MAZMUR 114 - Tanou Moonsoi Timugon

Rimbai Paska

¹ Paat ra ulun ru Israil miningkual intor ra Misir, bulintok ru papag ri Jakub mangiruan ra tana' suai no,

² i Jiuda nasauk ra ulun longgom ru Tuhan, am Israil masauk ra longgom Nano.

³ Raat Galaga magilong am pagiru', Sungoi Jordan liminonggo' tumilis.

⁴ Ngaangai' ru gunung satutulindak koson ra kambing malaa', am ngaangai' ru bulur satutulindak koson ra anak ru domba malaa'.

⁵ Atan kia kinibit saboi okou magiru', alii ra raat? Kua kia longgo' tumilis, alii ra Sungoi Jordan?

⁶ Kua kia satutulindak kau koson ra kambing malaa', akau ngaangai' gunung? Kua kia satutulindak kau koson ra anak domba malaa', akau ngaangai' bulur?

⁷ Okou tana', ponontol no ra saang ru Tuhan, ra saang ri Aki Kapuuno' ondo' sambaan ri Jakub,

⁸ i Aki Kapuuno' ondo' nangulau ra bulur batu masauk ra tulugung, am pipilon ru batu masauk ra taur ru timug.