MATIUS 26 - Tanou Moonsoi Timugon

Mangatang mamatoi ri Jisus

¹ Kakai' ayuk i Jisus nangila' ra baal ragili, indagu Io ra maamaya'-maamaya' Nano,

² “Koson raino nakapandai kau, ruo ngoorou poyo Pangiantakan ra Paska am Anak ru Ulun pataakin ra salipon!”

³ Tingganai-tingganai imam Jaudi am tingganai ru ulun ru Jaudi pana timinimung boo am magindagu giu' ra istana ru Tingganai Maayo Imam Jaudi, i Kayapas.

⁴ Ilo ti mangatang ra pamparakapan ri Jisus ra mamatoi Riso ra sinokon ayuk.

⁵ Kaa' konilo, “Pai' takau sasati' ginio ra paat pangiantakan no, sabap ra mamagun kumuliangi-angi lair.”

Inumau i Jisus ra umau maamis owou ra Bitania

⁶ Paat ri Jisus soroi ra Bitania, giu' ra baloi ri Simon ondo' ra galing i nakamaruol ra kungkung ondo' maaja',

⁷ sangulun ruandu' minatong ri Jisus am nagibit ra rondo' butul pualam makasuang ra umau maamis owou ra mologo. Tatanga' i Jisus nangakan, pabuuro' ru ruandu' i umau no ra ulu ri Jisus.

⁸ Maamaya' ri Jisus ni nakakito ra baal raginio, am sangit ilo, “Kua lubato' mu ginio?” konilo,

⁹ “Umau raginio maalap katalan ra mologo kaga' am ruit no tatayaron ra ulun musikin!”

¹⁰ Nakapandai i Jisus ra atan rinagu ru maamaya' Nano, am indagu Io boo risilo, “Kua sangit kau ra ruandu' ti? Ondo' binaal nati Raki' moonsoi kaga'.

¹¹ Ulun musikin masalok mabaya' ramuyun, kaa' Aku kalo mantilayun mabaya' ramuyun.

¹² Ondo' binaal ru ruandu' ti ra nampabuur ra umau maamis owou ra ulu Kuti, gitio mamintor ra pampalabangan Raki'.

¹³ Karaa' min gitio; ati-ati ayuk ra tana' ti Tanou Moonsoi ti potonowon, ondo' binaal ru ruandu' ti patunungon masauk ra pangkaraan riso.”

Mangiou i Judas mampataak ri Jisus

¹⁴ Sangulun intor ra mopor am ruo maamaya' ri Jisus, ondo' ininggalanan i Judas Iskariot, minuma' boo ra tingganai-tingganai imam Jaudi am indagu,

¹⁵ “Atan panganian min raki' amon ru pataakin ku i Jisus ramuyun?” Panguntob ilo talu ngoopor ruit pirok am taaki' ri Judas.

¹⁶ Intor raginio naguyum i Judas ra kaluagan papataakan no ri Jisus ra tingganai-tingganai imam Jaudi.

Nagagakan i Jisus am maamaya'-maamaya' Nano ra akanon ru Pangiantakan ra Paska

¹⁷ Paat ra orou kasaa' ru Pangiantakan Ruti' Kalo Linatakan ra Ragi, maamaya' ri Jisus minuma' Riso am pangkuot, “Ati kia kasagaan Muno pongoonon mai pagakanan ru Paska no?”

¹⁸ Taam i Jisus, “Ongoi uma' ra sangulun giu' ra bandar am balai', ‘Kon ru mangingila'; Orou Kuno nasuku' noyo, Aku am maamaya'-maamaya' Kuno masaga' mangiantak ra Orou Paska ra baloi muno.’ ”

¹⁹ Maamaya'-maamaya' Nano nanugut ra bilin ri Jisus ti am pongoono' nilo noyo pagakanan ru Paska no.

²⁰ Paat ra molondom i Jisus am mopor am ruo maamaya' Nano nanturung nangakan.

²¹ Tatanga' ilo nangakan indagu i Jisus, “Balain takamin: Sangulun intor ramuyun ti mampataak Raki' ra pantula'.”

