tuhan, am manusub ramon sumugut am gumagaya'.

⁵ Gama' gagayaan ku sumugut ra nangatangan Muno.

⁶ Amon guangon ku ngaangai' panusuban Muno, kalo boo tauyuon aku.

⁷ Bulintok ra aku migila' ra namalantasan Muno ra matimpok, omporon Tokou ra sotopot-topot no.

⁸ Gagayaan ku ukum Muno; pai' aku no tatango'!

Gumagaya' ra Ukum ru Tuhan

⁹ Tuu' bagu mokoowot ra kaayagan matanda' amon bayag nano sumugut ra panusuban Muno.

¹⁰ Sotopot-topot no gogoton kuno gumagaya' Rirun; pai' aku polosoo' tumalansiang ra panusuban Muno.

¹¹ Ukum Muno buliin ku ra guang kuno, maa' raginio kolondo' boo tula kuno Rirun.

¹² Mongompor aku Rirun, iou Tuhan; ilaa' aku maya' ra kasagaan Muno.

¹³ Tunungon ku ngaangai' ukum ra pinataak Muli.

¹⁴ Maansukan guang kuno maya' ra panusuban Muno, koson mokoondo' ra nansalinut rapu'.

¹⁵ Imansain kuno nangatangan Muno, am mampaguang ra pangilaan Muno.

¹⁶ Maansayan aku ra ukum Muno; kalo lilianin ku panusuban Muno.

Ukum ru Tuhan mapakaansuk ra ulun

¹⁷ Gama' ru mataau Kou raki', ulipon Muti, maa' raginio maayag aku gumagaya' ra ila' Muno.

¹⁸ Singkirato' mato kutu maa' raginio makakito aku pangilaan ra makaimuag ralalom ru ukum Muno.

¹⁹ Sangkinolor ayuk aku mayan ra tana' ti; pai' noyo sibunio' ukum Muno raki'.

²⁰ Moondom kaga' guang kuno koson mampaguang ra panusuban Muno ra moonong bulintok.

²¹ Sawayon Muno ulun ondo' malilimbau; am magulas ra ulun ondo' kalo gumagaya' ra panusuban Muno.

²² Pai' polosoo' ra aku ulason am asabin nilo, sabap ra ginagaya' ku noyo ukum Muno.

²³ Kabalu' pana ngaangai' mangunguasa' no maguguum tumula' raki', kaa' guangon ku niayuk pangilaan ra inatang Muno.

²⁴ Nangatangan Muno mapabansuk ra guang kuno; am maminson raki'.

Guangon koson gumagaya' ra Ukum ru Tuhan

²⁵ Nakaraluui aku ra kaau; patapulio' noyo bayag kuno sumugut ra bantu' Muno.

²⁶ Akunin ku ngaangai' binaal kuno, am taamon Mu aku; ilaa' aku ra kasaga' Muno.

²⁷ Indangano' aku mangulig ra ukum Muno, am imansain ku pangilaan Muno ondo' makaimuag no.

²⁸ Sabap ra kapaganan, nagagai saliguor kuno; paikango' aku sumugut ra bantu' Muno.

²⁹ Painggaluro' aku no ra ralan kalayawan, am sabap ra kinoonsoi Muno, ilaa' aku no ra ukum Muno.

³⁰ Ralan pinili' kuno gumagaya' Rirun, am mampaguang toojo ra panusuban inatang Muno.

³¹ Binaya' ku panusuban inatang Muno, iou Tuhan, pai' aku polosoo' tauyuon.

³² Maansayan aku gumagaya' ra panusuban Muno, sabap ra sinauk Mu aku makarati' toojo.

Pakiasian ra makiarati'

³³ Iou Tuhan, paratio' aku ra ukum Muno, maa' raginio masalok ku kagagaya'.

³⁴ Paratio' toojo raki' Ukum Muno maa' raginio magagaya' ku, am baalon ku ra sotopot-topot ru guang kuno.

