MAZMUR 116 - Tanou Moonsoi Timugon

Ulun ondo' nakalabus intor ra kapatayan mongompor ri Aki Kapuuno'

¹ Tumogom aku ra Tuhan, sabap ra mangkirongog Io ra piau kuno; mangkirongog Io ra kitaakon kuno.

² Mangkirongog Io raki', pogonong ra aku mampiau Riso.

³ Kapatayan liminibung raki'; am lobong ra makalalaa' liminiput raki'; malaa' aku kaga' am magalabo.

⁴ Aku pana mampiau ra Tuhan, “Makiasi' aku, iou Tuhan, bayago' aku no.”

⁵ Tuhan no motogom am matimpok; i Aki Kapuuno' takau no natikop ra katagaman.

⁶ Manindung Tuhan ra ulun kolondo' lulu'; bulintok ra aku makauma' ra makalalaa', bayagon No aku.

⁷ Kolondo' pagalabaan kuno, sabap ra moonsoi Tuhan raki'.

⁸ Binayag aku ru Tuhan intor ra kapatayan; inansuk No aku am kalo polosoon No aku maratu'.

⁹ Aku pana maayag ra tana' ti, ralalom panindungan ru Tuhan.

¹⁰ Mangintopot aku toojo, kabalu' pana mindagu aku, “Nalingon aku naratu'.”

¹¹ Kabalu' pana magalabo mindagu aku, “Kolondo' sangulun pana maintopot.”

¹² Atan kia maalap kuno pakataak ra Tuhan koson timbalos ra kaansayan Nano raki'?

¹³ Pataakon kuno wain koson ra taak kuno ra Tuhan, koson paringkuanangan kuno Riso sabap ra Io namayag raki'.

¹⁴ Giu' ra saang ru ngaangai' ru ulun Nano, suguton ku bantu' kuno Riso.

¹⁵ Mangiluk kaga' guang ru Tuhan bulintok ra ulun ondo' gumagaya' Riso no matoi.

¹⁶ Ulipon Muno aku, iou Tuhan; koson ri ina' kuli ragili, aku ti pana mangandoi ayuk Rirun. Binayag Mu aku intor ra kapatayan.

¹⁷ Pataakon kuno Rirun taak simbalui ru paringkuanangan, liliwa' makiasi' Rirun.

¹⁸ Suguton ku bantu' kuno ra Tuhan ra saang ru ngaangai' ru ulun Nano,

¹⁹ giu' ra liliut ra Baloi ru Tuhan, giu' ra tatanga' ru bandar Jirusalim. Omporo' noyo Tuhan!