MATIUS 23 - Tanou Moonsoi Timugon

Pampakaraan koson pagilalain paliso ru mangingila' ra Ukum ri Musa am ulun ru Parisi

¹ Indagu boo i Jisus ra ulun masuang am ra maamaya'-maamaya' Nano,

² “Mangingila' ra Ukum ri Musa am ulun ru Parisi ti noyo inanian ra kuasa' mampaintutun ra Ukum ri Musa.

³ Ginio ra, bayaa' am baalo' noyo ngaangai' panusuban nilono. Kaa' pai' noyo tiluo' paliso nilono, sabap ra ilo ti mangila' ayuk kaa' kalo mampagagaya'.

⁴ Ilo ti manusub ra ulun mambaal ra mapagon kaga', kaa' ilo galama' kalo mangindangan risilo ra koborok pana.

⁵ Ilo mambaal ngaangai' ragitio makikiilong ayuk ra ulun: Ilai' ayuk gayo ru pambulian ra tayar ru Buuk Kitab ondo' pinabangkos ra ulu am longon nilono; Ilai' ayuk gawar ru rumbai ru bayang nilono!

⁶ Ilai' ayuk ra ilo manturung ra intok mongoonsoi paat ra mokoondo' bunsag, am panturungan pinabatang ra saang ra baloi sambayangan.

⁷ Ilai' ayuk ra ilo makitabi' ra ulun giu' ra pasar am piawon ra mangingila'.

⁸ Kaa' akau kalo pana sabiton ra ‘Mangingila'’, sabap ra ngaangai' akau koson ayuk mabubukat am rondo' ayuk Mangingila'.

⁹ Pai' kau panabit ra osoi ayuk pana ra tana' ti ‘i Ama'’ sabap ra rondo' ayuk Ama' min giu' ra suruga'.

¹⁰ Pai' kau niayuk pakisabit ra ‘Tingganai’ sabap ra rondo' ayuk toojo tingganai min, ioginio Mamamayag ondo' sinusub ri Aki Kapuuno' i.

¹¹ Osoi intor ramuyun ondo' maatang toojo, musiti' masauk ra ulipon min.

¹² Osoi ayuk makapaliso ra minsawat guang, paingganaan; am osoi ayuk makapaliso minggana' guang, painsawaton.”

Mansawai i Jisus ra mangingila' ra Ukum ri Musa am ulun ru Parisi ondo' maabau-abau

¹³ “Aibui boo ramuyun, mangingila' ra Ukum ri Musa am ulun-ulun ru Parisi! Maabau-abau kau kaga', akau galama' kalo masaga' masauk ra ulun ri Aki Kapuuno', am niayuk mongompong kau ra ulun bokon ondo' masaga' masauk ra ulun ri Aki Kapuuno'. [

¹⁴ Aibui boo ramuyun, mangingila' ra Ukum ri Musa am ulun ru Parisi. Maabau-abau kau! Mamparuung kau ra napuor-napuor am manalingau ra baloi nilono, am makiasi' ra mangaawar koson makiilong ra ulun. Ginio ra akau ukumin ra maagat kaga'.]

¹⁵ “Aibui boo ramuyun, mangingila' ra Ukum ri Musa am ulun ru Parisi! Maabau-abau kau! Lumaup kau ra raat am mongoi ra ati ayuk pagun koson mampasauk ra sangulun ayuk pana mangintopot ra pangilaan min ti. Kaa' paat ra io masauk ra maamaya' min, io pana pasubolon ra naraka koson ramuyun sabap ra malaat io ka akau.

¹⁶ “Aibui boo ramuyun, tingganai ondo' nobolou! Mangila' kau ra: ‘Amon ru sasangulun magibot am alapon no Baloi Tuhan no ra sasi' nano, ulun no kalo nogonggom ru ibot nano. Kaa' amon ru magibot io am alapon no mas ralalom Baloi Tuhan no ra sasi' nano, io nogonggom ru ibot nano!’

¹⁷ Akau ulun kolondo' pangaratian am bolou! Atan kia ondo' maatang toojo? Mas no kia kapoam Baloi Tuhan ondo' mampatulai ra mas no?

¹⁸ Mangila' kau ra: ‘Amon ru sasangulun magibot am alapon no altar ra sasi' nano, ulun no kalo nogonggom ru ibot nano.’

¹⁹ Mumpara' boo bolou mino! Atan kia ondo' maatang toojo? Ondo' pataakon no kia kapoam altar ondo' mampatulai ra taak nano?

²⁰ Ginio ra, paat ra sasangulun magibot am alapon no altar ra sasi' nano, arati' no intok ragitio noyo nagibatan nano mabaya' poyo ra ngaangai' taak ra rasawat ru altar no.