³⁵ Gama' ru masugut ku panusuban Muno, sabap ra ginio noyo kasagaan kuno.

³⁶ Indangano' aku mompogogot koson gumagaya' ra ukum Muno, am sala' ka masauk ra langkaya'.

³⁷ Pai' aku polosoo' mampaguang ra kandoi-kandoi ra kolondo' onong; anii' aku ra bayag sumugut ra kasagaan Muno.

³⁸ Intopoto' bantu' Muno raki', ulipon Muti, bantu' ra pinataak Muno ra ulun ondo' gumagaya' Rirun.

³⁹ Painggaluro' aku no ra pagasaban ra kalaa' kuno; mapara' piboo kinoonsoi ru panusuban inatang Muno.

⁴⁰ Gagayaan ku panusuban Muno; anii' aku no ra kaayagan bagu sabap ra Okou noyo matimpok.

Mangintopot ra Ukum ru Tuhan

⁴¹ Iou Tuhan, patalango' noyo togom Muno raki', bayago' aku no sumugut ra bantu' Muno.

⁴² Aku pana makataam ra ulun ondo' magasab raki', sabap ra mangintopot aku ra ragu Muno.

⁴³ Indangano' aku masalok mindagu ra motopot, sabap ra malansan aku ra namalantasan Muno.

⁴⁴ Kasaga' ru guang kuno gumagaya' ra ukum Muno, ra sabuoi-buoi no.

⁴⁵ Kaayagan kuno pana matanda', sabap ra gumogot sumugut ra pangilaan Muno.

⁴⁶ Potonowon ku panusuban inatang Muno ra ngaangai' raja', am kalo boo tauyuon aku.

⁴⁷ Masaga' aku gumagaya' ra panusuban Muno, sabap ra monogom aku ra panusuban Muno.

⁴⁸ Urumaton ku am tagamin ku panusuban Muno; imansain ku panusuban inatang Muno.

Mangintopot ra Ukum ru Tuhan

⁴⁹ Karaa' noyo bantu' Muno raki', ulipon Muti; bantu' ondo' nanaak raki' ra kalansanan.

⁵⁰ Kabalu' pana naimbolo' aku kaa' maansukan aku, sabap ra bantu' Muno namayag raki'.

⁵¹ Ulun malilimbau masalok magasab raki', kaa' kalo tuliarin ku Ukum Muno.

⁵² Makara' ku panusuban inatang Muno intor poyo ra galing i, am panusuban inatang Muno makabansuk ra guang kuno, iou Tuhan.

⁵³ Sumangit aku toojo ra ulun malaat bulintok ra ilo manggal ra Ukum Muno.

⁵⁴ Rabuoi ru bayag kuno ondo' mariwa' ra tana' ti, panusuban Muno saukon ku ra rimbai.

⁵⁵ Bulintok molondom makara' Tokou, iou Tuhan, am guangon kuno Ukum Muno.

⁵⁶ Makaalap aku ra bansuk ra gumagaya' ra panusuban Muno.

Pampagagayaan ra Ukum ru Tuhan

⁵⁷ Okou ayuk kasagaan kuno, iou Tuhan; mambaal aku ra bantu' koson manugut ra ukum Muno.

⁵⁸ Makiasi' aku toojo Rirun; pakaasi' noyo raki' sumugut ra bantu' Muno.

⁵⁹ Karaan ku binaal kuno, am mambaal ra bantu' gumagaya' ra panusuban inatang Muno.

⁶⁰ Maringkaagou aku am kalo maginaa koson mapaugar ra panusuban Muno.

⁶¹ Ulun malaat mampajaling raki', kaa' kalo mampalilian aku ra Ukum Muno.

⁶² Bulintok ra mampayung rondom sumukal aku am mongompor Rirun, sabap ra panusuban Muno matimpok.

⁶³ Kumubayau aku ra ngaangai' ulun ondo' gumagaya' Rirun no, ngaangai' ulun ondo' gumagaya' ra panusuban Muno.