²² Maamaya'-maamaya' Nano tumalimpuun boo mangiluk guang, rorondo' ilo boo mangkuot ri Jisus, “Maaru' sala' ka aku kon Muno Tuhan?”

²³ Taam i Jisus, “Ulun ondo' mompososop ra ruti' mabaya' Raki', ulun raginio noyo mampataak Raki'.

²⁴ Anak ru Ulun matoi koson ra tinulisan ra Buuk Kitab. Kaa' mumpara' boo lalaat ra ulun ondo' mampataak ra Anak ru Ulun! Mulu' bonsoi ru ulun no ra kalo inanak!”

²⁵ I Judas ra mamparuung ti indagu, “Maaru' sala' ka aku kon Muno Mangingila'?” Taam i Jisus, “Ginio noyo ragu muno!”

Pagakanan ru Tuhan

²⁶ Tatanga' ilo nangakan, alapo' ri Jisus sampila' ruti' am pakiasi' ra paringkuanangan, am pipilango' No ruti' i. Tatayaro' No ra maamaya'-maamaya' Nano am indagu, “Alapo' am akano', gitio noyo inan Kutu.”

²⁷ Alapo' No boo sangkir am pakiasi' ra paringkuanangan ri Aki Kapuuno', am pataaki' No sangkir i ra maamaya'-maamaya' Nano am indagu, “Panginum kano ngai' ragitio.

²⁸ Sabap ra gitio noyo raraa' Kutu ondo' mampainono' ra nabantuan ri Aki Kapuuno', ioginio raraa' Kuno ondo' pasasaron, maa' raginio tula ru masuang ulun ampunon.

²⁹ Balain takamin: Kalo boo manginum Aku ra wain ti saboi ra orou i Ama' tumalimpuun mamarinta am paat raginio bagu manginum Aku ra wain baguon mabaya' ramuyun.”

³⁰ Kopongo ilo narimbai ra rimbai mongompor ri Aki Kapuuno', ugar ilo ongoi ra Bulur Jaitun.

Manala' i Jisus ra magali' i Pitrus Riso

³¹ I Jisus pana indagu boo ra maamaya'-maamaya' Nano, “Rondom raiti' niayuk magiru' am manatang kau Raki'. Sabap ra tinulisan noyo ra Buuk Kitab ra, ‘Potoyon Ku magagalung no am sampanon ru domba no mantutuliar boo.’

³² Kaa' malupus Aku bayagon saguli' intor ra kapatayan, sumigulu Aku ramuyun mongoi ra Galilia.”

³³ Kon ri Pitrus ri Jisus, “Iou pana ngaangai' ra bokon no manatang Rirun, kaa' aku kalo.”

³⁴ Indagu i Jisus riso, “Ilalai', kalo poyo maningkuluuk manuk tandaa' no ra rondom raiti', intalu kono pagali' ra kalo nakaulig Raki'.”

³⁵ Taam i Pitrus, “Ati kulaan mindagu aku ra kalo nakaulig Rirun? Matoi aku pana marumar ayuk Rirun.” Ngaangai' maamaya' ra bokon pana minindagu koson ragino.

Makiasi' i Jisus giu' ra Gitsimani

³⁶ I Jisus am maamaya'-maamaya' Nano ugar boo ongoi ra rondo' intok ondo' ininggalanan ra Gitsimani. Indagu Io risilo, “Panturung kau ragiti. Mongoi Aku pakiasi' ra giu' no.”

³⁷ Inibit ri Jisus i Pitrus am karuo anak ri Jibidius. Mangiluk toojo guang ri Jisus am malimanan No kaimbalaan.

³⁸ Indagu boo i Jisus ra maamaya'-maamaya' Nano, “Mangiluk kaga' guang Kutu, koson matoi pamalimanan Kuno. Paginaa kano ragiti am pai' kau pombolong.”

³⁹ Ugar i Jisus inggalur koborok risilo am kubu ra tana' am pakiasi', “O Ama', amon ru maalap ayuk painggaluro' sangkir kaimbalaan ti intor Raki'! Kaa' pai' gagayaa' kitaakon Kuti, kaa' maya' ra kasagaan Muno Ama'.”