²¹ Paat ra sasangulun magibot am alapon no Baloi Tuhan ra sasi' nano, sala' ka baloi raginio ayuk, kaa' i Aki Kapuuno' alapon no ra sasi' nano.

²² Paat ra sasangulun magibot am alapon no limbowon ra sasi' nano, sala' ka limbowon ayuk, kaa' takhta ri Aki Kapuuno' am Io ondo' manturung no alapon no ra sasi' nano.

²³ “Aibui boo ramuyun, mangingila' ra Ukum ri Musa am akau ulun ru Parisi! Maabau-abau kau! Mangani' kau niayuk ri Aki Kapuuno' mopor piatus intor ra apa' pampagamis ra akanon pana, ioginio selasih, adas manis am jintan. Kaa' ondo' maatang kaga' ra Ukum ri Musa, ioginio koson katimpakan, makaasi' am gagaya', polosoon min ayuk! Gitio noyo panusuban ru Ukum ti ondo' musiti' min suguton am susuban ra bokon pana kalo lilianin.

²⁴ Akau ti tingganai bolou! Bulongor ralalom panginuman inimpilian min, kaa' unta ralalom no tolonon min.

²⁵ “Aibui boo ramuyun, mangingila' ra Ukum ri Musa am ulun ru Parisi! Maabau-abau kau! Mampaliung kau ra liwar ru sangkir am kakanan min suku' mapasau, kaa' ralalom no majamol, mototop ra baal malaat ra akau mampagaau ra kuliamos am mangingkaut.

²⁶ Akau poyo ulun ru Parisi, bolou kau nai! Bagui' pagulu atan ondo' ralalom ru sangkir no, am liwar no pana masauk mapasau.

²⁷ “Aibui boo ramuyun, mangingila' ra Ukum ri Musa am ulun ru Parisi! Maabau-abau kau! Akau koson ra karanda' ondo' sinaat mapulak, ra liwar moonsoi ilain, kaa' ralalom no nososok ra bungul ru ulun am baangkai ondo' mongootong.

²⁸ Koson niayuk ramuyun, pagilangan ru ulun akau moonsoi, kaa' ralalom ru guang min, mototop ra abau am tula.”

Manala' i Jisus ra ukuman ru mangingila' ra Ukum ri Musa am ulun ru Parisi

²⁹ “Aibui boo ramuyun, mangingila' ra Ukum ri Musa am ulun ru Parisi! Maabau-abau kau! Mambaal kau ra lobong moonsoi ra nabi-nabi, am binungaan min lugu' pangkaraan ra ulun moonsoi ondo' naayag ra galing i.

³⁰ Kamin, ‘Amon ru naayag akai paat ra kinamatuaan maili, kalo tiluon mai atan binaal nilo, koson mamatoi ra nabi-nabi.’

³¹ Ginio ra mapandayan ra akau no mogondo' guang ra mamamatoi.

³² Baalo' am pongoono' min atan ondo' kinamatuaan mini nanalimpuun pambaal.

³³ Akau ngaangai' ti ulun malaat! Sayat kau ru kukuo! Akau ukumin mongoi ra naraka am kolondo' pagiruan min

³⁴ Ginio ra rongogo' min toojo gitio: Manusub Aku ra nabi-nabi matong ramuyun, ulun pintar am niayuk mangingila': Potoyon min kukula' intor ilo ngaangai', salipon min bokon no am bokon no poyo loposon min ra baloi sambayangan, am mangilou kau niayuk risilo intor ra rondo' pekan mongoi ra pekan ra bokon.

³⁵ Pupus no, ukum ra namatoi ra ngaangai' ulun ondo' kolondo' sala i paratuon ramuyun. Intor namatayan ri Abil ondo' kolondo' sala, suku' namatayan ri Jakaria, anak ri Birikia, ondo' pinatoi min ra lolot ru altar am Intok Matulai.

³⁶ Balain takamin: Ukum ru ngaangai' raginio paratuon ra ulun ra raino ti!”

Togom ri Jisus ra Jirusalim

³⁷ “Mamagun ru Jirusalim! Namatoi kau ra nabi-nabi am binobol min ulun-ulun ondo' sinusub ri Aki Kapuuno'! Ingkula' noyo Aku masaga' mangampin ramuyun, koson ra manuk puunan mampagupu' ra gogol ra kawo nano, kaa' akau marara'.

³⁸ Sabap raginio, Baloi Tuhan min iruanin ri Aki Kapuuno', am masiluk boo.

³⁹ Balain takamin: Intor raino kalo boo makito min Aku saboi mindagu kau, ‘Kabarakat noyo Io ondo' minatong ralalom inggalan ru Tuhan.’ ”