⁶⁴ Iou Tuhan, tana' ti natikop ra togom Muno ra mantilayun, ilaa' aku ra panusuban Muno.

Logo ru Ukum ru Tuhan

⁶⁵ Inintopot Mu bantu' Muno, iou Tuhan, am moonsoi Kou raki', ulipon Muti.

⁶⁶ Anii' aku ra kapintaran am kapandayan, sabap ra mangintopot aku ra panusuban Muno.

⁶⁷ Ra kalo poyo ukumin Mu aku, masalok aku manuliar ra panusuban Muno, kaa' ragino ginagaya' ku ragu Muno.

⁶⁸ Moonsoi Kou kaga' am baalon Muno moonsoi; ilaa' aku no ra panusuban inatang Muno.

⁶⁹ Ulun malilimbau manimbaal raki', kaa' sotopot-topot ru guang kuno suguton ku panusuban inatang Muno.

⁷⁰ Ngaangai' ulun no kalo nakarati', kaa' Ukum Muno napabansuk ra guang kuno.

⁷¹ Moonsoi noyo ra Okou mangukum raki', maa' raginio makarati' aku ra panusuban Muno.

⁷² Kara' ku, Ukum Muno mokologo poyo ka mas kapoam pirok ra tana' ti.

Katimpakan ru Ukum ru Tuhan

⁷³ Okou noyo namangun am napasauk raki'; paratio' aku no mampaguang ra ukum Muno.

⁷⁴ Ulun ra mangurumat Rirun no maansukan bulintok ra io magilong raki', sabap ra mangintopot aku ra bantu' Muno.

⁷⁵ Makapandai aku ra namalantasan Muno matimpok, iou Tuhan, inukum Mu aku sabap ra nampagagayaan Muno.

⁷⁶ Gama' ru togom Muno mantilayun mapabansuk raki', sumugut ra bantu' Muno raki', ulipon Muti.

⁷⁷ Pakaasi' no raki', am maayag aku, sabap ra Ukum Muno mapabansuk ra guang kuno.

⁷⁸ Polosoon noyo ulun malilimbau tauyuon sabap ra manimbaal ilo raki', kaa' imansain ku panusuban Muno.

⁷⁹ Gama' ru ulun ondo' mangurumat Rirun no matong raki', ngaangai' ulun ondo' makatutun ra panusuban Muno.

⁸⁰ Gama' ru masugut ku ngai' panusuban Muno, am kalo tauyuon aku.

Pakiasian ra makilabus

⁸¹ Iou Tuhan, noondom aku no kaga' ra pamayagan Muno; mangintopot aku ra bantu' Muno.

⁸² Maagui mato kuno magiginaa ra atan kia pasalulaan ru bantu' Muno, liliwa' aku mangkuot, “Sanggilan kia Okou mangindangan raki'?”

⁸³ Koson aku ayuk ra kantungan kungkung ondo' pinatiran, kaa' kalo niayuk lilianin ku panusuban Muno.

⁸⁴ Kula' buoi kuno maginaa? Sanggilan poyo pangukuman Muno risilo ondo' mangimbolo' raki' no?

⁸⁵ Ulun malilimbau ondo' kalo gumagaya' ra panusuban Muno, nangkali noyo ra luang mapalandak raki'.

⁸⁶ Ngaangai' panusuban Muno maintopot; indangano' aku no sabap ra ulun mangimbolo' am manimbaal raki'!

⁸⁷ Itik poyo ilo makapampatoi raki', kaa' kalo lilianin ku panusuban Muno.

⁸⁸ Gama' ru tagamin Mu aku sabap ra togom Muno mantilayun, maa' raginio magagaya' ku ukum Muno.

Pangintapatan ra Ukum ru Tuhan

⁸⁹ Iou Tuhan, bala' Muno mantilayun ra sabuoi-buoi no; bala' Muno mantilayun giu' ra suruga'.

⁹⁰ Pampagagayaan Muno mantilayun ra sabuoi-buoi no, pinabanta' Mu tana' ti am tana' ti magulayun soroi.

