MATIUS 5 - Tanou Moonsoi Timugon

Mampatanou i Jisus giu' ra bulur

¹ Ilai' ri Jisus ulun masuang no, pagaloi Io boo ra bulur am panturung. Maamaya'-maamaya' Nano timinimung liput Riso,

² am tumalimpuun Io boo mangila' risilo:

Kaansukan ondo' motopot am mantilayun

³ “Pakaansuk noyo ulun ondo' makapandai ra ilo masuang tula, sabap ra ilo no ulun ri Aki Kapuuno'.

⁴ Pakaansuk noyo ulun ondo' manulaboi, sabap ra bansukon ilo ri Aki Kapuuno'.

⁵ Pakaansuk noyo ulun ondo' minggana' guang, sabap ra makaapu ilo ra ondo' binantu' ri Aki Kapuuno'.

⁶ Pakaansuk noyo ulun ondo' maguyum ra kasagaan ri Aki Kapuuno', sabap ra basugon ilo ri Aki Kapuuno'.

⁷ Pakaansuk noyo ulun ondo' maluoi makaasi' ra ulun ra bokon, sabap ra i Aki Kapuuno' niayuk makaasi' risilo.

⁸ Pakaansuk noyo ulun ondo' mapasau guang, sabap ra makakito ilo ri Aki Kapuuno'.

⁹ Pakaansuk noyo ulun ondo' magibit ra kaansayan ra tatanga' ru ulun, sabap ra piawon ilo ra anak ri Aki Kapuuno'.

¹⁰ Pakaansuk noyo ulun ondo' kasisangin sabap ra mambaal ayuk ra kasagaan ri Aki Kapuuno', sabap ra ilo noyo ulun ri Aki Kapuuno'.

¹¹ Pakaansuk kano amon ru asabin, imboloon am niayuk ilaaton kau ru ulun, sabap ra akau mangintopot Raki'.

¹² Koson niayuk ra galing i ra nangimbolo' ilo ra nabi-nabi ondo' naayag pagulu ramuyun. Pakaansuk kano, sabap ri Aki Kapuuno' mangatang ra ampos maayo kaga' ramuyun giu' ra suruga'.”

Usi' am lampung

¹³ “Mogondo' ra usi' no mampagamis ra akanon, koson niayuk akau mopokoonsoi ra ulun ru tana' ti. Amon ru mapalo usi' no, ati kulaan boo mampakaasin? Kolondo' boo onong. Patirin am kikinjangin ayuk boo ru ulun.

¹⁴ Mogondo' ra lampung no manilau ra intok molondom, koson niayuk akau magibit ra silau ra tana' ti. Bandar ondo' binaal ra tampak ru bulur no kalo maalap ra buni.

¹⁵ Kolondo' sangulun pana mansikit ra lampung am taubin boo ra pasu', kaa' patampakon ra tatampakan ru lampung maa' raginio masilau no ngaangai' ulun ralalom ru baloi no.

¹⁶ Koson raginio niayuk boo ra lampung mino musiti' manilau ra saang ru ulun, maa' raginio makakito ilo ra baal moonsoi mino am mongompor ri Ama' mino giu' ra suruga'.”

Pangilaan ra Ukum ri Musa

¹⁷ “Pai' kau pangkara' ra Aku matong mamuso ra Ukum ri Musa am pangilaan ru nabi-nabi. Aku matong sala' ka mamuso kaa' maa' raginio ngaangai' pangilaan no masauk.

¹⁸ Karaa' min! Buoi ru limbowon am tana' ti lakat ayuk poyo soroi kolondo' rondo' pana ralalom ru Ukum ri Musa ti pusoon amon ru ngaangai' no kalo poyo nasauk.

¹⁹ Ginio ra osoi ayuk pana manggal ra Ukum ri Musa kabalu' pana koborok ayuk am koson niayuk raginio mangila' io ra ulun ra bokon, ulun raginio karaan kalo maatang ra gino ngai' ru ulun ri Aki Kapuuno'. Kaa' osoi ayuk pana gumagaya' ra Ukum ri Musa am mangila' ra ulun ra bokon koson raginio, ulun raginio karaan maatang ra gino ngai' ru ulun ri Aki Kapuuno'.

²⁰ Balain takamin: Amon ru gumagaya' kau toojo ra kasagaan ri Aki Kapuuno' intor ra mangingila' ra Ukum ri Musa am ulun-ulun ru Parisi, bagu no masauk kau ra ulun ri Aki Kapuuno'.”

Pangilaan intor ra sumangit

²¹ “Maaru' nokorongog kau ondo' pinabala' ra kinamatuaan takali, ‘Pai' no pamatoi ra ulun; osoi ayuk pana mamatoi, io ti ibiton ra saang ru akim.’

²² Kaa' raino ti balain takamin: Osoi ayuk pana sumangit ra pabukat nano, io ti ibiton ra saang ru akim; am osoi ayuk pana magulas ra pabukat nano, io ti ibiton ra Majlis Ugama; am osoi ayuk pana mampiau ra pabukat nano ra ‘malaat’, io ti pasubolon ra naraka.

²³ Ginio ra, amon ru masaga' kou mampataak ra taak muno ri Aki Kapuuno' ra rasawat ru altar, am makakara' kou ra mokoondo' pabukat muno masisang rirun,

²⁴ polosoo' mu ayuk poyo taak no ra giu' no am mongoi pansaung galing ra pabukat muno, bagu no sumaguli' mongoi pampataak ra taak muno ri Aki Kapuuno'.

