MAZMUR 108 - Tanou Moonsoi Timugon

Pakiasian makiindangan ri Aki Kapuuno'

¹ Rimbai. Mazmur ri Daut.

² Mangintopot aku Rirun, iou Aki Kapuuno'! Marimbai am mongompor aku Rirun! Singkarat noyo, alii ra salibuor kuno!

³ Singkarat kano, alii ra gambus am jitor! Singkaraton ku mato ru orou!

⁴ Iou Tuhan, mongompor aku Rirun mangkilolot ra bansa'-bansa'. Mongompor aku Rirun mangkilolot ra ngaangai' ulun.

⁵ Togom Muno masawat poyo ka limbowon, am gagaya' Muno makasaboi ra gaun ondo' masawat.

⁶ Iou Aki Kapuuno', patalango' noyo kinasawat Muno giu' ra limbowon, am katulayan Muno ra titikop ru tana' ti!

⁷ Bayago' akai no ra kuasa' Muno, am iowo' noyo pakiasian kuno, maa' raginio ulun ra tagamin Muno bayagon.

⁸ Intor ra intok Nano ondo' matulai indagu i Aki Kapuuno', “Magilakup Aku am tatayaron Ku tana' ru Sikgim, am mantayar ra Limayak Sukot no ra ulun Kuno.

⁹ I Giliad am i Manasi Aku ra longgom, I Ipraim pinakatupi' basi' Kuno, am i Jiuda pinakasusukur ru namarintaan Kuno.

¹⁰ Kaa' i Moab alapon Ku ra pambaguan; pobobolon Ku kasut no ri Idom, koson tatandu' ra i Idom no longgom Kuno; magilakup Aku sabap ra namanangan ra ulun ru Palistin.”

¹¹ Osoi kia magibit raki' mongoi ra bandar ondo' makaampin no? Osoi kia mangitang raki' mongoi ra Idom?

¹² Iou Aki Kapuuno', nanginggalar Kou noyo kia ramon? Kalo kia jumalai Kou mababaya' ra saujor maiti?

¹³ Indangano' akai manggal ra pantula', sabap ra indangan ru ulun ti kolondo' onong.

¹⁴ Mababaya' ri Aki Kapuuno', maikang takau; Io noyo ondo' mangala ra pantula' takano.