⁹¹ Ngaangai' ti lakat soroi raino, sabap ra panusuban Muno, sabap ra ngaangai' no ulipon Muno.

⁹² Amon ru Ukum Muno kalo makapamansuk raki', maaru' matoi aku noyo intor ra imbolo' kuno.

⁹³ Sabuoi-buoi no kalo lilianin ku panusuban Muno, sabap ra nangatangan raginio namayag Kou raki'.

⁹⁴ Bayago' aku no sabap ra aku longgom Muno; pinirot ku noyo gumagaya' ra panusuban Muno.

⁹⁵ Ulun malaat maginaa koson mampatoi raki', kaa' ukum Muno karaan kuno.

⁹⁶ Natutunan ku noyo ngaangai' no mokoondo' ra balit; kaa' panusuban Muno ayuk matimpok.

Togom ra Ukum ru Tuhan

⁹⁷ Mapara' piboo togom kuno ra Ukum Muno! Moonong orou aku mangkara'.

⁹⁸ Panusuban Muno mabaya' raki', ondo' mapasauk raki' mapintar poyo ka ilo pantula' kuno.

⁹⁹ Kapintaran kuno nakasail poyo intor ra ngaangai' mangingila' raki', sabap ra panusuban Muno karaan kuno.

¹⁰⁰ Mapintar aku poyo ka ulun matutuo, sabap ra panusuban Muno gagayaan ku.

¹⁰¹ Tuliarin ku ngaangai' paliso malaat, sabap ra gumagaya' aku ra bala' Muno.

¹⁰² Kalo lilianin ku ukum Muno, sabap ra Okou noyo nangila' raki'.

¹⁰³ Mapara' piboo tamis ru rinagu Muno, matamis poyo intor ra ruu' ru maningot!

¹⁰⁴ Ukum Muno napasauk raki' ra mapintar, ginio ra masisang aku ra ngaangai' paliso malaat.

Ukum ru Tuhan manaak ra sinda

¹⁰⁵ Ragu Muno titiu ondo' maningganai raki', am sinda ondo' manampulau ra ralan kuno.

¹⁰⁶ Intopoton ku bantu' ondo' nagibatan kuli, koson mampaguut ra inatang Muno ondo' matimpok.

¹⁰⁷ Naimbolo' aku kaga', iou Tuhan; bayago' noyo painawo kuno sumugut ra bantu' Muno.

¹⁰⁸ Apuo' noyo pakiasian paringkuanangan kuno, iou Tuhan, am ilaa' aku no ra panusuban Muno.

¹⁰⁹ Masalok pajuungon ku painawo kuno, kaa' aku kalo mampalilian ra ukum Muno.

¹¹⁰ Ulun malaat mapaatang raki' ra jajaling, kaa' kalo anggalon ku panusuban Muno.

¹¹¹ Panusuban Muno longgom kuno ra mantilayun; panusuban Muno mapabansuk ra guang kuno.

¹¹² Nakai' noyo guang kuno koson gumagaya' ra ukum Muno saboi ru painawo kuno.

Ukum ru Tuhan manaak ra pamayagan

¹¹³ Masisang aku ra ulun ondo' kalo gumagaya' Rirun ra sotopot no, kaa' tagamin ku Ukum Muno.

¹¹⁴ Okou noyo manungka' am manindung raki'; malansan aku ra bantu' Muno.

¹¹⁵ Akau ulun malaat, inggalur kau raki'. Gumagaya' aku ra panusuban ri Aki Kapuuno' kuno.

¹¹⁶ Paikango' aku no sumugut ra bantu' muno, maa' raginio maayag aku; pai' aku polosoo' malawo guang paat ra aku malansan!

¹¹⁷ Indangano' aku no, am maayag aku, am masalok mampaguang ra panusuban Muno.

¹¹⁸ Kalo apuon Mu ngaangai' ulun ondo' kalo gumagaya' ra ukum Muno; ruung nilono kolondo' onong.

