MATIUS 8 - Tanou Moonsoi Timugon

Namabas i Jisus sangulun makamaruol ra kungkung ondo' maaja'

¹ Timinuun i Jisus intor ra bulur no am masuang ulun minaya' Riso.

² Sangulun ondo' makamaruol ra kungkung ondo' maaja' no pana riminatong am igulatur boo ra saang Nali. Indagu io, “Tuan, amon ru masaga' Kou, maalap Mu aku ra babas.”

³ Papuyayo' ri Jisus kalindu' Nali ra ulun no am indagu Io, “Masaga' Aku, kapali' no!” Paat ragili niayuk maruol nali napali'.

⁴ I Jisus pana mindagu riso, “Rongog, pai' pantunung ra baal ragitio ra osoi ayuk pana, kaa' parayus no ongoi tuum ra imam ru Jaudi, am pakitono' inan muno riso. Kopongo raginio pampataak boo ra taak koson ra nanusuban ri Musa. Gitio koson pampakitanan muno ra ngaangai' ulun ra napalian muno.”

Namabas i Jisus ra sangulun ulipon ru tingganai ru saujor Roma

⁵ Paat ri Jisus nakasuku' ra pekan Kapirnaum, sangulun tingganai ru saujor Roma timinuum am makitaak Riso,

⁶ “Tuan, sangulun ulipon kuno marualan ra malanjag. Soroi io ra baloi no am kalo makasukal.”

⁷ Indagu i Jisus riso, “Mongoi Aku pamabas riso.”

⁸ Kaa' taam tingganai ru saujor no, “Tuan, kalo pana rumatong Kou sabap ra aku ti kalo maaya' mangapu Rirun giu' ra baloi kuno. Panusub ayuk am ulipon kuno mairuan ra maruol.

⁹ Sabap ra aku pana galama' gumagaya' poyo ra susuban ru masawat intor raki'. Mokoondo' aku ra saujor susubon kuno. Amon ru manusub aku ra sangulun saujor, ‘Ugar!’ Io pana mugar. Amon ru mindagu aku ra ulun bokon ‘Ibok!’ Io pana matong. Amon ru manusub aku ra ulipon kuno, ‘Baalo' gitio!’ Io pana gumagaya'.”

¹⁰ Nangimuag i Jisus nakaining ra ragu raginio, am indagu Io boo ra ulun masuang ondo' sasunu'-sunu' Riso i, “Kalo igondo' Aku pakakito ra pangintapatan maayo koson ragitio, iou pana intor ra bansa' ru Israil.

¹¹ Karaa' min gitio! Masuang ulun sala' ka bansa' ru Jaudi mabubunsag mababaya' ri Abragam, i Isak am i Jakub giu' ra Tana' Bagu ri Aki Kapuuno'.

¹² Kaa' ulun-ulun ondo' sotopot no masauk ra ulun ri Aki Kapuuno' patirin giu' ra lisar ondo' molondom no. Giu' no pasalangis am sakuritot ayuk boo ripon nilono sabap ra maruol kaga'.”

¹³ Indagu boo i Jisus ra tingganai ru saujor no, “Uli' no, atan ondo' nangintapatan muni masauk rirun.” Paat niayuk ragili nairu' boo maruol ru ulipon ru tingganai ru saujor i.

Namabas i Jisus ra masuang ulun

¹⁴ Ongoi i Jisus ra baloi ri Pitrus. Ilai' no iwan ri Pitrus ra ruandu' no botoi-botoi sabap ra mansalom.

¹⁵ Kombongo' ri Jisus kalindu' nano am paat niayuk ragili salom no nairu'. Sukal io am pagayam boo ri Jisus.

¹⁶ Paat ra iomamai', ulun masuang nagibit ra ulun ondo' sinubol ru riwato paumaan ri Jisus. Pagiruo' ri Jisus riwato-riwato am babaso' No ngaangai' ulun marualan.

¹⁷ Gitio binaal i Jisus maa' raginio masauk boo ragu ru nabi Jisaya, “Io galama' nagibit ra kapaganan am napainggalur ra atan ayuk maruol takau.”

Ulun ondo' masaga' sumauk ra maamaya' ri Jisus

¹⁸ Ilai' ri Jisus masuang ulun liminimpu Riso i, am susubo' maamaya'-maamaya' Nano mongoi ra sandaup ru tasik no.

¹⁹ Sangulun mangingila' ra Ukum ri Musa minuma' ri Jisus am indagu, “Mangingila', masaga' aku maya' Rirun ra ati ayuk pana angayan!”

²⁰ Taam i Jisus, “Munin mokoondo' ra luang no galama' am susuit mokoondo' ra bunsut no galama', kaa' Anak ru Ulun kolondo' intok luyaan am tangusan.”

²¹ Sangulun maamaya' ra bokon no pana minindagu, “Tuan, ongoyo' ku poyo galing lobongo' baangkai ru ama' kuli.”

²² Kaa' taam i Jisus, “Polosoo' ayuk ra ulun ondo' kalo maya' Raki' mompolobong ra baangkai no am baya' no Raki'.”

Nampalinos i Jisus ra bagiu' mapuor

²³ Sakoi i Jisus am maamaya'-maamaya' Nano ra rondo' parau.

²⁴ Namulali' bagiu' mapuor kaga' no ra tasik saboi nototop parau i ra timug. Paat ragili nombolong i Jisus.

²⁵ Maamaya'-maamaya' Nano nangkarat Riso. Konilo, “Tuhan, indangano' akai! Makalom takau!”

²⁶ Taam i Jisus, “Kua kalaa' kau? Topot-topot noyo malawo pangintapatan min!” I Jisus pana siminukal boo am palinoso' bagiu' am kinulun no. Linos boo bagiu' no am maliuk boo kaga'.

²⁷ Ilo ngaangai' pana nangimuag. Konilo, “Atan ra ulun Io ti saboi bagiu' am kinulun pana gumagaya' ra susuban Nano!”

Namabas i Jisus ruo ngaulun ondo' sinubol ru riwato

²⁸ Pakasuku' i Jisus ra sandaup ru tasik, ioginio libung ru Gadara, ruo ngaulun ondo' sinubol ru riwato timinuum Riso. Ilo ruo ti miningkual intor ra intok ru pampalabangan. Malaat ilo kaga' saboi kolondo' ulun makakau' mansail ra intok raginio.

²⁹ Golok ilo, “Atan pamakuan Mu ramon, Oi Anak ri Aki Kapuuno'? Mangukum Kono kia ramon ra kalo poyo nasuku' orou inaru' no?”

³⁰ Kalo maalur intor ra giu' no, mokoondo' sampanon ru bauwi naginakan.

³¹ Riwato-riwato no nakitaak ri Jisus, “Amon ru susubon Mu akai mingkual, pasubolo' akai no ra sampanon ru bauwi no.”

³² “Ongoi kano!” kon ri Jisus. Parayus riwato-riwato no ingkual intor ra ruo ngaulun i am subol ra sampanon ru bauwi no. Ngaangai' ru bauwi no timinindak ra lagam ralalom ru tasik am kolosor.

³³ Ulun-ulun magagalung ra bauwi no nasimbul uli' ra pekan am pantunung ilo ngaangai' baal raginio, am atan ondo' nasauk ra ruo ngaulun ondo' sinubol ru riwato i.

³⁴ Ngaangai' ulun ru pekan i minongoi tuum ri Jisus. Paat ra ilo nakakito ri Jisus, kitaakon nilo i Jisus mangiruan ra intok nilono.