MATIUS 25 - Tanou Moonsoi Timugon

Abig ra mopor ngaulun ralaa

¹ “Paat ri Aki Kapuuno' tumalimpuun mamarinta, baal no koson ragitio: Mopor ngaulun ralaa mingkual magibit ra pilasut nilono mongoi panguma' ra ungkuyon uoton.

² Limo ngaulun ti sasambungon, kaa' limo ti matanda'.

³ Limo ngaulun sasambungon ti nagibit ra pilasut nilono, kaa' kalo nagibit ra umau masuang.

⁴ Kaa' limo ngaulun ralaa ra matanda' ti nagibit ra pilasut am umau masuang.

⁵ Ungkuyon uatin ti nabuoi minatong am pokororot ngaangai' ralaa ti.

⁶ “Paat ra tanga' ru rondom, pakaining ilo ra bolos giminolok, ‘Ungkuyon uatin sumuku' noyo! Ibok umaa' min io!’

⁷ Mopor ngaulun ralaa ti karat am sikiti' nilo pilasut nilai.

⁸ Ralaa-ralaa sasambungon no nakitaak ra matanda' no, konilo, ‘Anii' akai koborok ra umau mino, sabap ra pilasut mai no maar noyo malasa'.’

⁹ ‘Kalo!’ kon ru ralaa-ralaa matanda' no, ‘Sabap ra kalo makaukop ra itakau ngai'. Ongoi kano bali giu' ra kadai.’

¹⁰ Ralaa limo ngaulun ti ongoi bali. Buoi ilo minugar, pakasuku' boo ungkuyon uatin i, am limo ngaulun nakatampos ti subol ra bunsag mabaya' ra ungkuyon uatin am kulobon pana inangaban.

¹¹ “Limo ngaulun ralaa sasambungon i ratong. ‘Tuan, tuan,’ golok nilono, ‘Ukabi' noyo kulobon ti, sumubol akai.’

¹² Kaa' taam ungkuyon uatin ti, ‘Kalo nakaulig aku ramuyun!’ ”

¹³ Pupusi' boo ri Jisus abig ragitio ra; “Kaa' akau, ilalai', sabap ra kalo napandayan min orou kapoam paat ratangan ru Anak ru Ulun no!”

Abig ra talu ngaulun ulipon

¹⁴ “Paat ri Aki Kapuuno' tumalimpuun mamarinta, baal no koson ragitio: Mokoondo' sangulun tuan masaga' mugar mongoi ra pagun ra bokon. Pampiau io ra ulipon-ulipon nano am pataaki' no rapu' nano am pailayin no risilo.

¹⁵ Inanian no ulipon nali maya' ra kapiratan nilai sigagama'. Sangulun inanian no limo ngaribu ruit mas. Bokon inanian no ruo ngaribu ruit mas am sangulun poyo inanian no saribu ruit mas. Tuan ti pana ugar boo.

¹⁶ Ulipon ondo' inanian ra limo ngaribu ruit mas ti parayus ongoi palaburo' ruit ra tinaakan riso, am pakaalap limo ngaribu poyo.

¹⁷ Mogondo' niayuk ra ulipon ondo' inanian ra ruo ngaribu ruit mas ni ra nakaalap io ruo ngaribu poyo.

¹⁸ Kaa' ulipon ondo' inanian ra saribu ruit mas ti ongoi pangkali ra luang am bunio' no ruit ni.

¹⁹ “Kabuoi ragili, tuan i saguli' am umaa' ru ulipon-ulipon i koson manguntob ra ruit pinailayan nali risilo.

²⁰ Ulipon ondo' inanian ra limo ngaribu ruit mas ratong am pasagulio' no limo ngaribu am limo ngaribu poyo intor ra pinaugar nali. Kono, ‘Tuan, nampataak kou limo ngaribu ruit mas raki'. Ilai', nakaalap aku limo ngaribu poyo.’

²¹ ‘Moonsoi,’ ragu ru tuan ni, ‘Okou ulipon ra moonsoi ondo' malansanan, sabap ra okou maalap ra intopot ra sanganu, malansan aku niayuk rirun ra masuang. Ayan no simpung raki' ralalom kaansayan.’

²² Ulipon ondo' inanian ra ruo ngaribu ruit mas ratong boo am indagu ra tuan no, ‘Nangani' kou raki' ruo ngaribu ruit mas. Ilai', nakaalap aku ruo ngaribu poyo.’

²³ ‘Moonsoi,’ ragu ru tuan no, ‘Okou ulipon ra moonsoi ondo' malansanan. Sabap ra okou maalap ra intopot ra sanganu, malansan aku niayuk rirun ra masuang. Ayan no simpung raki' ralalom kaansayan!’