¹¹⁹ Pangkaraan Muno ra ngaangai' ulun malaat no koson ra ginsamol; ginio ra tagamin ku panusuban Muno.

¹²⁰ Monontol aku malaa' Rirun, am malaa' aku ra nangatangan Muno.

Gumagaya' ra ukum ru Tuhan

¹²¹ Nambaal aku no ra baal matimpok am motopot; pai' aku pataako' ra pantula' kuno!

¹²² Pangatang No ra bantu' ra Okou masaga' mangindangan raki'; pai' polosoo' ulun malilimbau mangulipon raki'!

¹²³ Malaut mato kuno maginaa ra Okou matong mangindangan koson mamayag raki', am maginaa ra Okou mapalabus raki', sumugut ra bantu' Muli.

¹²⁴ Pasauko' aku no sumugut ra togom Muno, am ilaa' aku no ra panusuban Muno.

¹²⁵ Aku ti ulipon Mu, anii' aku ra pangaratian, maa' raginio maratian ku pangilaan Muno.

¹²⁶ Nasaboi noyo bulintok ra Okou mapaliman, iou Tuhan, sabap ra ulun kalo gumagaya' ra panusuban Muno.

¹²⁷ Togom kuno ra panusuban Muno nakasail poyo intor ra mas, nakasail poyo intor ra mas kopoyo.

¹²⁸ Sabap raginio maya' aku ra nansalinut panusuban Muno; masisang aku ra baal ra kalo matanda'.

Gogot koson gumagaya' ra Ukum ru Tuhan

¹²⁹ Pangilaan Muno makaimuag kaga'; gagayaan ku ra sotopot-topot ru guang kuno.

¹³⁰ Bala' ru pangilaan Muno manaak ra sinda, manaak ra karatian ra ulun magayantanga' guang.

¹³¹ Noondom aku no ra panusuban Muno, maayo guang kuno mompogogot.

¹³² Tingkuang No raki' am pakaasi' no raki' koson niayuk ra Okou makaasi' ra ulun motogom Rirun.

¹³³ Sumugut ra bantu' Muli, paikango' aku no; pai' polosoo' kalaatan no manguasa' raki'.

¹³⁴ Palabuso' aku no intor ra ulun ondo' mangulipon raki', maa' raginio panusuban Muno magagaya' ku.

¹³⁵ Barakato' aku no ra ratangan Muno, am ilaa' aku no ra ukum Muno.

¹³⁶ Lomou kuno tumulisan koson ra sungoi, sabap ra ulun kalo gumagaya' ra Ukum Muno.

Ukum ru Tuhan ondo' matimpok

¹³⁷ Matimpok Kou, iou Tuhan, am matimpok ukum Muno.

¹³⁸ Panusuban ra pinataak Muno ngaangai' no matimpok am motopot.

¹³⁹ Sangit mapaangan ra guang kuno sabap ra pantula' kuno kalo gumagaya' ra panusuban Muno.

¹⁴⁰ Bantu' Muno mapiot maalap intopoton, motogom aku kaga' raginio.

¹⁴¹ Aku ti kolondo' onong am asabin kaga', sabap ra kalo lilianin ku pangilaan Muno.

¹⁴² Katimpakan Muno mantilayun ra sabuoi-buoi no, am Ukum Muno motopot.

¹⁴³ Kapaganan am pagalabaan lumumpa' raki', kaa' panusuban Muno mapabansuk raki'.

¹⁴⁴ Inatang Muno masalok matimpok; paratio' aku no maa' raginio maayag aku.

Pakiasian ra makilabus

¹⁴⁵ Ralalom intopot ru guang, mampiau aku Rirun; taamo' aku no, iou Tuhan; gagayaan ku panusuban Muno.

¹⁴⁶ Mampiau aku Rirun; bayago' aku no; bayaan ku ukum Muno.

¹⁴⁷ Bulintok tumawang mampiau aku makiindangan Rirun, malansan aku ra bantu' Muno.

¹⁴⁸ Masuaban aku kalo mokororot, sabap ra mangkara' ra pangilaan Muno.