²⁵ Amon ru mokoondo' sangulun masaga' manguu' rirun ra saang ru akim giu' ra makama, pobonsoi kano buoi akau kalo poyo makasuku' ra giu' no. Amon ru kalo, ulun raginio mampataak rirun ra akim am akim no mampataak rirun ra pulis, am pulis no boo mampasubol rirun ra lamin pangaputan.

²⁶ Balain takamin: Aputon kau ra lamin pangaputan no suku' mabayaran min ngaangai' sagit mini.”

Pangilaan intor ra lumapau

²⁷ “Maaru' nokorongog kau ra pangilaan: ‘Pai' kau lapau!’

²⁸ Kaa' raino ti balain takamin: Osoi ayuk pana monontong ra ruandu' am makaguang io, ulun raginio liminapau noyo ra ruandu' no ralalom guang nano.

²⁹ Amon ru mato pamiris muno mangkinibit rirun makatula, kuolo' am patiri'! Moonsoi poyo ra matatakan kou ra santayaran ru inan muno intor ra ngaangai' ru inan muno patirin ra naraka.

³⁰ Amon ru kalindu' pamiris muno mangkinibit rirun makatula, pungguo' am patiri'! Moonsoi poyo ra matatakan kou ra sakalinduan intor ra ngaangai' ru inan muno pasubolon ra naraka.”

Pangilaan intor ra pangalian

³¹ “Mokoondo' niayuk pangilaan: ‘Osoi ayuk pana mangali ra andu' nano musiti' io manaak riso ra surat pangalian!’

³² Kaa' raino ti balain takamin: Osoi ayuk pana mangali ra andu' nano, kaa' ondo' ayuk ra io lumapau, io ti mangkinibit ra andu' nali lumapau amon ru mangindalaki io poyo. Ungkuyon ondo' manangandu' ra ruandu' i niayuk makaaya' ra baal lumapau.”

Pangilaan intor ra magibot

³³ “Maaru' nokorongog kau ondo' pinabala' ra kinamatuaan takali: ‘Pai' lungkang ra bantu' mino, kaa' suguto' noyo ondo' inibot min ra saang ru Tuhan.’

³⁴ Kaa' raino ti balain takamin: Pai' kau pagibot! Pai' kau pagibot ra limbowon no alapon min ra sasi', sabap ra limbowon no kurisi' turungan ri Aki Kapuuno',

³⁵ kapoam tana' ti alapon min ra sasi', sabap ra tana' ti papakirawan ri Aki Kapuuno' ra kalayam Nano; kapoam bandar Jirusalim alapon min ra sasi', sabap ra ginio bandar ru raja' maayo toojo.

³⁶ Pai' pagibot ra ulu mino alapon min ra sasi', sabap ra akau ti kolondo' kuasa' mampakapulak kapoam mampakaitom ra abuk mino.

³⁷ Sama' noyo ra akau mindagu ayuk ra ‘Iou’ kapoam ‘Kalo’. Ngaangai' raguon min ra bokon no intor boo ra Tingganai ru riwato.”

Pangilaan intor ra pambabalos

³⁸ “Maaru' nokorongog kau ra pangilaan: ‘Mato aligin ra mato; ripon aligin ra ripon.’

³⁹ Kaa' raino ti balain takamin: Pai' noyo balasi' ulun ondo' makasala rirun. Amon ru lapison ru sangulun pingas muno ra pamiris no polosoo' io niayuk mampalapis ra pingas muno ra kait no.

⁴⁰ Amon ru uwin kou ru sangulun giu' ra makama am mompogogot ra bayang muno, pataaki' noyo riso sukub muno poyo.

⁴¹ Amon ru jajalin kou ru sangulun saujor mamarinta magibit ra kuliamos nano galur rondo' kilomito, ibito' noyo kuliamos nano suku' ruo ngakilomito.

⁴² Amon ru mokoondo' sangulun makitaak ra atan ayuk pana intor ramuyun, anii' io no. Amon ru mokoondo' sangulun magira' ra atan ayuk intor ramuyun, pairaa' io no.”

Monogom ra pantula'

⁴³ “Maaru' nokorongog kau ra pangilaan: ‘Tagami' noyo rangan mino am kasisang no ra pantula' mino.’

⁴⁴ Kaa' raino ti balain takamin: Tagami' noyo pantula' mino am pakiasi' kano koson ra ulun ondo' mangimbolo' ramuyun,

⁴⁵ maa' raginio masauk kau ra anak ru Ama' min giu' ra suruga'. Sabap ra pinoloso ri Aki Kapuuno' mato ru orou Nano sumirang ra ngaangai' ulun ondo' moonsoi am malaat. Io niayuk mampatuun ra rasam no ra ngaangai' ulun, ondo' mambaal ra moonsoi am niayuk ondo' mambaal ra malaat.

⁴⁶ Atan barakat maalap min intor ri Aki Kapuuno' amon ru motogom kau ayuk ra ulun ondo' motogom ramuyun? Sala' ka kia ulun mampalulur ra cukai pana mambaal koson raginio niayuk!

⁴⁷ Amon ru rangan mino ayuk tabion min atan niayuk bonsoi no? Ulun ondo' kalo makaulig ri Aki Kapuuno' pana mambaal niayuk koson raginio!

⁴⁸ Sauk kano ra ulun matanda', koson ri Ama' min giu' ra suruga' no matanda'.”