²⁴ Ulipon ondo' inanian ra saribu ruit mas ti boo ratong am indagu ra tuan no, ‘Napandayan ku okou ti mapuka', mangkaang kou ayuk ra ampos ru kandoi ra ulun bokon.

²⁵ Nalaa' aku, am bunio' ku ruit ti ra ralalom ru tana'. Noo', gitio ruit muli.’

²⁶ ‘Okou ulipon ra malaat am matiar!’ kon ru tuan ni, ‘Nakapandai kou ra aku mangkaang ra ampos ru kandoi ru ulun bokon.

²⁷ Amon ru koson raginio, kua guat kalo binulian mu ruit kutu ra bank, maa' raginio paat ra aku sumaguli', maalap ku saguli' ruit kuli mabaya' ra ampos nano?

²⁸ Alapo' ruit no intor riso, am taaki' ra ulun ondo' mokoondo' mopor ngaribu no.

²⁹ Sabap ra osoi mokoondo', ruangin poyo suku' maulian io; kaa' osoi kolondo', ondo' sanganu soroi riso no alapon niayuk.

³⁰ Ra ulipon ondo' kolondo' onong ti, patirin min io ti ra intok molondom kaga' no. Giu' no mantangi' io am manguritot ripon nano!’ ”

Pangukuman ra orou pupus ru tana' ti

³¹ “Paat ra Anak ru Ulun sumaguli' koson ra raja' mabaya' ra ngaangai' malaikat Nano, manturung Io ra takhta matulai Nano.

³² Ngaangai' ulun ru tana' ti timungon ra saang Nano. Lilion No ilo ti ra ruo ngantayaran, koson ra magagalung mampalili' ra domba nano intor ra kambing.

³³ Lilion No domba-domba ra pamiris am kambing-kambing ra kait.

³⁴ Raja' ti boo mindagu ra ulun ra pamiris Nano: ‘Akau ondo' binarakat ru Ama' Kuno, ayan kano ra pamarintaan ondo' inaru' ramuyun intor ra tana' ti biningkal.

³⁵ Sabap ra paat ra Aku naitilan, pinaakan min Aku am paat ra Aku pinaason, pinainum min Aku. Ra Aku sangulun bansa' ru bokon, inapu min Aku ra baloi min.

³⁶ Paat ra Aku kolondo' bayang, inanian min Aku ra bayang. Paat ra Aku narualan, tinapisan min Aku am paat ra Aku inaput, inongoi min Aku ilai'.’

³⁷ Kaa' taam ulun-ulun motopot, ‘Kaa' Tuhan, sanggilan kia akai nakakito Rirun naitilan am inanian mai ra akanon, kapoam inumon paat Okou pinaason?

³⁸ Sanggilan kia akai nakakito Rirun ra Okou ulun bansa' ru bokon am inapu mai Okou subol ra baloi mai, kapoam kolondo' bayang am inanian mai Okou ra bayang?

³⁹ Sanggilan kia akai nakakito Rirun ra narualan kapoam inaput am inongoi mai ilai'?’

⁴⁰ Tumaam boo raja' no, ‘Balain takamin: Paat ra akau nambaal koson raginio ra sangulun rangan Kuno ondo' kalo maatang, koson binaal min niayuk ginio Raki'!’

⁴¹ “Mindagu boo raja' no ra ulun-ulun ru kait i: ‘Pagiru' kano intor Raki', akau ulun inulas ri Aki Kapuuno'! Ayan kau ra ralalom apui ra mantilayun ondo' inaru' ra Tingganai ru riwato am malaikat-malaikat nano.

⁴² Sabap ra paat ra Aku naitilan am pinaason kalo pinaakan kapoam pinainum min Aku.

⁴³ Ra Aku sangulun bansa' ru bokon, kalo inapu min Aku ra baloi mino. Ra Aku kolondo' bayang, kalo inanian min Aku ra bayang. Ra Aku narualan am inaput, kalo inongoi min Aku ilai'.’

⁴⁴ Indagu ilo boo Riso, ‘Kaa' Tuhan, sanggilan kia akai nakakito Rirun naitilan, kapoam pinaason, kapoam nasauk ra ulun bansa' ru bokon, kapoam kolondo' bayang, kapoam narualan, kapoam inaput am akai kalo nangindangan Rirun?’

⁴⁵ Tumaam raja' ti, ‘Balain takamin: Paat ra akau kalo nangindangan ra sangulun kalo maatang ti, ginio nogondo' ra akau marara' nangindangan Raki'.’

⁴⁶ Akau ti ukumin ra ukum mantilayun, kaa' ulun motopot mokoowot ra kaayagan mantilayun.”