MAZMUR 118 - Tanou Moonsoi Timugon

Pakiasian ra paringkuanangan ra namanang

¹ Paringkuanang no ra Tuhan sabap ra Io moonsoi, am togom Nano mantilayun.

² Musiti' ulun ru Israil mindagu, “Togom Nano mantilayun.”

³ Musiti' ngaangai' imam ri Aki Kapuuno' mindagu, “Togom Nano mantilayun.”

⁴ Musiti' ngaangai' ulun sumamba Riso no mindagu, “Togom Nano mantilayun.”

⁵ Ralalom kapaganan, mampiau aku ra Tuhan; iowon No pakiasian kuno am palabuson No aku.

⁶ Kalo malaa' aku sabap ra Tuhan mabaya' raki'; atan kia maalap kabaal ru ulun no raki'?

⁷ Tuhan noyo mangindangan raki', magilong aku ra ngaangai' pantula' kuno kalaan.

⁸ Moonsoi poyo sumindung ra Tuhan, ka lumansan ra ulun.

⁹ Moonsoi poyo sumindung ra Tuhan, ka lumansan ra tingganai.

¹⁰ Masuang pantula' liminiput raki', kaa' pusoon ku ilo ra kuasa' ru Tuhan.

¹¹ Linibungan nilo aku ra ati-ati ayuk pana tingkuangan, kaa' pusoon ku ilo ra kuasa' ru Tuhan.

¹² Koson ra maningot ilo manguup raki', kaa' mataki' ilo mosolob koson kinataki' ru bulungkut; pusoon ku ilo ra kuasa' ru Tuhan.

¹³ Inuupan nilo aku am mamaar aku po kaala, kaa' Tuhan nangindangan raki'.

¹⁴ Sinauk aku ru Tuhan ra mapanggol am maikang; binayag No aku.

¹⁵ Rongogo' noyo ralalom kim ru ulun ri Aki Kapuuno' magigindii ra ilo namanang; “Binaal ru Tuhan koson raginio kolondo' mokogondo'!

¹⁶ Kuasa' ru Tuhan napamanang ritakau, binaal ru Tuhan koson raginio kolondo' mokogondo'!”

¹⁷ Kalo matoi aku, kaa' maayag aku, koson mantunung ra binaal ru Tuhan.

¹⁸ Maagat pinangukum Nano raki', kaa' kalo polosoon No aku matoi.

¹⁹ Ukabi' noyo raki' kulobon garabang Baloi ru Tuhan, maa' raginio sumubol am maringkuanang aku ra Tuhan!

²⁰ Gitio noyo kulobon garabang ru Tuhan; ondo' makasubol no ulun ri Aki Kapuuno' ayuk.

²¹ Mongompor aku Rirun, Tuhan, sabap ra mangkirongog Kou ra piau kuno, sabap ra inanian Mu aku ra kamanangan.

²² Batu pinatiran ru ulun-ulun mambabaal ra baloi no nasauk boo ra lugu' maatang.

²³ Gitio noyo binaal ru Tuhan; makaimuag toojo ritakau!

²⁴ Gitio noyo orou namanangan ru Tuhan; antako' takau ralalom guang maansukan.

²⁵ Makiasi' akai maa' raginio bayagon Mu akai, iou Tuhan! Iou Tuhan, pamanango' akai no!

²⁶ Gama' mambarakat i Aki Kapuuno' no riso ondo' matong ralalom inggalan ru Tuhan! Intor ra Baloi ru Tuhan, barakaton mai akau ngaangai'.

²⁷ Tuhan no i Aki Kapuuno'; moonsoi Io ritakau. Satanggal-tanggal ilo ra raan ru roroon koson mapatalimpuun ra pangiantakan am mugar lumiput ra altar.

²⁸ Okou noyo i Aki Kapuuno' kuno, maringkuanang aku Rirun; omporon Tokou.

²⁹ Paringkuanang noyo ra Tuhan, sabap ra Io moonsoi, am togom Nano mantilayun.