MATIUS 6 - Tanou Moonsoi Timugon

Pangilaan intor ra taak

¹ “Karaa' min, pai' kau pambaal ra kandoi ru ugama mino ra tatanga' ru ulun masuang koson makito kau ru ulun. Amon ru baalon min koson raginio ra tatanga' ru ulun no, akau ti matatakan ra barakat ri Ama' min giu' ra suruga'.

² “Paat ra akau manaak, pai' min sisiraa' baal ragitio koson ondo' baalon ru ulun maabau-abau giu' ra baloi sambayangan am niayuk giu' ra lilisangon ru ralan, sabap ra makiompor ilo ra ulun. Karaa' min, ilo ti nakaalap noyo ra ampos nilono.

³ Kaa' akau, paat ra manaak kau, pataaki' min noyo taak mino ra kolondo' sangulun pana makatutun, iou pana rangan mino galama'.

⁴ Polosoo' ayuk ra masauk koson raginio ra akau ayuk makapandai. Ama' min ondo' makakito ra baal moonsoi makasibuni no mangatang Io ra barakat no ramuyun.”

Pangilaan intor ra makiasi'

⁵ “Paat ra akau makiasi', pai' kau tilu ra ulun-ulun ra maabau-abau. Ilo ti masaga' mangintairoi am makiasi' giu' ra baloi sambayangan am poyo giu' ra lilisangon ru ralan koson makiilong ilo ra ulun. Karaa' min, ilo ti nakaalap noyo ra balos nilono.

⁶ Kaa' paat ra akau makiasi' subol no ra lamin mino am angabi', am pakiasi' no ri Ama' mino ondo' kalo makito no. I Ama' mino ondo' makapandai ra baal moonsoi mino ra makasibuni no, mangatang ra barakat no ramuyun.

⁷ “Paat ra akau makiasi', pai' kau pambabawar ra ragu kolondo' onong koson ra ragu ru ulun kalo makaulig ri Aki Kapuuno'. Indoson nilo ra rongogon ilo ri Aki Kapuuno' sabap ra maawar pakiasian nilono.

⁸ Pai' kau tilu risilo. Nakapandai pagulu i Ama' mino ra atan ayuk kitaakon mino ra akau kalo poyo nakitaak i.

⁹ Sotopot no koson ragitio akau makiasi': ‘Ama' mai giu' ra suruga', omporon inggalan Muno.

¹⁰ Gama' ru Okou mamarinta saboi kasagaan Muno saukon ra tana' ti mogondo' giu' ra suruga'.

¹¹ Anii' akai no ra akanon ra orou raiti'.

¹² Ampuno' noyo tula mai, koson akai niayuk mangampun ra ulun ondo' makatula ramon.

¹³ Palabuso' akai no intor ra pangkinaman am ampini' no akai intor ra kuasa' ru kalaatan. [Sabap ra Okou no Raja' ondo' matulai am makakuasa' sabuoi-buoi no. Amin.]’

¹⁴ Amon ru ampunon min tula ru ulun ondo' makatula ramuyun, Ama' min giu' ra suruga' pana mangampun ra tula mino.

¹⁵ Kaa' amon ru kalo ampunon min tula ru ulun, Ama' min giu' ra suruga' niayuk kalo mangampun ra tula mino.”

Pangilaan intor ra mampali

¹⁶ “Paat ra akau mampali, pai' no parikarus koson ra ulun-ulun maabau-abau. Kalo manginjagup ilo koson makiilong ra ulun ra ilo ti mampali. Karaa' min, ilo ti nakaalap noyo ra balos.

¹⁷ Paat ra akau mampali, injagupi' noyo bulos mino am surayo' noyo abuk mino,

¹⁸ maa' raginio kolondo' sangulun pana makapandai ra akau ti mampali, ondo' ak am Ama' min ondo' kalo makito no, Io ayuk makapandai. Ama' min ondo' makapandai ra baal moonsoi mino ra makasibuni no, mangatang ra barakat no ramuyun.”

Rapu' giu' ra suruga'

¹⁹ “Pai' no panimung ra rapu' ra tana' ti, ondo' maapu' ru lipos am togol am tokowon ru mantatakou.

²⁰ Panimung no ra rapu' ru suruga' ondo' kalo maapu' ru lipos am togol am kalo matakou ru mantatakou.

²¹ Sabap ra ati ayuk rapu' mino, giu' niayuk guang mino!”

Silau ru inan

²² “Mato muno koson ra lampung ru inan. Amon ru mato muno moonsoi, ngaangai' inan muno matawangan ru sinda no.

²³ Kaa' amon ru mato muno malaat, ngaangai' inan muno molondom. Ginio ra amon ru liminondom noyo lampung muno, aibui boo ra loolondom no.”

I Aki Kapuuno' am rapu'

²⁴ “Kolondo' sangulun pana ulipon makapangandoi ra ruo tuan: sangulun kasisangin no am sangulun tagamin no; kapoam gumagaya' io ra sangulun am magasab ra bokon no. Koson niayuk ramuyun ra kalo makapangandoi ri Aki Kapuuno' magampan ra kalangkayaan.

²⁵ “Ginio ra balain takamin: Pai' kau kaimamang ra bayag mino koson ra atan akanon am inumon kapoam atan bayang sulungin. Sala' ka kia kaayagan maatang intor ra mangakan, am inan maatang intor ra bayang?

²⁶ Ilai' min ayuk susuit-susuit ondo' mansisiab, kalo mantanom ilo ra sampug kapoam mangkumos am niayuk manimung ra akanon ra gudang, kaa' Ama' min giu' ra suruga' mampaakan risilo! Sala' ka kia maatang kau kaga' intor ra susuit-susuit no?

²⁷ Osoi intor ramuyun no makaalap maayag ra mabuoi ru maimamang io ra bayag nano?

²⁸ Kua kaimamang kau ra atan bayang sulungin? Ilai' min ati kulaan busak tumuu' giu' ra limayak: kalo mangandoi ilo kapoam mambaal ra konoon.

²⁹ Kaa' balain takamin: Kabalu' pana langkaya' toojo i Raja' Salomo, kalo nakapambayang io koson ra kinoonsoi ru busak ti!

³⁰ Amon ru koson poyo raginio i Aki Kapuuno' namaramai ra limayak no ra sakot, ondo' mokoondo' ra orou raiti' am susuab solobon ralalom ru rapuan, sala' ka kia ramayon kau toojo ri Aki Kapuuno'? Topot-topot kalo maikang pangintapatan mino!

³¹ Pai' kau kaimamang am mindagu ra: ‘Atan nua' akanon kuti, kapoam atan nua' inumon kuti kapoam atan nua' bayangon kuti?’

³² Baal koson raginio noyo masalok karaan ru ulun ondo' kalo makatutun ri Aki Kapuuno'. I Ama' mino giu' ra suruga' nakapandai ra kitaakon mino ra ngaangai' raginio.

³³ Sotopot no, gogoto' min galing ra i Aki Kapuuno' mamarinta ra kaayagan mino am baalo' noyo kasagaan Nano, am aniin kau boo ri Aki Kapuuno' ra ngaangai' baal ra bokon no.

³⁴ Ginio ra pai' kau kaimamang ra baal suabon no, sabap ra suabon no mokoondo' noyo kaimamangan no galama'. Pai' noyo ruangi' kapaganan ra orou raiti' ondo' sama' noyo.”