MAZMUR 106 - Tanou Moonsoi Timugon

Kinoonsoi ru Tuhan no ra ulun Nano

¹ Omporo' noyo Tuhan! Paringkuanang no ra Tuhan, sabap ra Io moonsoi; togom Nano mantilayun.

² Osoi kia makapantunung ra baal maayo ondo' binaal ru Tuhan? Osoi kia mokopongompor Riso ra sotopot-topot no?

³ Pakaansuk noyo ulun ondo' mambaal ra matimpok, ondo' masalok mambaal ra motopot.

⁴ Karaa' aku no, iou Tuhan, bulintok ra Okou mangindangan ra ulun Muno; bayago' aku niayuk, bulintok ra Okou mamayag risilo.

⁵ Gama' ru makakito aku ra ulun Muno lumangkaya' saguli', am gama' ru maansukan aku mababaya' ra ulun Muno, am niayuk marikamo mababaya' risilo ondo' masauk ra longgom Muno.

⁶ Natulaan akai koson niayuk ra kinamatuaan maili; mangalaat am mausung akai.

⁷ Bulintok giu' ra Misir kinamatuaan maili kalo nakarati' ra atan binaal Nano ondo' makaimuag; nalilianan nilo togom Nano ondo' lumuab, am lumaat ilo gumuor ra Io Ondo' Maayo Kaga' Kuasa' giu' ra Raat Galaga.

⁸ Kaa' bayagon No ilo sumugut ra bantu' Nali, koson mapaintalang ra kuasa' Nano ra maayo.

⁹ Susubon No Raat Galaga am raat no pana mapua', ibiton No ulun Nano mugar ra raat, koson mugar ra tana' kaagisan.

¹⁰ Koson raginio bayagon No ulun Nano intor ra kalindu' ru pantula' Nano, am mapalabus risilo intor ra kuasa' ru pantula' nilono.

¹¹ Kaa' timug mompolosor ra pantula' nilono; kolondo' sangulun pana naayag.

¹² Ulun Nano pana mangintopot ra bantu' Nano, am marimbai koson mongompor Riso.

¹³ Kaa' mataki' ilo makalilian ra binaal ru Tuhan, atan ayuk baalon nilo kolondo' pinson intor Riso.

¹⁴ Giu' ra tana' kaagisan masingkual patilaai ru guang nilono, am mangkinam ilo ri Aki Kapuuno';

¹⁵ ginio ra pataakon No atan kitaakon nilono, kaa' lugu malaat makatiu' risilo.

¹⁶ Giu' ra tana' kaagisan no sumolon ilo ri Musa, am niayuk ri Arun, ulipon Nano ra matulai.

¹⁷ Tana' ti pana nalapak, nonolon ri Datan, am namumpun ri Abiram am ilo sambaloi no;

¹⁸ apui riminatu' monolob ra maamaya' risilo, am mangumpo ra ngaangai' ondo' nangausung.

¹⁹ Giu' ra Gunung Sinai mambaal ilo ra sinungkalalaing anak ru sapi' mas, am sumamba ra sinungkalalaing raginio.

²⁰ Aligin nilo i Aki Kapuuno' ondo' matulai no ra sinungkalalaing ru sapi' mongkotop ra sakot.

²¹ Nalilianan nilo i Aki Kapuuno' ondo' namayag risilo, ondo' nambaal ra baal mangaayo giu' ra Misir.

²² Makaimuag toojo ngaangai' binaal Nano ra pagun no, makaimuag toojo binaal Nano giu' ra Raat Galaga.

²³ I Aki Kapuuno' pana makaguang mamuso ra ulun Nano; kaa' sinawai ri Musa, ulun pinili' Nano. I Musa minayantanga' risilo, saboi sangit ri Aki Kapuuno' liminook.

²⁴ Tuliarin nilo boo pagun ra maramai no, sabap ra kalo mangintopot ilo ra bantu' ri Aki Kapuuno'.

²⁵ Mambubutok ilo ra kim nilono am kalo mangkirongog ilo ra ragu ru Tuhan.

²⁶ Ralalom boo ru pator binantu' Nano ra mamatoi risilo giu' ra tana' kaagisan,

²⁷ am pantutuliaron No papag nilono ra ngaangai' bansa', saboi matoi ilo giu' ra pagun-pagun suai.

²⁸ Giu' boo ra Pior, ulun ri Aki Kapuuno' maya' sumamba ra Baal, am mangakan ra taak simbalui ondo' pataakon ra dewa-dewa ondo' kolondo' painawo.

²⁹ Binaal nilono mapasangit ra Tuhan, am lugu malaat makatiu' risilo.

³⁰ Kaa' i Pinigas minigor am mangukum ra ulun makasala, taru' boo lugu malaat no.

³¹ Binaal moonsoi nano kakaraan ru ulun, am io pana karaan saboi ra sabuoi-buoi no.

³² Napasangit ilo ra Tuhan giu' ra taur ru timug giu' ra Miriba, am mantipagon ri Musa ralalom ru binaal nilono.

³³ Ilo no napasangit kaga' riso, saboi siningkual no ragu-ragu ra kalo maaya' raguon.

³⁴ Bansa'-bansa' ra bokon kalo pinuso nilo koson ra atan nanusuban ru Tuhan.

³⁵ Kaa' natagandu' ilo piboo ra bansa'-bansa' raginio; am nanilu ra kaayagan ru ulun ondo' kalo makaulig ri Aki Kapuuno'.

³⁶ Ulun ri Aki Kapuuno' sumamba ra sinungkalalaing, am ginio mangkinibit risilo ra kapusaan.

³⁷ Pataakon nilo anak nilono galama' koson ra taak simbalui ra dewa-dewa ru pagun kanaan.

³⁸ Potoyon nilo anak-anak ondo' kolondo' sala, saboi pagun no jinamol ru pampatayan no.

³⁹ Baalon nilono mapajamol ra inan nilo galama', am kalo gumagaya' ilo ri Aki Kapuuno'.

⁴⁰ Ginio ra Tuhan sumangit ra ulun Nano; am mataman Io magilong risilo.

⁴¹ Pataakon No ilo ra kuasa' ru bansa'-bansa', am mompoloso ra pantula' manguasa' risilo.

⁴² Imboloon ilo ru pantula', kinuasa' ilo toojo.

⁴³ Magail ayuk Tuhan no mamayag ra ulun Nano, kaa' lakat ilo poyo manggal Riso, saboi tula nilono rumuang-ruang.

⁴⁴ Kaa' Tuhan mangkirongog ra pampiawan nilono, am magilong ra kapaganan nilono.

⁴⁵ Koson ra kaansayan nilo, karaan No nabantuan Nano, sabap ra togom Nano ra maayo, monogom Io risilo.

⁴⁶ Mangkinibit Io ra ngaangai' ru ulun ondo' mangimbolo' risilo no makaasi' risilo.

⁴⁷ Bayago' akai no, iou Tuhan, i Aki Kapuuno' mai, am ibito' akai no muli' intor ra bansa'-bansa', maa' raginio maringkuanang akai, am mongompor ra inggalan Muno ondo' matulai.

⁴⁸ Omporo' noyo Tuhan, i Aki Kapuuno' ru ulun ru Israil; omporo' noyo Io raino am sabuoi-buoi no! Polosoo' noyo ulun mindagu, “Amin!” Omporo' noyo Tuhan!