MAZMUR 104 - Tanou Moonsoi Timugon

Pangamparan ra Namangun

¹ Omporo' noyo Tuhan, alii ra salibuor kuno! Iou Tuhan, i Aki Kapuuno' kuno, mapara' piboo kinatulai Muno! Linibungan Kou ru katulayan,

² am liniputan Kou ru sinda. Biningkal Mu limbowon koson ra kim,

³ am manambaloi Kou ra intok masawat poyo kaga' intor ra limbowon. Tumampak Kou ra gaun am pansiabon Kou ru angin.

⁴ Saukon Mu angin koson ra sususubon Muno, am sinda ru ganit koson ra ulipon Muno.

⁵ Inatang Mu pioto' tana' ti ra napasanaran nano, saboi kalo boo igogondo' mauyog.

⁶ Liniputan Mu tana' ti ra raat, am timug napalinjob ra gunung;

⁷ kaa' timug pana miit bulintok ra Okou mansawai riso; timug no maaug toojo bulintok ra io makaining ra bolos mosongou Muno.

⁸ Timug tumuluk mongoi ra lampam mansail ra gunung, mongoi ra intok ondo' tinampos Mu noyo.

⁹ Inaru' Mu lolot ondo' kalo mabayaan, maa' raginio timug kalo boo sumakob ra tana' ti.

¹⁰ Taur ru timug sinauk Mu lumuab-luab ra lampam, am sungoi mongoborok tumuluk maya' mangkilolot ra bulur,

¹¹ koson inuman ru bibiag masigo, am koson momopok ra paas ru kaladai ru kataunan.

¹² Puun-puun ru tataun ondo' maginggaar, susuit pasapios am manabunsut.

¹³ Intor ra limbowon paratuon Mu rasam no ra gunung, tana' ti natikop ra barakat Muno.

¹⁴ Mapatuu' Kou ra sakot ondo' akanon ru sapi', am nansalinut tatanom ondo' akanon ru ulun, maa' raginio ulun makapagitanom,

¹⁵ am makabaal ilo ra tinapayan koson mapabansuk ra guang, umau jaitun koson mapakalunau ra bulos, am akanon koson manaak ra kaligagan.

¹⁶ Puun ru sidar giu' ra Libanon makaalap ra rasam masuang, puun-puun tataun ondo' tinanom ru Tuhan.

¹⁷ Ra giu' no susuit-susuit manabunsut, susuit kanawai manabunsut ra umbus nano.

¹⁸ Paus mayan ra bulur masawat, am karuui mayan ra pipilon.

¹⁹ Binangun Mu bulan koson tatandu' ru bulintok; mato ru orou pana makapandai ra paat nano tumolop.

²⁰ Sinauk Mu rondom am orou lumondom ngaangai' bibiag ru kataunan mantabulias.

²¹ Anak ru singa' magusig bulintok io mampalula', maguyum ra akanon ondo' tinaakan ri Aki Kapuuno'.

²² Bulintok orou sumirang, bibiag mamaguli' am magupu' ra intok pansibunian nano.

²³ Ulun pana mingkual mongoi pangandoi, am mangandoi suku' mamai'.

²⁴ Iou Tuhan, masuang kaga' binangun Muno! matuyu' toojo kandoi nambaalan Muno! tana' napanu' ra nansalinut ondo' maayag ra binaal Muno.

²⁵ Ilai' noyo kinapila' ru raat, am ilo ondo' maayag ra maayo am boborok, kalo mauntob.

²⁶ Giu' no kapal-kapal masundoi, am Liwiatan, maayo ulun ru raat binangun Muno mikukuli.

²⁷ Ngaangai' no lumansan Rirun, makipakan paat masuku' bulintok maangkan.

²⁸ Manaak Kou ra akanon, am ilo ondo' maayag binangun Muno mampalulur; paakanon Mu ilo ngai' saboi maasug.

²⁹ Bulintok ra okou manululit, ilo ondo' maayag ra binangun Muno malaa'; amon sagulion Mu paminawo Muno, ngaangai' no mapuso, am sumaguli' ra tana', masauk saguli' ra kaau.

³⁰ Kaa' paat ra Okou manaak ra pamainawo, ngaangai' no maayag; nanaak Kou ra kaayagan bagu ra tana' ti.

³¹ Gama' ru katulayan ru Tuhan mantilayun ra sabuoi-buoi no! Gama' ru maansukan Tuhan ra ngaangai' ru binangun Nano!

³² Pulolowon No tana' ti, tana' ti pana monontol; kumambong Io ra gunung, gunung pana makalisun.

³³ Rimbayin ku Tuhan buoi ru painawo kuno; marimbai aku mongompor ri Aki Kapuuno' kuno buoi ru painawo kuno.

³⁴ Gama' ru rimbai kuno mapabansuk ra guang Nano, sabap ra Io noyo napakaansuk ra guang kuno.

³⁵ Polosoon noyo ulun makatula luuson intor ra tana' ti, polosoon noyo ulun malaat maluus. Omporo' noyo Tuhan, alii ra salibuor kuno! Omporo' noyo Tuhan!