MAZMUR 111 - Tanou Moonsoi Timugon

Pangamparan ra Tuhan

¹ Omporo' noyo Tuhan! Nakai' guang kuno maringkuanang ra Tuhan ralalom pantitimungan ru ulun Nano.

² Makaimuag toojo atan ondo' binaal ru Tuhan; ngaangai' ulun ondo' maansayan ra atan ondo' binaal Nano imansain no toojo.

³ Nansalinut binaal ru Tuhan no matulai am noompor; mantilayun kinoonsoi Nano.

⁴ Kalo polosoon takau ru Tuhan mampalilian ra binaal Nano ondo' makaimuag; Io no motogom am maupus.

⁵ Ulun ondo' mangurumat Riso aniin No ra akanon; kalo igondo' Io pampalilian ra bantu' Nano.

⁶ Pinatalang No kuasa' Nano ra ulun Nano, am manaak risilo ra tana' ondo' linonggom ru ulun suai.

⁷ Tuhan matimpok am mampagagaya' ra atan ondo' baalon Nano; nansalinut panusuban Nano maintopot.

⁸ Panusuban Nano kalo makulau; pataakon No parinta Nano ra sotopot-topot am matimpok.

⁹ Namayag Io ra ulun Nano, am mambaal ra bantu' ondo' mantilayun risilo. Matulai Io am maikang!

¹⁰ Mangurumat ra Tuhan iono rondo' ralan mokoowot ra kapandayan; ulun ondo' gumagaya' tuluin No. Omporon noyo Tuhan ra sabuoi-buoi no!