MAZMUR 105 - Tanou Moonsoi Timugon

I Aki Kapuuno' am ulun Nano

¹ Paringkuanang no ra Tuhan, potonowo' noyo katulayan Nano; tunungo' noyo binaal Nano ra bansa'-bansa'.

² Rimbayo' noyo pangamparan ra Tuhan; tunungo' noyo ngaangai' binaal Nano ondo' makaimuag no.

³ Pakaansuk kano sabap ra itakau ti Io ra longgom; ngaangai' ulun ondo' sumamba ra Tuhan, io no musiti' maansukan.

⁴ Pakiindangan no ra Tuhan, kasalok kano sumamba Riso.

^5-6 Akau papag ri Abragam, ulipon Nano, am papag ri Jakub, ulun pinili' Nano, karaa' noyo kaimuagan binaal ri Aki Kapuuno', pai' liliani' ragu kapatasan ra pinataak Nano.

⁷ Tuhan noyo i Aki Kapuuno' takau; panusuban Nano paugaron ra titikop ru tana' ti.

⁸ Ginuut No nabantuan Nano ra sabuoi-buoi no, bantu' Nano paugaron ra tayar ru baribu-ribu papag,

⁹ nabantuan ra binaal Nano ri Abragam, am bantu' Nano ri Isak,

¹⁰ am pinarayus No ri Jakub, nasauk ra nabantuan mantilayun ra tayar ru ulun ru Israil.

¹¹ Minindagu Io, “Pataakon Ku pagun ru Kanaan, koson masauk ra longgom tinungkus min.”

¹² Galing i ulun ri Aki Kapuuno' kalo masuang, kaayagan nilo giu' ra Kanaan koson ayuk ra ulun bansa' ru bokon.

¹³ Mugar ilo intor ra pagun mongoi ra pagun ra bokon, intor ra rondo' karajaan mongoi ra karajaan ra bokon.

¹⁴ Kaa' i Aki Kapuuno' kalo mopoloso ra ilo imboloon; sabap ra ilo, ngaangai' ru raja' pininson No ra ragu.

¹⁵ Minindagu Io, “Pai' min usigo' ulun-ulun ondo' pinili' Kuno; pai' min jamari' nabi-nabi Kuno!”

¹⁶ Bitilan pinaratong ri Aki Kapuuno' ra pagun nilono, am mangalap ra nansalinut akanon nilo.

¹⁷ Kaa' sinusub No i Jusup magulu risilo; i Jusup tinalan nilo koson ra ulipon.

¹⁸ Kalayam nano binangkil ra rantai am liog nano binangkil ra rantai basi',

¹⁹ saboi nasauk atan ondo' inala' nali. Ragu ru Tuhan napainono' poyo ra motopot i Jusup.

²⁰ Raja' ru Misir pana napalabus riso; ngaangai' mangunguasa' ru bansa' napalabus riso.

²¹ I Jusup linantik ru raja' ra tingganai ru karajaan nano, am sinauk no io ra mangunguasa' ru titikop pagun,

²² koson manaak ra panusuban ra tingganai mangngandoi ra raja', am koson maningganai ra nasuangan mampakara' ra raja'.

²³ Kopongo ragili minongoi i Jakub ra Misir, am namagun ra giu'.

²⁴ Sinauk ru Tuhan ulun Nano riminuang-ruang, saboi ilo maikang poyo ka pantula'.

²⁵ Tuhan noyo nangkinibit ra ulun ru Misir masisang ra ulun Nano, bansa' ru Misir namparuung ra ulipon-ulipon Nano.

²⁶ Io pana nanusub ri Musa, ulipon Nano, am i Arun, ulun ondo' pinili' Nano.

²⁷ Nambaal ilo ra kaimuagan intor ri Aki Kapuuno', am nambaal ilo ra kaimuagan giu' ra Misir.

²⁸ Sinauk ri Aki Kapuuno' titikop ru pagun raginio molondom, kaa' bansa' ru Misir kalo mampagagaya' ra panusuban Nano.

²⁹ Kinulau No timug ru sungoi nasauk ra raraa', am pinatoi No ngaangai' papait ru sungoi no.

³⁰ Antit nokososok ra pagun nilono, am niayuk siminuang ra istana ru raja'.

³¹ Ralalom ragu ri Aki Kapuuno', bulongor am pulias napapak ra titikop ru pagun no.

³² Pinaratu' No rasam mangasalag am timpalak koson suali ru rasam kopoyo.

³³ Pinuso No umo ru anggur am puun ru nunuk nilono, am niayuk linuar no ngaangai' ru puun tataun ra giu' no.

³⁴ Ralalom ragu Nano, gapu' matong, masuang kaga' saboi kalo mauntob;

³⁵ ondo' mangakan ra nansalinut tutuu' ra pagun nilono; am nangai' ra ngaangai' tatanom ra giu' no.

³⁶ Io pana namatoi ra ngaangai' anak ungkuyon ra katuaan, anak ungkuyon ra katuaan ru ngaangai' sasambaloi ru Misir.

³⁷ Kopongo ragili tiningganai No ulun ru Israil miningkual; inibit nilo pirok am mas, ilo ngaangai' maikang am maligag.

³⁸ Bansa' ru Misir malaa' ra ulun ru Israil, ginio ra ilo maansukan bulintok ra ulun ru Israil mugar.

³⁹ Biningkal ri Aki Kapuuno' gaun koson manindung ra ulun Nano, am nangani' ra apui koson maninda bulintok molondom.

⁴⁰ Makitaak ilo ra akanon, am inataran No susuit tantarau, binasug ilo ra ruti' intor ra limbowon.

⁴¹ Bulur batu linapak No, am timug tumampusis mingkual, am tumuluk koson ra sungoi giu' ra tana' kaagisan.

⁴² Makara' No nabantuan Nali ondo' matulai ri Abragam, ulipon Nano.

⁴³ Ginio niayuk ra Io naningganai ra ulun pinili' Nano mingkual; maririmbai ilo maansukan am magitapap ra longon.

⁴⁴ Pinataak No pagun ru ulun bansa' ru bokon no risilo, am umo-umo nilo sinauk ra longgom ru ulun Nano,

⁴⁵ maa' raginio ulun Nano gumagaya' ra ukum Nano, am mambaal ra ngaangai' panusuban Nano. Omporo' noyo Tuhan!