⁴⁰ Saguli' Io boo ra talu ngaulun maamaya' Nano am ilai' No nombolong ilo. Indagu Io ri Pitrus, “Kua ra akau talu ti kalo makapaginaa mabaya' Raki' saboi sanjam ayuk pana?

⁴¹ Ilalai' min am pakiasi' kau koson kalo maratu' kau ra pangkinaman. Sotopot no, ambiluo mino masaga' mambaal ra motopot kaa' kalo magagaya' min sabap ra paliso ru ulun malawo.”

⁴² Saguli' poyo i Jisus ongoi pakiasi', “O Ama', amon ru sangkir kaimbalaan ti kalo maalap ra inggalur, polosoo' Aku manginum no maya' ra kasagaan Muno Ama'.”

⁴³ Saguli' poyo i Jisus am ilai' No maamaya'-maamaya' Nano nombolong ilo poyo saguli'! Matikoolong ilo kaga'.

⁴⁴ Igondo' poyo i Jisus mininggalur risilo am ongoi pakiasi' poyo ra kaintalu am nogondo' ayuk pakiasian no ra pagulu ni.

⁴⁵ Saguli' poyo i Jisus ra maamaya'-maamaya' Nano am indagu, “Lakat kapo kia mombolong am tumangus? Ilai' min! Nasuku' noyo paat ra Anak ru Ulun ti pataakin ra kuasa' ra ulun makatula.

⁴⁶ Karat kano, mugar takau! Ilai' min! Io ondo' mampataak Raki' nakaratong noyo!”

Rinakop i Jisus

⁴⁷ Liliwa' i Jisus lakat ayuk poyo mindagu, ratong i Judas nabaya' ra ulun masuang ondo' nagibit ra ilang am lalamba'. Sinusub ilo ru tingganai-tingganai imam Jaudi am tingganai-tingganai ru ulun ru Jaudi.

⁴⁸ Ulun mampataak no nangaru' noyo rondo' tatandu' ra ulun masuang, kono, “Osoi ondo' ganggalin am alakin kuno, ulun raginio noyo uyumon min. Rokopo' min Io no.”

⁴⁹ Pakasuku' ayuk i Judas parayus io ongoi uma' ri Jisus am indagu, “Kaansayan Rirun Mangingila'.” Io pana ganggol am alok ri Jisus.

⁵⁰ Taam i Jisus, “O rangan, ribaki'!” Paat raginio ulun masuang matong am rokopo' nilo i Jisus am ikangi' nilo guuto'.

⁵¹ Sangulun maamaya' ri Jisus paakango' no ilang am piaso' no talingo ru ulipon ru Tingganai Maayo Imam Jaudi.

⁵² Indagu i Jisus riso, “Paangkapo' sagulio' ilang muno, sabap ra ngaangai' ulun ondo' manangilang potoyon ra ilang.

⁵³ Kalo kia nakapandai kou ra amon ru makiindangan Aku ayuk ri Ama' Kuno, mangator Io masuang poyo intor ra mopor am ruo ngampulalai malaikat ondo' riribu suang nilo.

⁵⁴ Kaa' amon ru koson raginio, ati koson masauk ondo' tinulisan ra Buuk Kitab, kono, baal ragitio musiti' pasaukon.”

⁵⁵ I Jisus pana indagu boo ra ulun masuang no, “Ulun malaat Aku kia saboi matong kau magibit ra ilang am lalamba' koson mamparakop Raki'? Moonong orou soroi Aku mangila' ra Baloi Tuhan am kalo rinakop min Aku!

⁵⁶ Kaa' ngaangai' baal ragitio maaru' masauk koson mampainono' ondo' tinulisan ru nabi-nabi ra Buuk Kitab.” Ngaangai' maamaya' Nano pana nagiru' boo nangiruan ri Jisus.

Inibit i Jisus ra Majlis Ugama

⁵⁷ Karakop nilo i Jisus, ibito' nilo ra baloi ru Tingganai Maayo Imam Jaudi, i Kayapas. Giu' no naginaa noyo mangingila'-mangingila' ra Ukum ri Musa am tingganai-tingganai ru ulun ru Jaudi.