¹⁴⁹ Ralalom ru togom Muno ra mantilayun, iou Tuhan, rongogo' aku no; pakaasi' noyo raki' am bayago' aku no.

¹⁵⁰ Pantula' kuno mamaar noyo; kalo igogondo' ilo gagaya' ra Ukum Muno.

¹⁵¹ Kaa' Okou mamaar raki', iou Tuhan, am ngaangai' panusuban Muno motopot.

¹⁵² Intor ra galing i mapandayan ku pangilaan Muno, ondo' patilayunon Mu ra sabuoi-buoi no.

Pakiasian ra makiindangan

¹⁵³ Ilai' ga pagon kuno naimbolo' am bayago' aku no, sabap ra kalo lilianin ku Ukum Muno.

¹⁵⁴ Sungkaa' aku no am palabuso' aku no; bayago' aku no sumugut ra bantu' Muno.

¹⁵⁵ Ulun malaat kalo bayagon, sabap ra kalo ginagaya' nilo ukum Muno.

¹⁵⁶ Asi' Muno maayo, iou Tuhan; pakaasi' no raki' am bayago' aku no.

¹⁵⁷ Masuang ulun makimantula' am mangulipon raki', kaa' kalo igondo' ku liliani' ukum Muno.

¹⁵⁸ Masisang aku magilong ra ulun-ulun mangalaat no, sabap ra kalo gumagaya' ilo ra panusuban Muno.

¹⁵⁹ Ilai' noyo, tagamin ku toojo panusuban Muno, iou Tuhan. Bayago' aku no, sabap ra togom Muno.

¹⁶⁰ Ngaangai' bala' Muno motopot, am nansalinut ukum Muno ra matimpok mantilayun ra sabuoi-buoi no.

Pampagagayaan ra Ukum ru Tuhan

¹⁶¹ Ulun mangunguasa' mangayou raki' ra kolondo' naayatan, kaa' ukum Muno ayuk kalaa' kuno.

¹⁶² Bantu' Muno mapabansuk raki', koson ra ulun nakajampa' ra rapu'.

¹⁶³ Masisang aku ra nansalinut abau, kaa' motogom aku ra Ukum Muno.

¹⁶⁴ Rayusin ku maringkuanang Rirun, sabap ra ukum Muno ra matimpok.

¹⁶⁵ Ulun monogom ra ukum Muno makaalap ra kaansayan; kalo malumpa' ilo ru karaat.

¹⁶⁶ Maginaa aku ra Okou mangindangan raki', iou Tuhan, am suguton ku ngaangai' panusuban Muno.

¹⁶⁷ Gagayaan ku pangilaan Muno, am tagamin ku ra sotopot-topot ru guang.

¹⁶⁸ Bayaan ku panusuban ondo' inatang Muno, sabap ra makito Mu ngaangai' binaal kuno.

Pakiasian ra makiindangan

¹⁶⁹ Gama' pampiawan kuno makasaboi Rirun, iou Tuhan! Paratio' aku no sumugut ra bantu' Muno.

¹⁷⁰ Rongogo' noyo pakiasian kutu, am bayago' aku no sumugut ra bantu' Muli.

¹⁷¹ Masalok aku mongompor Rirun, sabap ra inila' Mu aku ra ukum Muno.

¹⁷² Rimbayon ku atan ukum Muno, sabap ra panusuban Muno matimpok.

¹⁷³ Gama' masalok Kou tumampos mangindangan raki', sabap ra masaga' aku maya' ra panusuban Muno.

¹⁷⁴ Malansan aku ra pamayagan Muno, iou Tuhan, Ukum Muno mapabansuk ra guang kuno.

¹⁷⁵ Gama' maayag aku maa' raginio mokopongompor aku Rirun; gama' nangatangan Muno mangindangan raki'.

¹⁷⁶ Tumanggau aku koson ra domba nakalayau; am ratong no paguyum ra ulipon Mutu, sabap ra kalo lilianin ku ukum Muno.