MAZMUR 102 - Tanou Moonsoi Timugon

Pakiasian ru ulun bulintok makakapaganan

¹ Pakiasian ru sangulun naimbolo' am naagui, ondo' mampalaa ra Tuhan.

² Rongogo' noyo pakiasian kuno, iou Tuhan, rongogo' noyo pampiawan kuno makiindangan.

³ Pai' aku talikuri' bulintok ra aku makakapaganan. Rongogo' aku bulintok ra aku mampiau, am taamo' noyo mataki' kitaakon kuno.

⁴ Kaayagan kuno lumiot koson ra lisun; inan kuno koson ayuk ra nosolob.

⁵ Patilansoi aku ayuk koson ra sakot nolonot, am kolondo' patiakan kuno.

⁶ Mapuor laa kuno; inan kuno najangkalap ayuk.

⁷ Koson aku ayuk ra susuit masigo giu' ra tana' kaagisan, koson ayuk ra puok giu' ra intok natuyas.

⁸ Kalo mokororot aku; koson aku ayuk ra susuit masilukan giu' ra pinuusan ru baloi.

⁹ Monsongorou pantula' kuno magasab raki'; ilo ondo' manganganja' raki' alapon nilo inggalan kuno koson magulas.

¹⁰ Kaau masauk ra akanon kuno, am inumon kuno mararatok ra lomou

¹¹ sabap ra sangit Muno ra bibilak. Kinayang am pinatiran Mu aku.

¹² Kaayagan kuno mansail koson ra babara' bulintok mamai'; lumonot aku koson ra sakot napua'.

¹³ Kaa' Okou, iou Tuhan, raja' ra sabuoi-buoi no; ngaangai' ru papag mangkara' Rirun.

¹⁴ Mingkakat Kou am makaasi' ra Sion; nasuku' noyo bulintok koson makaasi' riso; natimpok noyo bulintok ragitio.

¹⁵ Kabalu' pana Sion no nagagai, ngaangai' ru ulipon Muno motogom riso; kabalu' pana Sion no naluyu', makaasi' ilo riso.

¹⁶ Ngaangai' ru bansa' no malaa' ra Tuhan; ngaangai' raja' ru tana' ti malaa' ra kuasa' Nano.

¹⁷ Amon Sion no baalon saguli' ru Tuhan, pabalaan No katulayan Nano.

¹⁸ Iningon No pakiasian ru ulun Nano ondo' balabag, am kalo impayin No kitaakon nilono.

¹⁹ Patuliso' noyo nansalinut binaal ru Tuhan koson ilayan ru ulun ra tauli no, maa' raginio papag ra tauli no mokopongompor Riso.

²⁰ Manginduku' Tuhan ra ragana' intor ra intok Nano ra matulai, pulolowon No tana' ti intor ra suruga',

²¹ koson mangkirongog ra imamang ru ulun rinakop, am mapalabus ra ulun ondo' inukum ra potoyon.

²² Ginio ra, inggalan Nano potonowon giu' ra Sion; ompoporon Io giu' ra Jirusalim,

²³ bulintok ra ngaangai' bansa' am parinta mantitimung koson sumamba ra Tuhan.

²⁴ Kinalawo aku ru Tuhan bulintok ra aku lakat poyo mamulok; kariwaan No umur kuno.

²⁵ Iou Aki Kapuuno', pai' alapo' painawo kuno, ra aku kalo poyo matutuo. Okou maayag ra mantilayun;

²⁶ galing i tana' ti binangun Mu, limbowon pana kandoi ru kalindu' Muno galama'.

²⁷ Ngaangai' no mapuso, kaa' Okou soroi ayuk; ngaangai' no mapasa' koson ra konoon. Patirin Mu ngaangai' no koson ra bayang lairon; am ngaangai' no mapuso.

²⁸ Kaa' Okou ginio ayuk, kaayagan Muno kolondo' pupus.

²⁹ Ngaangai' anak maino moonsoi kinaayag-ayag, am papag nilono moonsoi ayuk ra sinindungan Muno.