⁵⁸ I Pitrus nansinok ayuk intor ra maalur. Sinunu' no i Jisus suku' ra baloi ru Tingganai Maayo Imam Jaudi. Subol i Pitrus ra liliut ru baloi no am baya' panturung ra saujor-saujor ru Baloi Tuhan koson makapandai ra atan kapupusan no.

⁵⁹ Tingganai-tingganai imam Jaudi am ngaangai' Majlis Ugama no maguyum toojo ra sasi' koson mangkinam mamparuung ri Jisus, maa' raginio maalap nilo boo Io kapatoi.

⁶⁰ Kaa' kalo nakaalap ilo ra atan-atan sala ri Jisus kabalu' pana masuang sasi' nagabau piniau. Pupus ti mokoondo' ruo ngaulun mininggaar

⁶¹ am indagu, “Ulun ragitio minindagu, ‘Lunsayon Ku Baloi Tuhan no am ralalom talu ngoorou baalon Ku saguli'.’ ”

⁶² Tingganai Maayo Imam Jaudi pana minigor am indagu ri Jisus, “Kolondo' kia pataamon Muno ra manguu' rirun raginio?”

⁶³ Nongkoror ayuk i Jisus. Igondo' poyo Tingganai Maayo Imam Jaudi ti mangkuot Riso, “Ralalom inggalan ri Aki Kapuuno' ondo' naayag, balai' akai, Okou kia Mamamayag ondo' sinusub ri Aki Kapuuno', ioginio Anak ri Aki Kapuuno'?”

⁶⁴ Taam i Jisus, “Rinagu mu noyo. Balain takamin: Intor raino makakito kau ra Anak ru Ulun no manturung ra pamiris ri Aki Kapuuno' Ondo' Maayo Kaga' Kuasa'. Makito min niayuk Io matong ralalom ru gaun giu' ra limbowon!”

⁶⁵ Tingganai Maayo Imam Jaudi ti pana namparilak ra bayang nali galama' am indagu, “Nagasab Io ri Aki Kapuuno'! Raino kalo pana maguyum takau ra sasi'. Akau ngai' nakaining atan rinagu Nani, ra magasab ri Aki Kapuuno'.

⁶⁶ Raino atan koson ukum min?”

⁶⁷ Taam ilo, “Io ti makasala, musiti' potoyon.” Tiwagi' nilo boo bulos ri Jisus am lambaa' am ulun ondo' nampalapis Riso no

⁶⁸ mindagu, “Uligi' am balai' akai, Oi Mamamayag ondo' sinusub ri Aki Kapuuno', osoi nampalamba' Rirun?”

Nagali' i Pitrus ri Jisus

⁶⁹ Paat ri Pitrus nanturung ra liliut ru baloi, ratong sangulun ulipon ruandu' ru Tingganai Maayo Imam Jaudi am indagu, “Okou niayuk nabaya' ri Jisus ulun Galilia no!”

⁷⁰ Kaa' alio' ri Pitrus ra saang nilai. “Kalo makapandai aku atan rinagu muni,” taam nano.

⁷¹ Paat ri Pitrus mingkual ra kulobon ru timbok ru baloi no, mokoondo' sangulun ulipon ruandu' ra bokon nakakito ri Pitrus. Indagu io ra ulun ondo' soroi ra giu' no, “Ilain ku ulun raginio niayuk nabaya' ri Jisus ulun Nasarit no.”

⁷² Igondo' poyo i Pitrus nagali' am indagu, “Magibot aku kalo nauligan ku ulun no!”

⁷³ Kopongo raginio, ulun-ulun ondo' minigor ra giu' i ratong ri Pitrus am indagu, “Maaru' okou ti sangulun intor risilo. Mauligan mai intor ra lalayuk ru ragu muno.”

⁷⁴ Pagigibot boo i Pitrus am kono, “Kalo nauligan ku ulun no. Amon ru topot aku po nakaulig ra ulun ti, kaluus aku no!” Paat raginio niayuk naningkuluuk manuk tandaa' no.

⁷⁵ Kakara' boo ri Pitrus ragu ri Jisus riso, “Kalo poyo maningkuluuk manuk tandaa' no, intalu kono mindagu ra kalo makaulig Raki'.” Ingkual i Pitrus am sisingut nantangi'.